Revelation 19

Kurukh (पुना गच्छरना NT (BSI))

← Chapter 18 Jump to: Chapter 20 →

1इबड़ा कत्था गुट्ठी ही ख़ॊख़ा ऎन मेर्ख़ा नू ओन्टा कोहाँ आल गोंहड़ा ही चिच्चियारना लेक्खा ओन्टा सड़न मेंजकन। आद एन्ने बाचा का, “हल्‍लेलुया! नाड़रना अरा महबा अरा सवंग नम्है धर्मेसी दिम हिके।

2एन्‍देरगेका आसी नेंवई नन्ना गुट्ठी मानिम अरा उजगो र'ई। तंग्है पेहरन ही सोतरा नलख ती ख़ॆख़ेल ता आलारिन नठाबाचका कोड़हे बेस्वा लेक्खा कोहाँ मलदौ नगरे गे आस दंडे ही नेंवई चिच्चस, अरा अदगे तंग्‍है जॊंख़र ही बहाबाचका ख़ॆंस ही बदली किर्ताचस।”

3फेन दोसर खेप आर चिच्चियारर, “हल्‍लेलुया! अदही ओलना ही कुहड़ा हुल्‍लो ती हुल्‍लो गूटी मइय्याँ चो'अना बारी र'ओ।”

4इदही ख़ॊख़ा चौबीस सेयान आलर अरा चरियो उज्जना आलॊ बॆल-गदिया नू उक्का धर्मेसी मुन्दहारे ख़ेडमूली खत्रर ती आसिन ऒड़ लग्गियर। अरा आर बाचर, “आमेन, हल्‍लेलुया।”

5फेन बॆल-गदिया ती ओन्टा सड़ा मेन्‍द्रा, “अना धर्मेसी जॊंख़ारो अरा आसी इल्‍चू आलारो, सन्नीर कोहँर नीम ओर्मर नम्है धर्मेसिन ओहमा नना।”

6फेन ऎन ओन्टा सड़न मेंजकन, आद कोहाँ आल गोंहड़ा ही चिच्चियारना लेक्खा, अरा कोड़हे बग्गे अम्मु बाहना ही ख़रख़ना लेक्खा, अरा जॊर मुर्रना ही ख़रख़ना लेक्‍खा रहचा। आर एन्ने ब'आ लगियर, “हल्‍लेलुया! उर्मी ती सवंगिय नम्है धर्मे उर्बस राजी नन्दस।

7बरा, नाम रिझ्र'ओत अरा रिरयार'ओत, अरा आसी महबा ननोत नेकअन, एन्‍देरगेका भेंडो ख़द्दासी बेंजा अंड़सा ख़च्चकी र'ई, अरा आसी बेंजा पेल्लो तंगन सपड़ाचकी र'ई।

8अरा बेंजा पेल्‍लो गे अरगा अरा बिल्चना लेपलेपे किचरी अत्ता गे चीरकी रहचा।” लेपलेपे किचरी ही माने नेम्‍हा आलर ही उजगो नलख गुट्ठी हवे।

9फेन आ मेर्ख़ा पैकस एंगन बाचस, “इदिन लिख'आ, नॆ भेंडो ख़द्दासी बेंजा ही मदी नू मॆख़रकानर, आर आसीस ख़क्ख'ऊ र'अनर।” अरा आस अउरिम एंगन बाचस, “इबड़ा धर्मेसी मानी कत्‍था गुट्ठी हवे।”

10इदन मेंजकन ख़ने, ऎन आसिन ऒड़ लग्गा गे आसी ख़ेडमूली खत्रकन। ख़ने आस एंगन बाचस, “ऎरा, एन्ने अमा नना, ऎन हूँ निंग्‍है गने अरा येसुसी पत्त नू गोवाह चि'ऊ निंग्‍है भईर गने संगे जॊंख़न हिकदन। औंगे धर्मेसिन दिम ऒड़ लग्गा। एन्‍देरगेका नॆ येसुसी पत्त नू नन्नर गे तेंगनर, आर मानिम नू धर्मेसी बॊलतस आर गे चिच्का कत्था गुट्ठिन दिम तेंगनर।”

11फेन ऎन मेर्ख़न तिसगिरका ईरकन, अरा ऎरा, ओन्टा पंडरु घोड़ो असन इज्जकी रहचा। अरा एका ओर्तस आ घोड़ोन चलाब'अदस आस पत्त'अना जॊगे अरा मानिम बारदस। आस उजगो गने नेंवई अरा लड़ई नन्दस।

12आसी ख़न्न चिच्‍ची ही लघरना बेसे रहचा, अरा आसी कुक्‍कु नू अजम बग्‍गे बॆल-मुकुट रहचा। अरा आसी मइय्याँ ओन्टा नामे लिख्रकी रहचा, एकदन आसिन अम्‍बर नॆ हूँ बलनर।

13अरा आस ख़ॆंस छिंछड़ाचका किचरी कूरकाचस, अरा आसी नामे “धर्मेसी कत्‍था” हवे।

14अरा मेर्ख़ा ता फउद गुट्ठी पंडरु अरा निमन लेपलेपे किचरी अत्तका ती पंडरु घोड़ो गुट्ठी नू अरगका ती आसी ख़ॊख़ा गुड़ियारर।

15अरा आसी बई ती जाती जाती ता आलारिन पिटा गे ओन्टा धारे तलवार उरखा, अरा आस सवंग गने पूरा अदिया गने आरिन राजी ननोस। अरा ओर्तोस अंगुर रासी ही कुंड़ा नू अंगुरन पीख़ना लेक्खा आस उर्मी ती सवंगिय धर्मेसी कोड़हे खींस ही अंगुर रासी ही कुंड़ा नू तंग्है बैरीरिन पीख़ोस।

16अरा आसी किचरी नू अरा डुंडे नू ई नामे लिख्रकी रहचा: “बॆलर ही बॆलस अरा उर्बर ही उर्बस।”

17फेन ऎन ओन्टा मेर्ख़ा पैकासिन बीड़ी नू इज्‍जका ईरकन। आस मेर्ख़ा मझी नू उढियारना ऒड़ा गुट्ठिन जॊरसरिया चिच्चियारस ती बाचस, “बरा, धर्मेसी कोहाँ मदी गे ख़ॊंड़र'आ।

18औंगे नीम बॆलर ही अहड़ा, अरा फउद मुद्धर ही अहड़ा, अरा सवंगियर ही अहड़ा, अरा घोड़ो गुट्ठी ही अहड़ा, अरा घोड़ो अरगू फउदर ही अहड़ा, अरा छछिन्द अरा बिट्ठी ननू जॊंख़र अरा सन्नीर कोहँर ओर्मर ही अहड़न मॊख़ोर।”

19फेन ऎन आ मेक्‍खोन अरा ख़ॆख़ेल ता बॆलारिन अरा आर ही फउद गुट्ठिन आ घोड़ो अर्गुस अरा आसी फउद ती लड़'आ गे ख़ॊंड़रका ईरकन।

20लिकिन आ मेक्‍खो गा धरतारा केरा, अरा अदही गने आ मेक्खो ही ऊजी नू अजगुत नलख गुट्ठी नंजका ठकवा धर्मेसी कत्था तिंगुस हूँ धरतारस केरस। ई अजगुत नलख गुट्ठी ती दिम ई ठकवा धर्मेसी कत्था तिंगुस आ मेक्खो ही छपा होच्चका ती अदही मूर्तिन ऒड़ लग्गुरिन ठकचस। इबड़ा इरबारिम उज्‍जनुम उज्जनुम गन्धक लघरना चिच्‍ची ही समुदर नू हेबड़तारर केरर।

21अरा आर ही बछ्रका जम्मा फउदर आ घोड़ो अर्गुसी बई ती उरखना तलवार ती पिटतारर केरर। अरा उर्मी ऒड़ा आर ही अहड़ा ती उड़चा केरा।

← Chapter 18 Jump to: Chapter 20 →