1 Samuel 31

Lugbara (E’yo Siza Alatararu Munguniri BIBLIA)

← Chapter 30 Jump to:

1Te ’ba filisitiaa ’diyi yi ’di a’di ’ba Israelini pie; te ’ba Israelini apa ’ba Filisitiaa ’diyi ma driliarisi ra, yi ofu yi, yi o’de va oni Giliboa ma dria.

2Te ’ba Filisitiaa ’diyi yi dro Saulo pi ma vuti okposi anzi erini be; te ’ba Filisitiaa ’diyi yi ofu Yonatani pi Abinadabu pie, Malikisua pie, yi anzi Sauloni ’diyi.

3Azini a’di eca Saulo ma ruaa onzi, azini ’ba ’ye gbipi ’diyi ca eri vu ra; azini ’ba ’ye gbipi ’diyi gbi eri onzi tu.

4Saulo nga di ’yo ’ba afa erini ombani ’diyi ojipiri ma tia, Mi enze sei mini, mi aso ma ale ani, ’ba agele liza a’ipi ku,’diyi kazu emuzu ma sozu ma o’dazu ku. Te ’ba afa erini ombani ’diyi ojipiri ga si; erini ovule uri be turisi. E’yo ’disi Saulo ’du di sei iniri, ’be i drinia ceni,

5Azini ’ba afa erini ombani ’diyi ojipiri ka ndre Saulo dra ’bo, eri ’be i sei i vileri ma dria ’dinile indi, dra eri be.

6’Dini Saulo pi odra ra, anzi erini na ’diyi pie, ’ba afa erini ombani ’diyi ojipiri pie, ’ba dria erini ’diyi pie, o’du alu ’dasi tualu.

7Te ’ba Israelini ovupi e’bu ma kala azinia ’diyi, azini ’ba ovupi Yoridania ’aa’dasi ’diyi pie, yi ka ndre ’ba Israelini apa ’bo, azini Saulo pi anzipi pie odra ’bo, yi ku aku yini, apa ra; azini ’ba Filisitiaa ’diyi yi emu adrizu aku ’diyi ma aliani.

8Te eri nga eca drusi ’dini, ’ba Filisitiaa ’diyi yi ka emu ’ba yini ofule ’diyi ma afa opazu, yi isu Saulo pi anzi erini na ’diyi be, o’de oni Giliboa ma dria.

9Yi li eri ma dri ra, otru afa sule ayaru ombani erini ’diyi ra, yi pe tini e’yo ojizu angu ’ba Filisitiaa ’diyiniria kuru, e’yoni ojizu adrou yini ma wura ’diyi ma jo vusi, azini ’ba vusi.

10Te yi ’ba afa sule ayaru erini ombani ’diyi Asitaroti vile joa; azini yi ombe eri ma avu abi Beti-saniari ma ruaa.

11Te ’ba adripi Yabesi-gileadia ’diyi ka e’yo ’ba Filisitiaa ’diyini ’yele Saulo ma ruaa ’diyi eri ra,

12’ba dria asi teza be ’diyi yi enga ra, yi mu lini be rra, yi o’du Saulo pi ma ave, anzi erini ’diyi ma avu pie, engazu abi Beti-sanini ma ruaasi; yi emu Yabesia, eve yi ’daa,

13Yi o’du yi ma fala ra, sa yi pati letia Yabesia, azini yi ’da nyaka o’du aziri.

← Chapter 30 Jump to: