1 Chronicles 28

Lahu Bible Edited © Thailand Bible Society and Bible Society of Myanmar, 2010, 2020.

← Chapter 27 Jump to: Chapter 29 →

1Jawˇmawˇ Daˍviˆ lehˬ, Iˉsaˍreˍlaˆ chaw awˬ hoˉ awˬ naˬ hkʼa peu-eˬ ve hta‸ Yeˍruˆsaˍlehnˍ venˇ lo kuˬ hpawnˬ ve yoˬ. Hkʼe te leh, Iˉsaˍreˍlaˆ chaw awˬ hoˉ awˬ naˍ hkʼa peu-eˬ, a ma‸ lonˉ hkʼa peu-eˬ, kanˉ nyi paˍ awˬ hoˉ hkʼa peu-eˬ, jawˇmawˇ ve mawˇ ha‸ shaˉ shehˍ hpaˇ hkʼa peu-eˬ, aˉ yaˇ cawˬ ve chaw hkʼa peu-eˬ, leh ma‸ poˍ hkʼa peu-eˬ Yeˍruˆsaˍlehnˍ venˇ lo hpawnˬ laˬ ve yoˬ.

2Daˍviˆ tu huˉ leh yawˇ hui hkʼa peu-eˬ hta‸ chi hkʼe kʼoˆ piˇ ve yoˬ. Ngaˬ ve chaw teˇ hpaˍ-oˬ, ngaˬ ve tawˇ hta‸ na sheˍ. Ngaˬ lehˬ, Gʼuiˬsha ve hkui sheh taˍ kuiˬ teh‸ kʼo ve, ka ti‸ shaˉ caˆ ta kʼoˍ teh kuiˬ bon yehˬ lonˉ teˇ maˬ te gaˇ ve yoˬ. Bon yehˬ lonˉ chi hta‸ te tuˬ, ngaˬ awˬ hkʼaˇ caw gu taˍ peuˬ ve yoˬ.

3Ya‸ hkʼaˇ, yawˇ ngaˬ hta‸ bon yehˬ te tuˬ a hkaw-anˬ maˇ pe‸ laˇ. Awˬ lawn kʼo, ngaˬ lehˬ ma‸ yaˇ teˇ gʼaˇ hpeh‸ leh, shu ve awˬ suhˍ yuˬ sheˆ jaˇ peuˬ ve pa taw yoˬ.

4Iˉsaˍreˍlaˆ ve Gʼuiˬsha lehˬ, ngaˬ leh ngaˬ ve awˬ ceuˬ awˬ hkʼaˇ teˇ hpaˍ hta‸ leuˆ yuˬ leh, teˇ co peuˬ teˇ co jawˇmawˇ te tcuh laˇ ve yoˬ. Awˬ hoˉ awˬ naˬ te tuˬ, Gʼuiˬsha lehˬ Yuˇda‸ awˬ ceuˬ awˬ hkʼaˇ hkʼaw lo, ngaˬ pa ve yehˬ yaˇ kʼa yaˇ hta‸ leuˆ yuˬ taˍ ve yoˬ. Yehˬ yaˇ kʼa yaˇ chi teˇ hpaˍ hkʼaw, Gʼuiˬsha ngaˬ hta‸ kʼaw‸ leuˆ yuˬ leh, Iˉsaˍreˍlaˆ jawˇmawˇ te tcuh laˇ ve yoˬ.

5Yawˇ ngaˬ hta‸ yaˇ paˍ laiˉ gʼaˇ cawˬ la piˇ taˍ ve hkʼaw, Sawˉla‸monˍ hta‸ yawˇ kʼaw‸ leuˆ yuˬ leh Iˉsaˍreˍlaˆ mvuhˇmiˬ hta‸ uˉ peunˍ tcuh ve yoˬ.

6Gʼuiˬsha ngaˬ hta‸ chi hkʼe kʼoˆ laˇ ve yoˬ. Ngaˬ ve bon yehˬ hta‸ te tuˬ ve chaw lehˬ, nawˬ yaˇ paˍ Sawˉla‸monˍ hpeh‸ ve yoˬ. Yawˇ lehˬ, ngaˬ ve yaˇ hpeh‸ la tuˬ ngaˬ leuˆ yuˬ taˍ peuˬ leh, ngaˬ lehˬ yawˇ ve awˬ pa hpeh‸ ve yoˬ.

7Yawˇ chi beu‸ te chehˇ ve hkʼe, ngaˬ ve awˬliˇtawˇhkawˇ hkʼa peu-eˬ hta‸ hkʼa deh‸ na yuˬ ve kʼo, yawˇ ve mvuhˇmiˬ hta‸ ngaˬ co co taiˍ taiˍ yeˬ chehˇ piˇ lawˬ tuˬ yoˬ, teh‸ ngaˬ hta‸ kʼoˆ laˇ ve yoˬ.

8Chi hta‸ pa taw ngaˬ ve chaw teˇ hpaˍ oˬ, Gʼuiˬsha mehˆ gʼuˇ suhˍ leh chi beu‸ choˬ kaˬ lo hpawnˬ chehˇ ve chaw chi ma ve mehˆ gʼuˇ suhˍ, ngaˬ nawˬ hui hta‸ chi hkʼe awˬ gʼaˇ pe‸ laˇ gaˇ ve yoˬ. Gʼuiˬsha ngaˬhui hta‸ kʼoˆ laˇ ve tawˇ teˇ hkawˇ le le hta‸ hkʼa deh‸ na yuˬ-o‸. Oˇ hkʼe te ve kʼo, nawˬ hui da‸ jaˇ ve mvuhˇmiˬ chi hkʼaw co co gʼa chehˇ leh, nawˬ hui ve yaˇ teˇ hpaˍ htawˇ, teˇ co peuˬ teˇ co gʼa chehˇ kʼai tuˬyoˬ, teh‸ yawˇ hui hta‸ kʼoˆ piˇ ve yoˬ.

9Peuˬ hkʼaw‸ nawˉ, yawˇ Sawˉla‸monˍ hta‸ chi hkʼe kʼoˆpiˇ ve yoˬ. Ngaˬ yaˇ paˍ-oˬ, ngaˬ nawˬ hta‸ chi hkʼe awˬ gʼaˇ pe‸ laˇ gaˇ ve yoˬ. Nawˬ pa oˉ kʼoˍ pui chehˇ ve Gʼuiˬsha hta‸ nawˬ htawˇ taˍ uiˍ taˍ mvuh leh, nyi ma awˬ tawˬ hkʼa gaˬ yawˇ ve kanˉ hta‸ te-o. Yawˇ lehˬ, ngaˬ hui ve dawˇ hkʼaˇ hkʼa peu-eˬ hta‸ shiˍ chehˇ ve yoˬ. Nawˬ yawˇ geh kʼai ve kʼo, yawˇ nawˬ hta‸ ha‸ yuˬ laˇ tuˬ yoˬ. Ya‸ hkʼaˇ, nawˬ yawˇ hta‸ baˬ taˉ ve kʼo, yawˇ htawˇ nawˬ hta‸ co co taiˍ taiˍ baˬ taˉ laˇ tuˬ yoˬ.

10Yawˇ ve bon yehˬ hta‸ te tuˬ, Gʼuiˬsha nawˬ hta‸ leuˆ yuˬ taˍ peuˬ ve hta‸ hkʼaˬ htaˆ ka‸ dawˇ nawˇ taˍ-o‸. Nawˬ ve nyi ma hta‸ dawˇ cheˆ leh, bon yehˬ lonˉ oˇ ve hta‸ chi beu‸ tanˬ te kʼai loˬ, teh‸ Sawˉla‸monˍ hta‸ kʼoˆ piˇ ve yoˬ.

11Oˇ ve hkʼaw‸ nawˉ, Daˍviˆ lehˬ bon yehˬ mawˇ ha‸ shaˉ taˍ kuiˬ bawehˇ teˇ hpaˍ, awˬ nu ve bawehˇ teˇ hpaˍ leh chaw yaˇ venˇbaˆ lawˬ hpehˇ kuiˬ bawehˇ chi teˇ hpaˍ hta‸ te tuˬ, yawˇ gu taˍ ve awˬ hkʼaˇ teˇ hpaˍ Sawˉla‸monˍ hta‸ piˇ ve yoˬ.

12Chi hkʼoˆ ka‸, yawˇ lehˬ yawˇ ve nyi ma hkʼaw te tuˬ dawˇ taˍ ve bawehˇ teˇ hpaˍ, chaw hpawnˬ da‸ kuiˬ, leh Gʼuiˬsha hta‸ tanˇ piˇ taˍ ve mawˇ teˇ hpaˍ ha‸ shaˉ taˍ kuiˬ, awˬ hkʼaˇ chi teˇ hpaˍ htawˇ Sawˉla‸monˍ hta‸ piˇ ve yoˬ.

13Bon yehˬ hkʼaw lo kanˉ te tuˬ leh, bon yehˬ hkʼaw cawˬ ve mawˇ teˇ hpaˍ hta‸ ha‸ shaˉ tuˬ, paw hkuˇ leh Leˍviˆ chaw hui hta‸ awˬ moˍ hkʼaˬ hkʼe gʼa te pehˬ keu piˇ tuˬ ve awˬ hkʼaˇ teˇ hpaˍ htawˇ yawˇ hta‸ piˇ ve yoˬ.

14Bon yehˬ hkʼaw loˍ ve mawˇ teˇ hpaˍ hta‸ te htaˇ, hpu, shi, hkʼaˬ ma yuˬ tawˆ leh yehˇ tuˬ ve awˬ hkʼaˇ teˇ hpaˍ htawˇ, yawˇ hta‸ kʼoˆ maˍ piˇ ve yoˬ.

15Kawˆ faiˇ leh kawˆ faiˇ taˍ kuiˬ hta‸ te htaˇ, hpu, shi hkʼaˬ ma yehˇ cawˇ ve awˬ lawn maˇ kʼoˆ,

16Gʼuiˬsha hta‸ tanˇ piˇ ve hkaoˍmonˇ teh taˍ kuiˬ hpui lawˇ teˇ hpaˍ hta‸ te htaˇ, hpu, shi hkʼaˬ ma yehˇ cawˇ ve awˬ lawn maˇ kʼoˆ,

17caˉ behˆ, hkehˇ leh mu‸ hkʼu teˇ hpaˍ hta‸ te htaˇ, shi hkʼaˬ ma yehˇ cawˇ ve leh, hkehˇ pe le teˇ hpaˍ hta‸ te htaˇ, hpu hkʼaˬ ma yehˇ cawˇ ve awˬ lawn maˇ kʼoˆ,

18Sha hawnˉ tuˉ tanˇ kuiˬ leh ka ti‸ shaˉ caˆ ta kʼoˍ hkʼoˆ lo mui taˍ ve hkeˍruˆbenˍ nyiˇ gʼaˇ ve awˬ han hta‸ te htaˇ, shi hkʼaˬ ma yehˇ cawˇ ve awˬ lawn maˇ kʼoˆ, yawˇ Sawˉla‸monˍ hta‸ kʼoˆ piˇ ve yoˬ.

19Oˇ ve hkʼaw‸ nawˉ Daˍviˆ kʼoˆ ve, Awˬ ceuˬ chi hkʼa peu-eˬ lehˬ, Gʼuiˬsha ngaˬ hta‸ kʼoˆ laˇ ve hkʼe, te kʼai tuˬ ve kanˉ hkʼaˇ awˬ hkʼaw lo hkʼa deh‸ bvuh‸ keu taˍ ve yoˬ, teh‸ kʼoˆ ve yoˬ.

20Oˇ ve hkʼaw‸ nawˉ Daˍviˆ lehˬ, Sawˉla‸monˍ hta‸ chi hkʼe kʼaw‸ kʼoˆ piˇ ve yoˬ. Awˬ gʼaˇ yuˬ tawˆ leh ha‸ hanˉ ve awˬ hkʼaw lo te kʼai-o. Nyi ma taˇ luˬ. Ngaˬ oˉ kʼoˍ pui chehˇ ve Gʼuiˬsha nawˬ geh chehˇ tuˬ yoˬ. Yawˇ nawˬ hta‸ baˬ taˉ laˇ tuˬ ve maˇ heˆ. Bon yehˬ lonˉ chi hta‸ te peuˬ htaˇ hkʼa gaˬ, yawˇ nawˬ geh chehˇ taˍ tuˬ yoˬ.

21Bon yehˬ hkʼaw lo kanˉ te tuˬ ve paw hkuˇ leh Leˍviˆ chaw hui hta‸ htawˇ hkʼa deh‸ leuˆ yuˬ taˍ peuˬ. Kanˉ te puiˉ ve la‸shaˉmaˉ teˇ hpaˍ leh, Iˉsaˍreˍlaˆ chaw awˬ hoˉ awˬ naˬ hkʼa peu-eˬ nawˬ hta‸ ga laˇ tuˬ law chehˇ taˍ peuˬ, teh‸ Sawˉlaˍmonˍ hta‸ kʼoˆ piˇ ve yoˬ.

← Chapter 27 Jump to: Chapter 29 →