1 Samuel 26

Lugbara (E’yo Siza Alatararu Munguniri BIBLIA)

← Chapter 25 Jump to: Chapter 27 →

1Te ’ba Zifia ’diyi yi emu Saulo vu Gibea, yi ’yo ra, Daudi zini i oni Hakilani angu rokoru Yesimoni ma driliaria ku ya?

2Saulo nga di enga, si andra angu rokoru Zifiniria, ’ba opele Israelini eselia ’diyi be alifu na, muzu Daudini ndruzu angu rokoru Zifiniria.

3Saulo aso i ma hema oni Hakiia dria Yesimoni ma drilia geri tia. Daudini ovuria roko dria, eri ndre Sauloni emuria eri ma vutiasi roko dria,

4e’yo ’disi Daudi pe ’ba angu ma orile gapi ’diyi ma ti ra, ’dini eri ni adaru Saulo eca ’bo.

5Te Daudi enga ra, eri emu pari Sauloni i ma hema asozuria; azini Daudi mire pari Saulo pini yi lazu Abineri Neri mvi ’ba asikari ma dri cepiri beri indi; isu Saulo ai pari agaduaria, te asikari ongulumuru ’di yi yi ori eri ma kalaasi dria ci,

6Daudi ’yo Ahimeleki ’ba Hitini pi ma tia, Abisai Zeruiya mvi Yoabu adripi pi be, kini, A’dini nga si ma be Saulo vu pari yini orizuriani ya? Te Abisai ’yo ra, Ma nga si mi be ma’i.

7’Dini Daudi pi Abisai be yi emu di ’ba nde vu inisi; te mi ne, Saulo la i o’du kozui pari agaduaria, alu be sozaru nyakua eri ma drilia; azini Abineri pi ’ba azini ’diyi pie yi ola yi ageinia kurui ci.

8Abisai nga di ’yo Daudi ma tia, Mungu fe ari’bo mini mi dria andru; e’yo ’disi curu’do ma matu ’ba mi vu, mi ku ma ma ’di nga mani eri ajusi pale alu, ma ga kpe nyakua ka, ma ngani eri ’di pale iri ku.

9Te Daudi ’yo Abisai ma tia, Mi ma ja eri ma dri ku; te a’di eco i ma dri ejuzaru ’ba Yehovani odu osule driniari ma ruaa, ngazu ovuzu e’yo kokoru ’danini ya?

10Daudi ’yo, Ekile Yehovani ovule idri be rile, Yehovani nga eri ’dini; kani o’du erini drazuri nga eca ra; kani eri nga si dri ja a’dia yani,

11Yehova ma oga ma, ma ma ’ba ma dri ’ba Yehovani odu osule driniari ma ruaa ku; te ma zi mi tia, mi ’du aju eri ma dria ’diri, azini kerea yiniri be, ama mu.

12’Dini Daudi ’du aju pi Saulo ma drilia, kerea yiniri be; yi mu ra. ’Ba aluni ndreni ku, kani nini ku indi, azini ’ba aluni engani o’duarisi ku indi; te yi de dria o’dua, a’disiku o’du koza adikadiru engapi yehova vuri ’be yini.

13Daudi nga di mu kala azinirialeru, erini pa sozu oni ma dri mbiliria ’aa’dasi, angu yi ma eseliari ovu re tu;

14te Daudi oyu asikari nde ’diyi vu, azini Abineri Neri mvi vu, kini, Abineri, mi omvini e’yo ku ya? Abineri nga di e’yo omvi kini, Mi a’di’i ya e’yo oyupi opi vuri?

15Te Daudi ’yo Abineri ma tia, Mi ovuni ombauni ku ya? ’Ba ovupi mile Israeli ma eselia a’di ya? Ka’dini mi teni opi miniri ma agei ku a’disi ya? A’disiku ’ba azini alu emu te opi amboru miniri ma dri jazu ra.

16E’yo mini ’yele ’diri ovuni onyiru ku. Ekile Yehovani ovule idri berile, emi eco emini drani, a’disiku emi mbani ambo emini Yehovani odu osule driniari ma ta ku. Te emi ndre curu’do opi ma aju kani ngoa yani, azini kerea yini ovupi te eri driliari ngoa ya?

17Te Saulo ni Daudini o’dukosi ra, eri ’yo ra, ’Diri mi o’duko, ma mvi Daudi ya? Te Daudi ’yo ra, Eri o’duko mani, ambo mani, opi lao

18Te eri ’yo ra, Opi manini i ma ati’bo odro ’dini a’di e’yosi ya? Te ma ’ye a’dini ya? Kani e’yo onzi ma driari ovu ngoni ya?

19E’yo’disi curu’do ma matu ’ba mi vu, ambo mani opi maniri ma eri nga e’yo ati’bo iniri ma tia. Yehova ka mi enga ma dri aruzu, eri ma a’i edetani; te eri ka ovu anzi ’bani, yi ma ovu trizaru Yehova ma milia, a’disiku yi dro ma amve o’du ’dirisi, kini, ma ma ovu awita Yehovani feleri kokoru beni, kini, Mi mu azi ngazu Mungu azini’diyidri.

20E’yo’disi curu’do mi fe ari mani ma ’de nyakua pari Yehova be reria ku; te opi Israeliniri efu ogaliri ndruzu, ekile ’bani ope ndrule oni ruaarile.

21Saulo nga di ’yo ani, Ma eza ra; mi atri dri, ma mvi Daudi, ma ngani mi ’ye onzi dika ku, a’disiku idri mani ovu mi milia afa aje be amborurile o’du ’dorisi; mi ne, ma ’ye ’ba azazarule, ma ’ye onzi amboru ’tu.

22Te Daudi omvi e’yo, ’yo ra, Opi la, mi ne, ajuri ’di! Mi epe karilau alu ma ti emuzu eri jizu.

23Yehovani nga ’ba alu alu ofe onyi yini vusi, azini asi adaru yini vusi; yehova fe te mi ma dria andru ra ’bo, te ma eni ma dri ejuzu ’bazu ’ba Yehovani odu osule driniari ma ruaa ku.

24Azini mi ne, ekile te idri minini ovule afa aje nyapi turiru ma miliarile, ’dini idri mani ma ovu afa aje nyapi turiru Yehova ma miliarile, azini eri ma pa ma candi dria ma aliasi.

25Saulo nga di ’yo Daudi tia, Mi drile ma ovu baru, ma mvi Daudi! Mi nga e’yo amboru ’ye, azini adaru mi nga aga ra. ’Dini Daudi mu geri inia ra, azini Saulo mvi i ma paria.

← Chapter 25 Jump to: Chapter 27 →