1 Samuel 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1Te sanduku Yehovani adri angu ’ba Filisitiaa ’diyiniria mba aziri.

2Te ’ba Filisitiaa ’diyi yi omve atalau edeta edepi ’diyi ’ba andri ondripi ’diyi be kini, Ama nga ’ye sanduku Yehovanisi ngoni ya? Emi ece ama dri ama nga sanduku nderi omvi pariniria afa ngoni be ya?

3Te yi ’yo ra kini, Emi ka sanduku Mungu Israeliniri ma ti pe ’dale, emi pe tini pirini ku, te emi ece ku afa feza edetaru ezata wuzuri fezu eri dri. Te emi nga ati ra, azini emi nga dri erini kuni emi ku a’disi yari ni ra.

4Yi nga ’yo ani, Afa feza edetaru ezata wuzu amani ngale fele eri driri nga ovu a’duni ya? Yi omvi e’yo ra, kini, Wura apipini edezaru melesi towi, azini wura edroni edezaru melesi towi, kalafe opi Filisitiaa ’diyiniri vusi; a’disiku dra maturu alu bi mira emi dria opi emini be.

5E’yo ’disi emi ma ede wura apipi eminini, azini wura edro angu ezapi ’diyini, azini emi ma fe diza Mungu Israeliniri dri; kani eri nga ani dri nzizaru erini emi ma dria, adrou emini pie, angu emini pieri nze were.

6Ka’dini emi ’ba di emi asi mbazaru ekile ’ba Misiria ’diyi pini ’bale ndra Farau pierile a’di e’yosi ya? Erini e’yo osutaru ’yeria yi ma eselia ’boria yi kuni ndra ’ba nde ’diyi muzu ku ya, azini yi muni ndra ku ya?

7E’yo ’disi curu’do emi ma ’du gari o’diruri ede, azini tiandri iri lesu be nga ’bani kulumbu ’izu yi ma ombea ku ’diyi, emi o’i yi gari ma ruaa, emi omvi kojaanzi yini akua.

8Emi ’du sanduku Yehovaniri, emi ’ba eri gari ’di ma alia, emi o’ba afa meleru emini omvile eri dri edeta ezata wuzuriru ’diyi sanduku werearu ma alia kalania. Te emi pe tini, eri ma mu.

9Te emi ma ne; eri ka mu uru geri muzu angu eri ngulupini Beti-semesiarisi, de ’di eri fe ama dri candi amboru ’dorini; te ka ’dini ku, de ’di ama nga ni afa ama ofupiri ovuni dri eriniri’i ku, te eri kiri drileonzi ama ’yepi tokori.

10Te ’ba nde yi ’ye ’dini, yi ’du tiandri iri nde lesu be ’diyi, yi o’i yi gari ruaa, omi kojaanzi licoa.

11Te yi ’ba sanduku Yehovaniri pi gari nderi ma alia, sanduku edro melesi ’diyi pini ovuzu alenia wura apipi yinini ’di yi beri be indi.

12Te ti nde ’diyi ’du geri muzu kilili Betisemesiari’i, yi mu gbokosi, awu be yini muria, yi ojani yi kalaa dri ndia kani dri ejia ku, azini opi Filisitiaa ’diyi mu yi vutisi kpere Beti-semesi ma lokiria.

13Isu de ’ba Betisemesia ’diyi yi ovu nganu loria e’bu alia; yi enga mile yini uru, yi ndre sanduku nde ra, yi ovu ayikosi yini eri ndrelerisi.

14Te gari nderi emu pa so Yosua ’ba Beti-semesiari vile ngaa, eri so pa ’daa pari oni amboruni ovuzuria; yi osi pati gariniri ra, yi fe tiandri nde ’diyi edeta vele Yehova dririru.

15’Dini ’ba’i Levini e’du sanduku Yehovaniri pi ’ba va, sanduku afa meleni ovuzu alenia ovupi eri beri be, o’ba yi oni amboru nderi dria; azini ’ba Betisemesia ’diyi fe edeta vezaru afa feza edetaru ’diyi pie Yehova dri o’du nde’dasi.

16Te opi towi Filisitiaa ’diyi ka e’yo nderi ndre ’bo, yi mvi Ekironia etu nde ’dasi.

17Apipi edele melesi ’ba Filisitiaa ’diyini omvile edeta ezata wuzuriru Yehova dri ’diyi ovu ’diyi: alu Asidodi dri, alu Gaza dri, alu Asikeloni dri, alu Gatu dri, alu Ekironi dri;

18azini edro melesi ’diyi ovu aku dria ’ba Filisitiaa opi towi nde ’diyini ’diyi ma kalafe vusi, yi aku abi kaliru okporu be ’diyi pi aku amveleru ’diyi be, ecazu oni amboru yini sanduku Yehovani ’bazu va driniari vu, oni nde ovu ecazu kpere andru indi Yosua ’ba Betisemesiari vile ngaa.

19’Ba Beti-semesia ’diyi ma eselia, eri ofu ’ba kali aziri yini sanduku Yehovani ma ale nelerisi; te ’ba yi owu candi be Yehovani ’ba ofule amborurisi.

20Te ’ba Betisemesia ’diyi ’yo, A’di eco pa sozaru Yehova, Mungu alatararu ’dori driliani ya? Azini eri nga tu uru engazu ama vurisi a’di vu ya?

21Ka’dini yi pe ’ba ti ’ba adripi Kiriati-yearimua ’diyi vu kini, ’Ba Filisitiaa ’diyi eji sanduku Yehovani dika ’do. Emi esi va, eri ’duzu jizu emi vu uru.

← Chapter 5 Jump to: Chapter 7 →