1 Samuel 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Te mva Samueli nga azi ndra Yehova dri Eli ma milia. Te o’duko Yehovani erizaruri ovu ewu ’darisi e’yo amboru tu; afa ndreza efupi ’ba ma milia ecetaruri ovuni o’du dria ku.

2Te eri nga eca ewu nde ’dasi ’dini, Elini i laria i vile paria va, ewu nderisi eri ma mile e’do asa ’bo, econi di de angu ndrezaru ba ba ku;

3isu de inyuni tala Munguni nga ku, te Samueli la de i hekalu Yehovani alia, pari sanduku Mungunini adrizuria.

4Yehova nga Samuelini omve, te eri a’i kini, Ma ’do’i.

5Te eri nzu Eli vu, kini, Ma ’do’i, a’disiku mi omve ma mi’i. Te eri ’yo ra, Ma omveni mi ku; mi mu la va dika. Te eri mu ra, lazu va.

6Yehova omve eri dika, Samueli! Te Samueli enga ra, mu Eli vu, kini, ’Ma ’do’i, a’disiku mi omve ma mi’i. Te eri omvi e’yo kini, Ma omveni mi ku, ma mvi; mi mu la va dika.

7Te Samueli nini nga Yehovani ku, o’duko Yehovani efuni oku nga eri vu ku.

8Te Yehova nga Samuelini lomve dika pale na. ’Dini eri enga ra, mu Eli vu, kini, Ma ’do’i, a’disiku mi omve ma mi’i. Te Eli nga di va ra kini, Yehova omve mva nderini.

9E’yo ’disi Eli ’yo Samueli ma tia kini, Mi mu la va; eri nga ovu ’dini eri ka nga omve ra, mi a’i ’dini, Mi ’yo e’yo, Yehova, ati’bo miniri e’yo eri ’di. ’Dini Samueli mu i lazu va i ma paria,

10Te Yehova emu, eri so pa ra, eri omve ekile okorile, Samueli! Samueli! Te Samueli nga omvi kini, Mi ’yo e’yo, ati’bo miniri e’yo eri ’di.

11Te Yehova nga di ’yo Samueli ma tia kini, Mi ne, ma nga e’yo ’ye Israeli eselia, ’dini ’ba dria alu alu eripiri ma bileni nga ’ye yii.

12O’du ndesi ma nga e’yo ’ye Eli ma ruaa, e’yo dria mani ’yole ori’ba erini ma e’yosiri, engazu e’dozuria cazu asizuria.

13Te ma ’yo eri tia, ma nga ori’ba erini ma e’yo li ’dani ’dani, erini e’yo onzi nde nile rari ti, te anzi erini eji trita yi ngulupi ma driani, te eri a’dani e’yoni ku.

14E’yo ’disi ma so oyo ori’ba Elini vu kini, azi onzi ori’ba Elinirini ngani ovu wuzaru edetasi, kani afa fezasi ’dani ’dani ku.

15Te Samueli nga la va cazu o’bitisi; vutinia eri ozi jo Yehovani ma tile ra. Te Samueli ru e’yo ini ndrele ’diyi ecezu Eli dri.

16Te Eli nga Samuelini omve, ’yo kini, Ma mvi Samueli. Eri a’i ra kini, Ma ’do’i.

17Te eri ’yo kini, E’yo te Yehovani ’yole mi tiari a’di e’yoni ya? Ma matu ’ba mi vu, mi oci mani ku. Mungu ma ’ye mi vu ’dini, azini e’yo nde agapi rari indi, mi ka afa dria erini ’yole mi tia ’diyi ma e’yo aluri oci mani ra.

18Te Samueli nga e’yo dria olu eri tia, eri ocini e’yo azini eri dri aluni ku. Te eri ’yo ra, Eri Yehova’i, eri ma ’ye e’yo dria ovupi onyiru eri ma miliarile.

19Samueli zo ra, te Yehova ovu eri be, eri feni e’yo erini ’yoleri ma aluni ’dezu va ku.

20’Ba Israelini dria engazu Dania cazu Beeri-sebaa ’diyi yi ni Samueli so pa nabi Yehovaniriru ’bo.

21Yehova nga i e’da Siloa dika, te Yehova e’da i Samueli dri Siloa e’yo ’yoza Yehovanisi.

← Chapter 2 Jump to: Chapter 4 →