1 Samuel 30

Lugbara (E’yo Siza Alatararu Munguniri BIBLIA)

← Chapter 29 Jump to: Chapter 31 →

1Te eri nga eca ’dini, Daudi pi ’ba erini ’diyi pie yi ka eca Zikilagia o’du narisi ’bo, isu ’ba Amalekia ’diyi yi mu omba ’ba angu uruleruria, azini Zikilagi be. Isu yi aga Zikilagi ’bo, eve eri acisi,

2azini yi o’i de oku azini ’ba dria alenia ’diyi, ’ba were ’ba ’wara pie iri tro; yi funi yi aluni ku, te obi yi, mu ra.

3Te Daudi piyi ’ba erini ’diyi pie yi ka eca akua, mi ne, ve eri acisi ’bo, azini oku yini anzi yini pie, ezopi yini pie dria ovu de obizaru ati’baru ’bo.

4Daudi pi ’ba erini ’diyi pie yi nga di yi ma o’duko enga uru, yi wu ra, kpere okpo awu wuzurini i deria.

5Isu de oku Daudini iri, Ahinoamu Yezireeli zaaruri pi Abigaili ndra Nabali ’ba Karimeliari ma okururi be, obi yi ati’baru indi.

6Te Daudi ovu candisi amboru tu; a’disiku ’ba nde ’diyi ’yo yi nga eri o’be onisi, a’disiku bi nde ’diyi dria ovu candisi asi drazaru be, ’ba dria alu alu anzi yini piyi ma e’yosi ezopi be. Te Daudi ’ba i okporu Yehova Mungu eriniri ma alia.

7Azini Daudi ’yo Abiatari Ahimeleki mvi atalau edeta edepiri ma tia, Ma matu ’ba mi vu, mi eji nga mi koti alinari ’di. Te Abiatari eji i koti alinari Daudi dri ra.

8Te Daudi zi e’yo Yehova ma tia kini, Onyiru mani asikari ongulumuru ’diyi ma vuti drozu ra ya? Ma nga ca yi vu ra ya? Te eri omvi e’yo eri ma tia, Mi dro yi ma vuti; a’disiku mi nga ca yi vu adaru ra, azini mi nga afa dria isu ecekokoru.

9’Dini Daudi mu ra, eri’i ’ba erini ovupi eri be turu azia ’diyi be, yi eca yi Besoria, pari ’ba nde yini kule vile ’diyini rizuria.

10Te Daudi mu ’dani, eri’i ’ba turu su ’diyi pie; a’disiku ’ba turu iri ovupi okpo kokoru, ’dini yi econi yi Besorini agazu ku ’diyi, yi awu vile.

11Te yi isu ’ba Misirini alu asea, yi eji eri Daudi vu; yi fe eri dri enya, eri nya ra, azini yi fe eri dri yi mvuza,

12yi fe vini eri dri elio efi ekpazaru ngulu ma ali, azini pati efi a’wi ngulu iri. Eri ka nya ’bo, orindi erini emvi eri ruaa ’bo; a’disiku eri nyani de enya ku kani mvuni yi ku, paleko na, etusi inisi indi.

13Te Daudi ’yo tinia, Mi a’di ma ’ba ya? Mi enga ngoa ya? Te eri ’yo ra, Ma karilau Misiria, ati’bo ’ba Amalekiariniri; te ambo maniri ku ma, a’disiku o’du aga curu’do na ’bo ma ndra de azoru.

14Ama mu de omba ’bazu kala uruleru ’ba Keretia ’diyiniria, azini angu ovupi Yudaniria, azini kala Kalebuni uruleruria; azini ama eve Zikilagini acisi.

15Te Daudi zi tinia, Mi nga ma ji andra asikari ongulumu ’diyi vu ra ya? Te eri ’yo ra, Mi so ma dri oyo Mungu rusi ’dini, kini, mi ngani ma fu ku, kani mi ngani ma fe ambo maniri dri dika ku, te ka’dini ma nga mi ji andra asikari ongulumu ’diyi vu ra.

16Azini eri ka eri eji andra ’dale ’bo, mi ne, yi ere de yi angua dria, yini nyaria azini mvuria, azini ongo turia, a’disiku afa yini opale ombasi ambo yuangu ’ba Filisitiaa ’diyiniria azini angu Yudania ’diyi ma e’yosi.

17Te Daudi ofu yi engazu omuneretisi kpere dru ondresi; te ’ba aluni yi eselia pani i ku, pe lu karile turu su tupi ngamia dria apapi ’diyi.

18Daudi o’du dika afa dria ’ba Amalekia ’diyini opale ’diyi ra; azini Daudi opa i nia oku iri ’diyi ra.

19Te afa azini yini ovuzu yi pie yoni yo, kani wereni, kani amboruni, kani agupianzi, kani ezoanzi, kani afa yini opale ombaa ’diyi, kani afa azini yini ’dule yi drisi ’diyi ma aluni yo; Daudi omvi yi dria vile li.

20Azini Daudi o’du kabilo o’biru ’diyi, ti o’biru ’diyi pie dria; yi dro yi anyapa azini ’diyi drilia, kini, ’Diyi afa Daudini opale ombaa ’diyi.

21Te Daudi emu ’ba turu iri ’diyi vu, yi’i ndra ovupi okpo kokoru ecopi Daudi ma vuti bipi ku ’diyi, yi’i ndra yini kule awupi e’bu Besoria ’diyi; yi fu mu dri fuzu Daudi pi be, ’ba ovupi eri be ’diyi be; azini Daudi ka eca inyia ’ba nde ’diyi vu ’bo, eri zi yi ci ci.

22’Ba onzi, azini ’ba asi ngiri be ’ba mupi Daudi be ’diyi ma eselia ’diyi dria nga di e’yo omvi kini, A’disiku yini mule ama be kurisi, ama ngani yi dri afa aluni afa amani opale vile ’diyi ma azi fe yi dri ku, pe lu ’ba alu alu dri oku erini anzi pie, eri ma ji yi ’dale, yi ma ko dri muzu.

23Te Daudi nga di ’yo ra kini, Emi ngani ’ye ’dini ku, ma adripi, afa Yehovani fele ama dri ’diyisi; eri’i ama ta mbapi azini asikari ongulumu nde emupi ombaa ama be ’diyi fepi ama driari.

24Te a’dini nga bile co emi vu e’yo ’ disini ya? Te ekile esele ’ba sipi ombaarinirile, ’dini ’ba awupi vile afa agei tepiri nga esele ini isu trotro; yi nga isu dria trotro.

25Te eri ovu ’dini engazu o’du ’dasi kpere drile, eri ’ba e’yo nde azitaru azini e’yo azileriru Israeli dri kpere andru.

26Daudi ka eca Zikilagia ’bo, eri pe afa erini opale ’diyi ma esele azini ’ba ’wara Yudani ’diyi vu, adaru i ma agyi vu, kini, Emi ne, feta emi dri ’di afa ’bani opale ari’ba Yehovani dri ’diyi ma eselia;

27’ba adripi Betelia ’diyi pi dri, ’ba adripi Ramoti kala uruleruria ’diyi pie, ’ba adripi Yatiria ’diyi pie,

28azini ’ba adripi Aroeria ’diyi pie, ’ba adripi Sifimotia ’diyi pie, ’ba adripi Esitemoa ’diyi pie,

29azini ’ba adrip Rakalia ’diyi pie, ’ba adripi aku ’ba Yerameelini ’diyi ma alia ’diyi pie, ’ba adripi aku ’ba Kenini ’diyi ma alia ’diyi pie,

30azini ’ba adripi Horimaa ’diyi pie, ’ba adripi Borasania ’diyi pie, ’ba adripi Atakia ’diyi pie,

31azini ’ba adripi Hebironia ’diyi pie, azini ’ba pari Daudi pini adrizu muzu alenia ’ba erini ’diyi pie ’diyi vu dria.

← Chapter 29 Jump to: Chapter 31 →