1 Samuel 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1’Dini Samueli nga di lubu odu beri e’du ra, eri osu drinia, nga eri zi avasi o’bolo ndruzasi, kini, Yehova osuni odu mi dria ovuzu opiru ’ba erini Israeli ma drilia ku ya?

2Mini ma kuria andru ’boria, mi nga ’ba iri isu nyadri Rakelini ovupi angu Benyaminini ma kalatia Zelizaari ageia; yi nga ’yo mi tia kini, Akanya mini mule ndrule ’diyi, isu yi ’bo, te mi ne, mi ati ku e’yo akanyani egako ja, te eri e’yo mini ega candisi kini, Ma di nga ’ye ma mvasi a’duru ya?

3Te mi mu nga drile engazu pari nderia, azini mi Inga ca pati kumara Taboriniria, ’dale mi nga dri fu ’ba na tupi Mungu vu Betelia ’diyi be, aluri ’du ndrianzi na, aziniri ’du enya olemi na, aziniri ’du kerea patiefi ma su beri.

4Te yi nga mi zi ci ci, yi nga mi dri enya olemi iri ’diyi fe; mi nga yi a’i yi ma dria.

5Vutinia mi nga ca oni Mungunia pari okporu asikari Filisi’tiaa ’diyini yi okuzuria; eri nga eca ’dini, mi ka ca aku nderia ’dale ’bo, imi nga dri fu nabi nguluru engapi pari uruleruria acipi tualu ’diyi be, Yini esiria afa zaburi ngozuri pi be, arimva pie, ejeleko pie, o’di pie yi ma drilia; azini yi nga ovu e’yo ondrizu.

6Te orindi Yehovani nga esi mi dria okporu, azini mi nga e’yo ondri yi be, azini mi nga mi oja ’ba nduru.

7Eri nga eca ’dini, eceta ’diyini ngale ecale mi vurisi, mi ma ’ye e’yo mi drini isule ’yelerile, toko ku Munguni ovule mi berisi.

8Te mi ma si va ma drilia Giligalia; te mine, ma nga esi va mi vu afa feza vele edetaruri azini edeta asi anzuruni edezu. Mi ma te o’du aziri, kpere mani emuria mi vu afa mini ngale ’yeleri eceria.

9Eri nga eca ’dini, erini i ma Inguku ojazu Samueli vuleru muzu ’boria, Mungu fe eri dri asi ndu; eceta nde ’diyi dria nga eca ’dini o’du ndesi ra.

10Te yini ecazu oni ndea ’boria, mi lu, nabi nguluru acipi tualu ’diyi fu dri eri be; azini Orindi Munguni esi eri ma dria okporu, eri ondri e’yo yi ma eselia indi.

11Eri nga eca ’dini, ’ba dria eri nipi ndra drio ra ’diyi ka ndre eri ondri e’yo nabi ma eselia ra, ’ba nde ’diyi nga di ’yo yi agyi ma tia alu alu, A’du eca Kisi mvi ve ’dinini ya? Sauloni vini alu nabi ma eselia indi ya?

12Agu alu pari nderiari omvi kini, A’dini ata yinini ya? E’yo ’disi e’yo ’di eca e’yo o’bezaru, kini, Sauloni vini alu nabi ma eselia indi ya?

13Te eri ka de e’yo ondrizu ’bo, eri eca pari uruleruria.

14Azini Saulo ma ati oguri ’yo eri tia ati’bo be kini, Emi mu ndra ngoa ya? Te eri omvi kini, Akanya yi ndruria; te amani yi ndruria ti yi e’dani ku, ama nga mu Samueli vu.

15Te Saulo ma ati oguri kini, Ma zi mi tia, mi olu mani e’yo Samuelini ’yole mi tiari fo.

16Te Saulo ’yo i ati oguri ma tia kini, Eri olu ama dri kilili, kini ’ba isu akanya yi ’bo Te opi nyaza ma e’yo Samuelini ’yole eri ma tiari eri awuni olu eri ma tia ku.

17Te Samueli nga ’ba ongulumuru omve yi okuzu tualu Yehova vu Mizipaa;

18eri nga ’yo anzi Israelini ma tia, Yehova Mungu Israeliniri ’yo ’dini, Ma eji ndra Israeli uru engazu Misiriasi ra, azini ma opa vini emi ’ba Misiria ’diyi pi ma dria, suru dria emi inzapi ’diyi be.

19Te o’du andru ’dosi emi ’be Mungu emini ra, eri’i emi opapi candi emini pi ma alia dria e’yo ewaru emini beri; te emi ’yo eri ma tia, Yo! te mi ’ba opi ama drilia ci. E’yo ’disi curu’do emi e’da emi Yehova ma milia suruti emini vusi azini ’ba alifu alifu emini vusi.

20’Dini Samueli eji suruti Israelini dria ogogo, te pe suru Benyamininiri’i.

21Te eri eji vini suruti Benyaminini ogogo ori’ba vusi ori’ba vusi, te pe ori’ba Matri vileri’i; eri eji vini ori’ba Matri vileri ogogo, te pe Saulo Kisi mvi’i. Te yi ka eri nda ra, econi eri isuzaru ku.

22Yi zi Yehovani dika kini, ’Ba nderi ecani te ’doa ku ya? Te Yehova omvi e’yo kini, Mi ne, eri zi i afazu ma eselia.

23Te yi nzu eri ejizu pari nderiasi; te erini pa soria ’ba ongulumuru ma eselia, isu eri aga ’ba dria azini ’diyi zozasi ra, engazu gbudria cazu dria uru.

24Samueli ’yo ’ba dria ma tia, Emi ndre agu Yehovani peleri ra ya? ’Ba azini erileni ’ba dria eselia aluni yo. Te ’ba dria yi otre, yi ’yo kini, Opi ma rua ma adri ala ’dani!

25Vutinia Samueli nga eli ’ba ongulumuru dri opi nyaza ma adriza ece ra; si e’yo nderi buku alia ci, ’ba eri Yehova ma drilia. Te Samueli nga di ’ba dria ma ti pe mvizu ra, ’ba dria alu alu jo ini ’diyi vusi.

26Sauloni indi mvi aku iniria Gibeaa, te ombaou Munguni asini elole ra ’eliyi mu eri beni.

27Te ’ba toko toko azini ’eliyi yi ’yo ra kini, Agu ’dori nga ama pa ngoni ngoni ya? Te yi onzo eri ra, yi ejini eri dri afa feza ku. Te eri adri ini ciri.

← Chapter 9 Jump to: Chapter 11 →