1 Chronicles 15

Lahu Bible Edited © Thailand Bible Society and Bible Society of Myanmar, 2010, 2020.

← Chapter 14 Jump to: Chapter 16 →

1Daˍviˆ lehˬ, Daˍviˆ ve venˇ hkʼaw yawˇ chehˇ tuˬ ve hawˉ yehˬ teˇmaˬ te ve yoˬ. Yawˇ lehˬ, Gʼuiˬsha ve ka ti‸ shaˉ caˆ ta kʼoˍ teh taˍ kuiˬ aˉ po kʼo teˇ maˬ hta‸ htawˇ te taˍ ve yoˬ.

2Oˇ ve hkʼaw‸ nawˉ yawˇ kʼoˆ ve, Leˍviˆ chaw teˇ hpaˍ ceh tiˉ ka ti‸ shaˉ caˆ ta kʼoˍ hta‸ gʼa taˆ ve yoˬ. Awˬ lawn kʼo, chi hkʼe te tuˬ Leˍviˆ chaw hui hta‸ Gʼuiˬsha leuˆ yuˬ taˍ ve yoˬ, teh‸ kʼoˆ ve yoˬ.

3Hkʼe te leh, Daˍviˆ lehˬ yawˇ te taˍ ve aˉ po kʼo hkʼaw ka ti‸ shaˉ caˆ ta kʼoˍ hta‸ ca yuˬ keu tuˬ, Iˉsaˍreˍlaˆ chaw hkʼa peu-eˬ ve hta‸ Yeˍruˆsaˍlehnˍ venˇ lo kuˬ hpawnˬ ve yoˬ.

4Oˇ ve hkʼaw‸ nawˉ, yawˇ lehˬ Aˍronˍ awˬ ceuˬ awˬ hkʼaˇ teˇ hpaˍ leh Leˍviˆ chaw hui hta‸ ca kuˬ tcuh ve yoˬ.

5Leˍviˆ chaw Kawˇhaˆ awˬ ceuˬ awˬ hkʼaˇ Uˇreˍlaˆ lehˬ yawˇ ve chaw 120 gʼaˇ hta‸ shiˍ laˬ ve yoˬ.

6Meˍraˍriˆ awˬ ceuˬ awˬ hkʼaˇ Aˍsaˍyaˆ lehˬ, yawˇ ve chaw 220 gʼaˇ,

7Geˍraˍsonˍ awˬ ceuˬ awˬ hkʼaˇ Yawˇlaˆ lehˬ, yawˇ ve chaw 130 gʼaˇ,

8Eˇliˆzaˍhpanˍ awˬ ceuˬ awˬ hkʼaˇ Shaˍmaˍyaˆ lehˬ yawˇ ve chaw 200 gʼaˇ,

9Heˍronˍ awˬ ceuˬ awˬ hkʼaˇ Eˇleˍlaˆ lehˬ yawˇ ve chaw 80 gʼaˇ,

10Awˇzaˍlaˆ awˬ ceuˬ awˬ hkʼaˇ Aˍmiˆnaˍdaˆ lehˬ yawˇ ve chaw 112 gʼaˇ hta‸ shiˍ laˬ ve yoˬ.

11Oˇ htaˇ, Daˍviˆ lehˬ paw hkuˇ lonˉ Zaˍdoˆ, Aˍbyaˍtaˍ leh Leˍviˆ chaw Uˇreˍlaˆ, Aˍsaˍyaˆ, Yawˇlaˆ, Sheˍmaˍyaˆ, Eˇleˍlaˆ leh Aˍmiˆnaˍdaˆ hui hta‸ kuˬ yuˬ leh, yawˇ hui hta‸ chi hkʼe kʼoˆ piˇ ve yoˬ.

12Nawˬ hui lehˬ, Leˍviˆ chaw hui ve awˬ hoˉ awˬ naˬ teˇ hpaˍ hpeh‸ ve yoˬ. Iˉsaˍreˍlaˆ Gʼuiˬsha ve ka ti‸ shaˉ caˆ ta kʼoˍ hta‸, choˬ kaˬ ngaˬ gu taˍ ve chehˇ kuiˬ lo yuˬ laˬ tuˬ, nawˬ hui a shu yawˇ ve awˬ to hta‸ da‸ kehˬ tuˬ te taˍ-o‸.

13Awˬ lawn kʼo, awˉ lawˉ teˇ pawˆ ngaˬ hui ka ti‸ shaˉ caˆ ta kʼoˍ oˇ ve hta‸ ca yuˬ htaˇ, nawˬ hui maˇ chehˇ. Te keunˍ te cawˇ ve hkʼe ngaˬ hui maˇ te ve pa taw, Gʼuiˬsha ngaˬ hui hta‸ ciˍ yanˍ laˇ ve yoˬ, teh‸ Daˍviˆ yawˇ hui hta‸ kʼoˆ piˇ ve yoˬ.

14Hkʼe te leh, paw hkuˇ leh Leˍviˆ chaw teˇ hpaˍ lehˬ, Iˉsaˍreˍlaˆ Gʼuiˬsha ve ka ti‸ shaˉ caˆ ta kʼoˍ ca yuˬ tuˬ a shu yawˇ awˬ to hta‸ da‸ kehˬ tuˬ te ve yoˬ.

15Gʼuiˬsha Moˉseˍ hta‸ kʼoˆ piˇ taˍ ve hkʼe, Leˍviˆ chaw teˇ hpaˍ lehˬ ta kʼoˍ oˇ ve hta‸ taˆ kʼaw‸ la ve yoˬ.

16Daˍviˆ lehˬ, Leˍviˆ chaw teˇ hpaˍ hpaˍ hta‸ leuˆ yuˬ leh, cehnˬ dawˆ, tinˍ hteˆ leh kʼa muiˬ hkawˇ kʼa tuˬ kʼoˆ piˇ taˍ ve yoˬ.

17Cehnˬ dawˆ tuˬ awˬ pon leuˆ yuˬ taˍ ve chaw teˇ hpaˍ lehˬ, Yawˇlaˆ ve yaˇ Heˍmanˍ, yawˇ ve awˬ viˉ awˬ nyi Beˍraˍhkiˆ ve yaˇ Aˍsaˆ, Kuˇshaˍyaˆ ve yaˇ Eˇlaˍtanˍ hui hpeh‸ ve yoˬ.

18Tinˍ hteˆ tu ˬawˬ pon leuˆ yuˬ taˍ ve chaw teˇ hpaˍ lehˬ, Zaˍhkaˍriˆ, Sheˍmiˆraˍmoˆ,

19Yaˍheˍlaˆ, Uˇniˆ, Eˇlaˍbaˆ, Maˍseˍyaˆ leh Beˍnaˍyaˆ hui hpeh‸ ve yoˬ.

20Shehnˍ hehˆ tuˬ ve chaw hui lehˬ Maˍtiˇtiˆ, Eˇliˇhpaˍlehˆ, Miˆneˍyaˆ, Aˍsaˍyaˆ,

21leh bon yehˬ shaw shehˍ hpaˇ Awˇbehˆ leh Yeˍlaˆ hui hpeh‸ve yoˬ.

22Hkeˍnaˍniˆ lehˬ, kʼa muiˬ hkawˇ kʼa puiˉ jaˇ ve pa taw, yawˇ hta‸ hkawˇ yehˬ awˬ hoˉ te tcuh ve yoˬ.

23Ka ti‸ shaˉ caˆ ta kʼoˍ hta‸ ha‸ shaˉ tuˬ leuˆyuˬ taˍ ve chaw teˇ hpaˍ lehˬ, Beˍraˍhkiˆ, Eˇlaˍkaˍnaˆ, Awˇbehˆ Eˇdonˍ, Yeˍhiˇyaˆ hui hpeh‸ ve yoˬ.

24Ka ti‸ shaˉ caˆ ta kʼoˍ gʼuˇ suhˍ peuˍ leh behˬ heh ma meuˆ tuˬ leuˆ yuˬ taˍ ve chaw teˇ hpaˍ lehˬ, paw hkuˇ Shaˍbaˍniˆ, Yawˇshaˍhpaˆ, Naˍtaˍneˍlaˆ, Aˍmaˍsehˇ, Zaˍhkaˍriˆ, Beˍnaˍyaˆ leh Eˇlaˍzaˍ hui hpeh‸ ve yoˬ.

25Hkʼe te leh jawˇmawˇ Daˍviˆ, Iˉsaˍreˍlaˆ awˬ hoˉ awˬ naˬ teˇ hpaˍ, leh ma‸ poˍ lonˉ teˇ hpaˍ ka ti‸ shaˉ caˆ ta kʼoˍ hta‸ ca taˆ yuˬ tuˬ, Awˇ behˆ Eˇdonˍ ve yehˬ lo kʼai leh, oˇ kaˬ lo pawehˇ lonˉ teˇ maˬ te ve yoˬ.

26Leˍviˆ chaw hui ka ti‸ shaˉ caˆ ta kʼoˍ taˆ kʼai chehˇ ve hta‸ nuˇ paˍ suhˍ hkeh leh yawˬ suhˍ hkeh tuˉ tanˇpiˇ ve yoˬ.

27Jawˇmawˇ Daˍviˆ, kʼa muiˬ hkawˇ kʼa shehˍ hpaˇ teˇ hpaˍ, hkawˇ yehˬ awˬ hoˉ Hkeˍnaˍniˆ, leh ka ti‸ shaˉ caˆ ta kʼoˍ hta‸ taˆ chehˇ ve Leˍviˆ chaw hkʼa peu-eˬ, da‸ jaˇ ve veu‸ kʼaˇ veu‸ deh taˍ ve yoˬ. Daˍviˆ lehˬ, aˉ po‸ awˬ hta‸ ve teˇ maˬ hta‸ htawˇ veu‸ deh taˍ ve yoˬ.

28Hkʼe te leh, Iˉsaˍreˍlaˆ chaw hkʼa peu-eˬ ka ti‸ shaˉ caˆ ta kʼoˍ oˇ ve geh teˇ geh, ha lehˬ ha kʼa cehnˬ dawˆ tinˍ hteˆ, behˬ heh ma meuˆ leh Yeˍruˆsaˍlehnˍ venˇ lo kʼaw‸ la ve yoˬ.

29Ka ti‸shaˉ caˆ ta kʼoˍ oˇ ve venˇ hkʼaw gaˬ la ve teˇ yanˇ, Sawˉlu‸ yaˇ miˇ Miˆhkaˍlaˆ yehˬ miˉ ehˉ hkʼaw nyi peu leh, jawˇmawˇ Daˍviˆ ha lehˬ ha kʼa kʼaˍ hkʼeˆ chehˇ ve hta‸ gʼa mawˬ ve teˇ yanˇ, yawˇ Daˍviˆ hta‸ cha‸ naˬ jaˇ ve yoˬ.

← Chapter 14 Jump to: Chapter 16 →