1 Chronicles 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Oˇ ve hkʼaw‸ nawˉ, Iˉsaˍreˍlaˆ chaw ceuˬhkʼa peu-eˬ, Heˍbronˍ venˇ hkʼaw Daˍviˆ geh hpawnˬ laˬ leh kʼoˆ ve, Ngaˬ hui lehˬ, nawˬ ve mvuhˇmiˬ yaˇ teˇ hpaˍ hpeh‸ ve yoˬ.

2Ponˬ laˬve awˬ yanˇ hkʼaw Sawˉlu‸ jawˇmawˇ te chehˇ htaˇ, nawˬ lehˬ Iˉsaˍreˍlaˆ chaw hui hta‸ shiˍ leh ma‸ bawˆ kuiˬ lo kʼai ve yoˬ. Gʼuiˬsha nawˬ hta‸ leuˆ yuˬ leh yawˇ ve chaw teˇ hpaˍ hta‸ uˉ peunˍ tuˬ, nawˬ hta‸ kʼoˆ piˇ taˍ peuˬ ve yoˬ, teh‸ kʼoˆ ve yoˬ.

3Hkʼe te leh, Iˉsaˍreˍlaˆ chaw awˬ hoˉ awˬ naˬ hkʼa peu-eˬ, jawˇmawˇ Daˍviˆ geh Heˍbronˍ venˇ lo hpawnˬ laˬ ve yoˬ. Yawˇ yawˇ hui hta‸ ka ti‸ shaˉ caˆ te da‸ leh, yawˇ hui yawˇ hta‸ naˍ manˇ pfuhˍ piˇ ve yoˬ. Hkʼe te leh, yawˇ Iˉsaˍreˍlaˆ chaw hui ve jawˇmawˇ hpeh‸ la ve yoˬ.

4Jawˇmawˇ Daˍviˆ leh Iˉsaˍreˍlaˆ chaw hkʼa peu-eˬ, Yeˍruˆsaˍlehnˍ venˇ hta‸ ca bawˆ yuˬ tuˬ tawˆ kʼai ve yoˬ. Oˇ ve teˇ yanˇ htaˇ, venˇ oˇ ve hta‸ Yeˍbuˆ teh‸ meh taˍ leh, Yeˍbuˇsiˆ chaw chehˇ taˍ ve yoˬ.

5Yeˍbuˇsiˆ chaw hui lehˬ, yawˇ hui ve venˇ hta‸ bawˆ yuˬ maˇ gʼa taˬ ve awˬ lawn Daˍviˆ hta‸ kʼoˆ piˇ ve yoˬ. Ya‸ hkʼaˇ, Daˍviˆ lehˬ yawˇ hui ve Ziˉonˍ ta‸ yehˬ hta‸ bawˆ yuˬ leh, Daˍviˆ ve venˇ teh‸ kʼaw‸ meh piˇ ve yoˬ.

6Oˇ htaˇ Daˍviˆ lehˬ, Yeˍbuˇsiˆ chaw hui hta‸ awˉ lawˉ peuˇ tiˇ pehˍ gʼa ve chaw hta‸ ngaˬ ve ma‸ poˍ lonˉ te tcuh laˇ tuˬ yoˬ, teh‸ yawˇ ve ma‸ yaˇ teˇ hpaˍ hta‸ kʼoˆ piˇ ve yoˬ. Oˇ htaˇ Zeˍruˇaˍ ve yaˇ Yaˍbaˆ venˇ hkʼaw ca lo‸ bawˆ leh, ma‸ poˍ lonˉ hpeh‸ la ve yoˬ.

7Daˍviˆ lehˬ, ta‸ yehˬ oˇ ve hkʼaw ca lo‸ chehˇ taˍ ve pa taw, Daˍviˆ ve venˇ teh‸ shu kʼoˆ ve yoˬ.

8Yawˇ lehˬ, venˇ oˇ ve hta‸ kʼaw‸ gu te leh, maˇ peuˬ sheˍ ve teˇ hpaˍ hta‸ Yaˍbaˆ kʼaw‸ caˉ gu te ve yoˬ.

9Gʼuiˬsha yawˇ geh chehˇ taˍ ve pa taw, Daˍviˆ shaˬ te shaˬ awˬ gʼaˇ uiˍ la ve yoˬ.

10Chaw chi teˇ hpaˍ lehˬ, Daˍviˆ ve awˬ meh bvuhˬ jaˇ ve ma‸ yaˇ teˇ hpaˍ hpeh‸ ve yoˬ. Yawˇ hui lehˬ, awˬ nu ve Iˉsaˍreˍlaˆ chaw hui geh teˇ geh, Daˍviˆ hta‸ jawˇmawˇ hpeh‸ la tuˬ ga piˇ leh, yawˇ ve mvuhˇmiˬ hta‸ awˬ gʼaˇ uiˍ la piˇ ve yoˬ.

11Awˉ lawˉ peuˇ ve teˇ gʼaˇ lehˬ, Haˍhkiˍmonˍ awˬ ceuˬ awˬ hkʼaˇ Yaˍshawˇbanˍ hpeh‸ ve yoˬ. Yawˇ lehˬ cheuˬ jaˇ ve ma‸ yaˇ shehˆ gʼaˇ awˬ hkʼaw lo awˬ hoˉ hpeh‸ ve yoˬ. Ma‸ bawˆ kuiˬ teˇ kaˬ lo yawˇ lehˬ gehˇ teˇ maˬ yuˬ taˍ leh canˇ paˍ 300 gʼaˇ hta‸ tiˇ pehˍ piˇ ve yoˬ.

12Cheuˬ jaˇ ve ma‸ yaˇ nyiˇ gʼaˇ teˇ gʼaˇ lehˬ, Aˍhawˇniˆ awˬ ceuˬ awˬ hkʼaˇ Doˉdoˍ ve yaˇ Eˇlaˍsaˍ hpeh‸ ve yoˬ.

13Yawˇ lehˬ Paˍdaˍmenˍ teh‸ kʼoˆ ve chehˇ kuiˬ lo Hpiˇliˇtiˆ chaw hui hta‸ bawˆ da‸ ve yoˬ. Yawˇ lehˬ, ti mi hkʼaw chehˇ taˍ ve yoˬ. Iˉsaˍreˍlaˆ chaw teˇ hpaˍ kawˆ jaˇ leh gʼuiˇ hpaw-e ve yoˬ.

14Oˇ htaˇ, yawˇ leh yawˇ ve awˬ chawˇ teˇ hpaˍ ti mi oˇ ve hkʼaw huˉ taˍ leh, Hpiˇliˇtiˆ chaw hui hta‸ hkanˍ bawˆ ve yoˬ. Hkʼe te leh Gʼuiˬsha yawˇ hta‸ gʼaˇ piˇ lawˬ ve yoˬ.

15Teˇ nyi htaˇ, cheuˬ jaˇ ve ma‸ yaˇ 30 gʼaˇ awˬ hkʼaw lo ve awˬ hoˉ oˇ ve shehˆ gʼaˇ lehˬ, Daˍviˆ hpaw va‸ chehˇ taˍ kuiˬ Aˍduˆlanˍ haˉ kʼoˍ cawˬ kuiˬ lo kʼai ve yoˬ. Hpiˇliˇtiˆ chaw te moˍ lehˬ, Reˍhenˍ miˬ tawˬ kuiˬ lo deh chehˇ taˍ ve yoˬ.

16Awˬ yanˇ oˇ ve hkʼaw, Daˍviˆ lehˬ hkʼa deh‸ caw kʼo taˍ ve hkʼaw pui ehˉ teˇ maˬ awˬ hkʼoˆ lo chehˇ taˍ ve yoˬ. Hpiˇliˇtiˆ chaw teˇ moˍ lehˬ, Behˍlehˍhehnˍ venˇ taˍ meu‸ hpe‸ lo deh chehˇ taˍ ve yoˬ.

17Oˇ htaˇ Daˍviˆ nyi ma haˍ jaˇ leh, Behˍlehˍhehnˍ venˇ taˍ meu‸ hpe‸ lo cawˬ ve nanˬ bawˍ hkʼaw ve iˉ kaˆ a shu ngaˬ hta‸ ca nyiˉ taw laˇ tuˬ le, teh‸ kʼoˆ ve yoˬ.

18Cheuˬ jaˇ ve ma‸ yaˇ oˇ ve shehˆ gʼaˇ lehˬ, Hpiˇliˇtiˆ chaw hui deh chehˇ taˍ kuiˬ lo hpanˍ kʼai leh, nanˬ bawˍ oˇ ve hkʼaw cawˬ ve iˉ kaˆ hta‸ nyiˉ veu laˇ peuˬ hkʼaw‸ nawˉ Daˍviˆ hta‸ taw piˇ ve yoˬ. Ya‸ hkʼaˇ, Daˍviˆ lehˬ iˉ kaˆ oˇ ve hta‸ maˇ dawˬ. Gʼuiˬsha hta‸ tanˇ piˇ ve hkʼaw ngeuˍ baˬ ve yoˬ.

19Peuˬ leh yawˇ kʼoˆ ve, Ngaˬ chi hta‸ dawˬ maˇ hpeh‸. Ngaˬ iˉ kaˆ chi hta‸ dawˬ ve kʼo, iˉ kaˆ chi hta‸ a sha‸ tanˇ leh ca hkʼo ve chaw chi teˇ hpaˍ ve awˬ suhˍ hta‸ dawˬ ve hkʼe yoˬ, teh‸ kʼoˆ ve yoˬ. Hkʼe te leh, yawˇ iˉ kaˆ oˇ ve hta‸ maˇ dawˬ. Awˬ lawn chi teˇ hpaˍ lehˬ, cheuˬ jaˇ ve ma‸ yaˇ oˇ ve shehˆ gʼaˇ te taˍ peuˬ ve kanˉ hpeh‸ ve yoˬ.

20Zeˍruˆyaˍ ve yaˇ Yaˍbaˆ awˬ nyi paˍ Aˍbiˆshehˇ leh, awˬ meh bvuhˬ jaˇ ve ma‸ yaˇ 30 gʼaˇ awˬ hkʼoˆ awˬ hoˉ hpeh‸ ve yoˬ. Yawˇ lehˬ, ma‸ bawˆ kuiˬ lo yawˇ ve gehˇ hta‸ yuˬ leh canˇ paˍ 300 gʼaˇ hta‸ tiˇ pehˍ piˇ ve yoˬ. Hkʼe te leh yawˇ lehˬ cheuˬ jaˇ ve ma‸ yaˇ 30 gʼaˇ awˬ hkʼaw lo shu a‸ kehˉ awˬ meh bvuhˬ jaˇ ve chaw hpeh‸ ve yoˬ.

21Yawˇ lehˬ, cheuˬ jaˇ ve ma‸ yaˇ 30 gʼaˇ hkʼaw shu a‸ kehˉ awˬ meh bvuhˬ jaˇ ve chaw hpeh‸ leh, yawˇ hui ve awˬ hoˉ hpeh‸ ve yoˬ. Ya‸ hkʼaˇ, yawˇ lehˬ cheuˬ jaˇ ve ma‸ yaˇ oˇ ve shehˆ gʼaˇ hkʼe taw awˬ meh maˇ bvuhˬ sheˍ.

22Keˍzeˍlaˆ venˇ hkʼaw chehˇ ve Yawˇyaˍdaˆ ve yaˇ Beˍnaˍyaˆ htawˇ, awˬ meh bvuhˬ jaˇ ve ma‸ yaˇ teˇ gʼaˇ hpeh‸ ve yoˬ. Yawˇ lehˬ awˬ meh bvuhˬ jaˇ ve Mawˇbaˆ chaw hui ve ma‸ poˍ lonˉ nyiˇ gʼaˇ hta‸ tiˇ pehˍ piˇ ve yoˬ. Moˬ hoˆ jaˇ ve awˬ nyi teˇ nyi htaˇ, yawˇ lehˬ haˉ kʼoˍ hkʼaw lo‸-e leh, laˇ caˬ shiˉ teˇ hkeh hta‸ tiˇ pehˍ piˇ ve yoˬ.

23Chi hkʼoˆ ka‸, yawˇ lehˬ ngaˇ shaw‸ mvuh leh gehˇ taˆ taˍ ve Eˇjiˇtu‸ chaw lonˉ teˇ gʼaˇ hta‸ htawˇ tiˇ pehˍ piˇ ve yoˬ. Yawˇ geh suhˆ taˬ teˇ maˬ tiˉ cawˬ ve yoˬ. Ya‸ hkʼaˇ, yawˇ lehˬ Eˇjiˇtu‸ chaw oˇ ve hpaˇ ve gehˇ hta‸ lu yuˬ leh, yawˇ hta‸ kʼaw‸ juˆ pehˍ piˇ ve yoˬ.

24Chi lehˬ, Beˍnaˍyaˆ te taˍ peuˬ ve da‸ ve kanˉ teˇ hpaˍ hpeh‸ ve yoˬ.

25Yawˇ htawˇ ka‸ cheuˬ jaˇ ve ma‸ yaˇ 30 gʼaˇ hkʼaw, awˬ meh bvuh jaˇ ve ma‸ yaˇ teˇ gʼaˇ hpeh‸ ve yoˬ. Ya‸ hkʼaˇ, yawˇ lehˬ cheuˬ jaˇ ve ma‸ yaˇ oˇ ve shehˆ gʼaˇ hkʼe taw awˬ meh maˇ bvuhˬ sheˍ. Daˍviˆ lehˬ, yawˇ hta‸ yawˇ ve a sha‸ shaw shehˍ hpaˇ teˇ hpaˍ awˬ hkʼoˆ awˬ hoˉ te tcuh taˍ ve yoˬ.

← Chapter 10 Jump to: Chapter 12 →