1 Samuel 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Eri nga eca ’dini, Samuelini di ovuzu mbazaururisi eri ’ba anzi ini ovuzu ’ba e’yo lipi Israeli dri ’diyiru.

2Mva erini okori ma ru Yoeli, iriri ma ru Abija; yi adri ’ba e’yo lipiriru Beeri-sebaa.

3Te anzi erini ’diyi acini geri erini alia ku, te yi oja yi kala orodri ndazu; yi adri afa ’ba ti razuri a’i, te yi lini e’yo liza kilili ku.

4Te ’ba ’wara Israelini ’diyi dria nga yi oku tualu, emu Samueli vu Ramaa,

5te yi ’yo eri tia, Mi ne, ’mi curu’do mbazauni, azini anzi mini ’diyi acini geri mini ma alia ku; curu’do mi ’ba ama dri opi amboru ama dri cezu ekile suru dria dririle.

6Te e’yo ’di feni ayiko Samueli dri ku, yini ’yoria kini, Mi ’ba ama dri opi amboru ama dri cezu. Te Samueli zi Yehova ma tia ra.

7Te Yehova ’yo Samueli ma tia, Mi eri o’duko ’ba ’diyini, e’yo yini ’yole mi tiarisi dria; yi ’beni mi’i ku, te yi ’be ma’i ’dini ma ma ovu opiru yi ma drilia ku.

8Te ekile e’yo dria yini ’yele engazu o’du mani yi ofuzu Misiriasi ecazu kpere curu’do, yini ma kuzu ra, yini azi ngazu Mungu andini ’diyi dririsi, yi ’ye mi vu ’dinile indi.

9E’yo ’disi curu’do mi eri yi ma o’duko; te mi ma imba yi dri e’yere, azini mi ece yi dri e’yo ngoni ngori opi ngapi angu nyapi yi driliarini ngale ’yeleri.

10Samueli nga di fi ’Yo dria Yehovani ’yole ’diyi olu ’ba nde opi zipi eri tia ’diyi dri.

11Eri ’yo ra, E’yo opi ngapi angu nyapi emi driliarini ngale ’yele ’diyi nga ovu ’dini: eri nga agupianzi emini o’du, nga yi ope i dri gari ma ’baru, azini ovuzu ’ba nzupi akanya driariru, azini ’diyi nga onzu gari erini ma drilia;

12azini eri nga yi ope i dri ovuzu ambo asikari alifu pi ma drilia kali towi be ’diyiru, ’ba azini ’diyi nga erini ’yazu, azini ’diyi anya erini lozu, azini ’diyi afa ombani ’diyi dizu i azini afa gari erini ’diyi vileri o’bazu indi.

13Azini eri nga ezoanzi emini ’diyi o’du ovuzu ’ba odu arikariruri edepi ’diyiru, azini ’ba nyaka ’ipi ’diyiru, ’ba enya ovapi ’diyiru indi.

14Azini eri nga amvu,emini pi o’du, amvu zabibuni pie, amvu mizeituni pie, adaru ’diyi dria ma eselia onyiru agapi ra ’diyi, eri nga ofe ati’ba erini ’diyi dri.

15Azini eri nga esele ori emini alu mudriniri pi ’du, amvu emini zabibuni ’diyi pie, nga yi fe ’ba azi ngapi eri dri jo erinia ’diyi pi dri ati’ba erini be.

16Azini eri nga ati’ba emini agupiru ’diyi o’du, ati’ba emini okuru ’diyi pie, ti emini onyiru agapi ra ’diyi pie, akanya emini pie, eri nga yi o’ba azi erini ngazu.

17Eri nga esele kabilo emini alu mudriniri o’du ra, azini emi nga ovu ati’ba erini.

18O’du ’dasi emi nga owu opi emini, emini pele emi ngulupi driri ma e’yosi; te o’du ndesi Yehova ngani emi eri ku.

19Te ’ba nde ’diyi ga Samueli ma o’duko eriko si; yi ’yo ra, Yo ama nga ovu opi be ama drilia,

20ama ma ovu ani suru azini dria ’diyile beni, ’dini opi amani ma li e’yo amani, azini ma fu ama drilia a’di ’dizu ama dri beni.

21Te Samueli eri e’yo ’ba nde ’diyini ’yoleri dria, eri nga e’yo ’diyi epoto Yehova ma bilia dika.

22Te Yehova ’yo Samueli ma tia, Mi co bile o’duko yini erizu, mi ’ba yi dri opi. Te Samueli nga ’yo ’ba Israelini ma tia, Emi dria alu alu ma mu aku eminia.

← Chapter 7 Jump to: Chapter 9 →