1 Samuel 19

Lugbara (E’yo Siza Alatararu Munguniri BIBLIA)

← Chapter 18 Jump to: Chapter 20 →

1Te Saulo ’yo i ma mvi Yonatani pi ma tia, ati’ba erini ’diyi dria be kini, yi ma fu Daudini ra. Te Yonatani Saulo mvi le Daudini tu.

2Te Yonatani olu Daudi tia kini, Ma ati Sauloni geri nda mi fuzu; e’yo ’disi ma matu ’ba mi vu, mi te mi agei onyiru o’bitisi, mi adri pari zizaruri ma alia, mi ma zi mi zi;

3te ma nga fu amve, mu pa sozu ma ari ageia, pari mini adrizu asearia, ma nga o’yo ma ati be ’yo minisi; ma ka e’yo isu ra ma nga olu mi dri ra.

4’Fe Yonatani ’yo e’yo onyiru Daudiniri i ati Saulo ma tia, ’yo tinia kini, Opi ma ’ye onzi ati’bo ini Daudi vu ku, a’disiku eri ’yeni onzi mi vu ku, azini ’yeta erini mi vu ’diyi ovu onyiru tu;

5te eri adi idri ini pi dra dri, ’ Filisitiaari fuzu, aziru Yehova ’ye para amboru Israeli dria dri, Mi ne e’yo nde ndra ra, mi ovu ani ayikosi; mi di ’ba ezata kokoru ’diniri ma ari eza, Daudini fuzu e’yo kokoru a’di e’yosi ya?

6Te Saulo eri o’duko Yonatanini ra; te Saulo so oyo kini, Ekile Yehovani ovule idri berile, yi ngani eri fu ku.

7Yonatani nga di Daudini omve ra, azini Yonatani ece eri dri e’yo ’diyi dria ra. Te Yonatani eji Daudini Saulo vu, eri ovu eri ma milia ekile okorile.

8A’di ’diza e’do dika; azini Daudi efu ra, eri ’di a’di ’ba Filisitiaa ’diyi be, eri ofu yi azavuru, yi apa Daudisi apa apa.

9Te isu orindi onzi engapi Yehova vuri esi Saulo ma dria, erini riria aju be i ma dria joaria; te Daudi ovu o’di cozu i ma drisi.

10Te Saulo o’bi Daudini ’dizu ajusi kpere abi ruaa; te eri ona i Saulo ma driliasi, ’dini aju so i abi ruaa toko. Daudi apa ra, nga i pa ini ’ dasi ra.

11Te Saulo pe ’ba ti jo Daudiniria eri mbazu, eri fuzu o’bitisi. Te Mikali Daudi vile okuri ’yo tinia kini, Mi ka apa inisi andru ku, drusi yi nga mi fu ra.

12’Dini Mikali osi Daudini va derisasi; eri mu ra, nzu ra, pa ira.

13Te Mikali ’du wura inzile inziri, eri la eri gbolo dria’i eri ’ba afa dri atizu ede le ndri ’bikosiri erini dri atizu’i, eri ’be drini bongosi ci.

14Te Sauloni ’ba ti peria muzu Daudini ejizu, oku ’yo ra kini, Eri azoru.

15Te Saulo pe ’ba ti dika Daudini ndrezu kini, Emi eji eri gbolo dria ma vu ’doa, ma ma fu eri ani.

16Te ’ba tini epele ’diyi ka efi ra, mi ne, dere wura toko ’baleri gbolo driani, afa dri atizu edele ndri ’bikosiri ati drini ani.

17Te Saulo ’yo Mikali ma tia, Mi ici ma dri ’dini, azini mi fe ari’bo manini muzu i pazu ra ’dini a’disi ya? Te Mikali omvi e’yo Saulo ma tia kini, Eri ’yo ma tia, kini, Mi fe ma ma mu ra; ma te mi fu a’di e’yosi ya?

18’Dini Daudi apa, eri pa ira, eri emu Samueli vu Ramaa, eri olu tinia e’yo dria Sauloni ’yele eri vu ’diyi. Te yi Samueli be mu adrizu Nayotia.

19Azini yi olu Saulo ma tia kini, Mi ne, Daudini ’Nayoti Ramaaria ’dale.

20Te Saulo pe ojio ti muzu Daudini bizu; te yini nabi ongulumuru ndreria, yini e’yo ondriria, Samuelini pa soria yi ma drilia, Orindi Munguni esi ojio Sauloni tini pele ’diyi ma dria, yi ondri e’yo indi

21Te yi ka e’yo nderi olu Saulo tia, eri pe ojio azini ’diyi ma ti, te yi ondri e’yo indio Dika Saulo pe ojio ti pale narisi, te yi ondri e’yo indi.

22Eri ma ngulupi nga di mu Ramaa, eri emu yi a’di ambo gale ga Sekuaria; eri zi kini, Samueli pi Daudi be yi ngoa ya? Te ’ba alu ’yo ra, Mi ne, yi Nayoti Ramaaria.

23Eri mu Nayoti Ramaaria ’dale; te Orindi Munguni esi eri ma dria indi, eri mu drile, ondri yo kpere erini caria Nayoti Ramaaria.

24Azini eri otru i ma bongo indi, eri ondri e’yo Samueli ma drilia indi, eri la i va pililiru etu nde ’dasi zu azini ini rra. E’yo ’disi yi ’yo di ani, Sauloni vini alu nabi piyi ma eselia indi ya?

← Chapter 18 Jump to: Chapter 20 →