1 Samuel 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Nahasi ’ba Amoniari etu Yabesi-gileadini acezuombasi; te ’ba dria Yabesia ’diyi ’yo Nahasi ma tia kini, Mi ’ye aziza ama be, ama nga azi nga mi dri beni.

2Te Nahasi ’ba Amoniari omvi e’yo yi tia kini, Ma nga aziza azi emi be kiri ma ka emi mileefi dri ndiari ope dria, ’dini drinza fezu Israeli dria dri beni.

3Te ’ba ’wara Yabesia ’diyi ’yo eri ma tia kini, Mi fe nga ama dri o’du aziri, ’dini ama ma pe ’ba ti angu Israelini ma eselia dria. ’Ba aluni ka ovu ama opazu yo, ka’dini ama nga efu mi vu ndo,

4’Ba tini pele ’diyi ca Gibea angu Saulonia, yi olu e’yo ’diyi ’ba ma bilia; ’ba dria yi owu o’duko urusi.

5Te mi ne, Saulo emvi engazu amvuarisi ti vutisi; te Saulo ’yo ra kini, A’di ’ye ’ba ’doyi, yini wuzu ’donini ya? Te yi olu eri dri e’yo ’ba Yabesia ’diyini ’yole ’diyi.

6Te Orindi Munguni esi Saulo ma dria okporu erini e’yo ’diyi eriria, te adra enga asinia okporu.

7Eri ’du ti kulumbu alu sia ’diyi, eri oli aleni, eri ofe yi ’ba tini pele ’diyi dri jizu angu Israelini ma eselia dria, kini, Agu emupi Saulo pi ma vutia azini Samueli be kuri, yi nga ’ye ti erinisi ’dini! Te uri Yehovani bi ’ba nde ’diyi ra, yi efu dria ekile ’ba alule.

8Eri nga yi ma kalafe la Bezekia, isu ’anzi Israelini ma kalafe ovu alifu turu na, azini ’ba Yudani ’diyi ovu alifu kali na.

9Te yi ’yo ojio ecapi ’diyi ma tia kini, Emi ’yo ’dini ’ba Yabesi-gileadia ’diyi ma tia kini, Dru, sawa etuni ’bazu drizurisi, emi nga pata isu. Ojio ’diyi emu ra, yi olu e’yo ’ba Yabesia ’diyi ma tia, yi ovu ’ani ayikosi tu.

10E’yo ’disi ’ba Yabesia ’diyi ’yo kini, Dru ama nga efu emi vu ra, azini emi nga e’yo dria ovupi emi milia onyiruri ’ye ama vu’i.

11Te dru ’dini, Saulo awa ’ba ongulumuru esele be na; yi nga efi pari yini hema asozuri ma eselia etu angu agei tezu o’bitiniria, yi ofu ’ba Amonia ’diyi cazu kpere etuni drizuria; azini eri riga eca ’dini, ’ba acepi ’diyi ovu erezaru dria, ’dini ’ba acepi iri iri tualuni yo.

12Azini ’ba nde ’diyi ’yo Samueli ma tia kini, ’Ba ’yopi ndra kini, Sauloni nga opi nya ama drilia ra ya ’diyi a’di pi ya? Ma eji ’ba nde ’diyi, ’dini ama ma ofu yi beni,

13Te Saulo ’yo ra, Yi ngani ’ba aluni fu andru ku, a’disiku Yehova ’ye andru pata Israeli eselia ra.

14Samueli nga di ’yo ’ba nde ’diyi ma tia, Emi emu, ama mu Giligalia opi nyaza nde edrezu dika ’daa.

15’Dini ’ba dria yi nga mu Giligalia ra, te ’dale yi ’ba Sauloni opiru Yehova drilia. Te yi ede vini ’daa edeta asi anzuruni ’diyi Yehova ma drilia, azini ’dale Saulo pi ’ba Israelini be yi ovu ayikosi tu.

← Chapter 10 Jump to: Chapter 12 →