Revelation 5

Kurukh (पुना गच्छरना NT (BSI))

← Chapter 4 Jump to: Chapter 6 →

1इदही ख़ॊख़ा ऎन बॆल-गदिया नू उक्‍काचस आसी तीना ख़ेक्खा नू ओन्टा पुथी ईरकन, अइय्या भितरी बहरी लिख्रकी रहचा, अरा सात गोटा मरका लौचका ती मुच्‍चका रहचा।

2अरा ऎन ओन्टा सवंगिय मेर्ख़ा पैकासिन जॊर सड़ा ती चिच्चि‍यारनुम ब'अना ईरकन, “ई पुथिन तिसक'आ गे अरा इदही मरकन ख़च्‍चा गे नॆ जॊगे र'ई?”

3लिकिन मेर्ख़ा नू महले ख़ॆख़ेल नू महले ख़ॆख़ेल ही किय्या नॆ हूँ आ पुथिन चलख़'आ गे महले अदही भितरी ऎरा गे पोल्लर।

4अरा ऎन नीख़ चार चार चींख़ा हेलरकन, एन्‍देरगेका नॆ हूँ आ पुथिन चलख़'आ गे महले अदही भितरी ऎरा गे जॊगे मल ख़क्ख्रर।

5तहाँ अबड़ा सेयान आलर ती ओर्तोस एंगन बाचस, “अमा चींख़ा! ऎरा, नॆ यहूदा गोतोर ता लकड़ा अरा दाऊद बॆलासी जंईपुंई हिकदस, आस जित्तचकादस। आस आ पुथिन चलख़'आ गे अरा अदही सतियो मरकन ख़च्‍चा गे ओंग्दस।”

6फेन ऎन पिटतारका ओन्टा भेंडो ख़द्दन बॆल-गदिया अरा अबड़ा चरियो उज्‍जना आलॊ अरा चौबीस सेयान आलर ही मझी नू इज्‍जका ईरकन। आसी सात गोटा मरग अरा सात गोटा ख़न्न रहचा। इबड़ा सात गोटा ख़न्न धर्मेसी सातो बॊलता हवे, एकाबड़ा सौंसे ख़ॆख़ेल नू तइरका र'ई।

7अरा आस बरचस ती बॆल-गदिया नू उक्‍काचस आसी तीना ख़ेक्खा ती आ पुथिन होच्‍चस।

8अरा आस आ पुथिन होच्‍च ख़च्‍चियस ख़ने, अबड़ा चरियो उज्‍जना आलॊ अरा चौबीस सेयान आलर आसी मुन्दहारे ख़ेडमूली खत्रर। अरा इबड़ा ओर्मर ही ख़ेक्खा नू तम्मुर्रा अरा नेम्‍हा आलर ही गोहरारना गुट्ठी ही धूप ती निंदका सोना ही मौनी रहचा।

9अरा अबड़र ओन्टा पुना डंडी पाड़ा हेलरर का, “नीन आ पुथिन हो'आ गे अरा अदही मरका गुट्ठिन ख़च्‍चा गे जॊगे र'अदय। अरा नीन पिटतारकय ती निंग्‍है ख़ॆंस ती उर्मी गोतोर अरा भखा अरा आल खोंड़हा अरा राजी ती धर्मेस गे आलारिन ख़ीन्दकादय।

10अरा नीन आरिन एम्है धर्मेस गे तेतर-सुसर नना गे ओन्टा राजी अरा नैगर कमचकादय, अरा आर ख़ॆख़ेल नू राजी ननोर।”

11फेन ऎन अउरिम ईरकन ख़ने, लाखों करोड़ो मेर्ख़ा पैकर ही सड़न बॆल-गदिया अरा अबड़ा उज्‍जना आलॊ ही अरा अबड़ा सेयान आलर ही ओनबेंड़र'आ मेंजकन।

12अरा आर जॊर सड़ा ती चिच्चि‍यार'अरकी ब'आ लगियर, “नॆ पिटतारका भेंडो ख़द्द मसीस र'अस, आस सवंग अरा खुर्जी अरा लूर अरा पया अरा मईन अरा महबा अरा ओहमा ख़क्खा गे जॊगे र'अस।”

13फेन ऎन मेर्ख़ा अरा ख़ॆख़ेल अरा ख़ॆख़ेल ही किय्या अरा समुदर ता उर्मी आलॊ एन्ने ब'अना मेंजकन, “नॆ बॆल-गदिया नू ओकदस आस गे, अरा नॆ भेंडो ख़द्द मसीस र'अस आस गे ओहमा, अरा मईन, अरा महबा, अरा सवंग हुल्‍लो ती हुल्‍लो गूटी र'अन नेकअन।”

14अरा अबड़ा चरियो उज्‍जना आलॊ बाचा, “आमेन।” अरा अबड़ा सेयान आलर ख़ेडमूली खत्रर ती ऒड़ लग्गियर।

← Chapter 4 Jump to: Chapter 6 →