1 Samuel 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1Te Yehova nga ’yo Samueli ma tia kini, Mi nga ovu candisi Saulo ma e’yosi o’du ngopi ya, mani Sauloni kule ovuzu opi Israeliniru ’borisi? Mi to odu o’yu mini alia, mi mu; ma nga mi ti pe Yese ’ba Betelehemuari vu, a’disiku ma isu mani opi ra, anzi erini ma eselia.

2Te Samueli ’yo ra, Ma eco mu ngoni ngoni ya? Saulo ka eri ra, eri nga ma fu ra. Te Yehova kini, Mi ma ’du tikari mi be, azini mi ma ’yo, Ma emu edeta edezu Yehova dri.

3Azini mi ma omve Yeseni edeta ndea indi, te ma nga mi dri afa mini ngale ’yeleri ece ra; azini mi nga ma dri ’ba mani ngale runi e’dale mi driri ma dria odu osu ra.

4’Dini Samueli ’ye e’yo Yehovani e’yoni azile eri ma tiari ra, eri mu Betelehemua. Azini ’ba ’wara aku ndea ’diyi yi emu eri vu rua yaza be, yi ’yo ra, Mi emu asi anzurusi ya?

5Te -eri ’yo ra, Asi anzurusi; ma emu edeta edezu Yehova dri; emi ede emi alaru, emi emu ma be edeta ndea. Azini eri ede Yese pi alaru anzipi erini pie, eri omve yi edetaa ’dale indio

6Eri nga eca ’dini, yi ka emu ’bo, eri ’ba mile Eliabu vu, eri ’yo ra, Ada ’ba Yehovani odu driniari ovu i ma drilia ’do.

7Te Yehova ’yo Samueli ma tia, eri andretia ku, zoza erini vu ku indi, a’disiku ma ga eri si; te Yehova ndreni ’ba ekile ’bani ’ba ndrelerile ku; a’disiku ’ba yi rua e’dapi amveri ndre, te Yehovani ini ndre asia.

8Yese nga di Abinadabuni omve ra, fe eri agazu Samueli ma drilia. Te eri ’yo ra, Yehova peni ’diri ku indi.

9Dika Yese fe Samani agazu, te eri ’yo ra, Yehova peni ’diri ku indi.

10Te Yese fe i ma anzipi aziri agazu Samueli ma drilia. Te Samueli ’yo Yese ma tia, Yehova peni ’ba ’diyi ku.

11Samueli nga ’yo Yese ma tia, Anzi mini yi dria ’doa ’doyi’i ya? Te eri ’yo ra, Ace, nga mva vileri, te mi lu, te eri kabilo oceria, Te Samueli ’yo Yese ma tia, Mi pe ’ba ti eri omvezu; te ama ngani ri va leu kpere erini ecaria ’doa.

12Eri pe ’ba ti ra, yi eji eri ra. Isu de ’eri ’ba eka walalaru, mile be ndrizaru, azini nezu milesi eri e’da onyiru ndrizaru. Te Yehova nga ’yo ra, Mi enga, mi osu odu drinia; a’disiku eri ’di’i.

13Samueli nga di o’yu odu beri ’du ra, osu di odu nde drinia adripi ma eselia; azini Orindi Yehovani eca di Daudi ma dria engazu o’du ’dasi kpere drile. Samueli nga enga ra, mu di Ramaa.

14Te Orindi Yehovani ku Sauloni ra, azini orindi onzi engapi Yehova vuri ecandi erini.

15Te ati’ba Saulo vile ’diyi ’yo eri ma tia, Mi ndre nga curu’do, orindi onzi engapi Mungu vuri mi ecandi.

16Curu’do opi amani ma azi ati’ba ini ovupi i ma drilia ’diyi, yi ma nda ’ba ecopi o’di copi onduasiri; te eri nga eca ’dini, orindi onzi engapi Mungu vuri ka nga eca mi dria ra, ’ba nderi nga o’di co i ma drisi, mi nga ovu onyiru ani beni.

17’Dini Saulo ’yo ati’ba erini ma tia, Emi nda curu’do ma dri ’ba o’di copi onduasiri, emi eji eri ma vu.

18Ati’bo alu nga di e’yo omvi kini, Mi ne, ma ndre Yese ’ba Betelehemuari ma mvini, ’ba o’di copi onduasiri’i, ’ba okporu asi teza beri’i, azini ’ba ombaouni uri kokoruri, ’ba e’yo ’yopi efisiri, azini eri ’ba ndrizaru; azini Yehova ovu eri be.

19’Dini Saulo pe di ’ba ti Yese vu, kini, Mi epe mani mi mvi Daudi kabilo ocepiri ma ti.

20Yese nga di akanya ’du, enya pie, patiefi ma su kerea alu pie, ndrimva alu pie, pe yi ma ti Saulo dri Daudi be.

21Daudi nga emu Saulo vu ra, so pa eri ma drilia; te Saulo le eri avasi tu, azini eri oja i ’ba afa suza ayaru ombani eriru ojipiriru.

22Dika Saulo pe ’ba ti Yese vu kini, Ma zi mi tia, mi ku Daudi ma so pa ma milia ani, a’disiku eri isu asi ndriza ma milia ra.

23Eri nga eca ’dini, orindi onzi engapi Mungu vuri ka eca Saulo ma dria ra, Daudi ’du o’di, co i ma drisi; ’dini Saulo ma asi emvi ra, eri eca onyiru, azini orindi onzi ku eri ra.

← Chapter 15 Jump to: Chapter 17 →