1 Chronicles 29

Lahu Bible Edited © Thailand Bible Society and Bible Society of Myanmar, 2010, 2020.

← Chapter 28 Jump to:

1Jawˇmawˇ Daˍviˆ lehˬ, oˇ kaˬ lo hpawnˬ da‸ chehˇ ve chaw moˍ lonˉ hta‸ chi hkʼe kʼoˆ piˇ ve yoˬ. Ngaˬ yaˇ paˍ Sawˉla‸monˍ lehˬ, Gʼuiˬsha leuˆ yuˬ taˍ ve chaw hpeh‸ ve yoˬ. Ya‸ hkʼaˇ, yawˇ lehˬ a sha‸ i chehˇ sheˍ leh, kanˉ te hkʼaˇ hkʼa deh‸ maˇ shiˍ sheˍ. Gʼa te tuˬ ve kanˉ chi lehˬ, uiˍ jaˇ ve kanˉ lonˉ teˇ maˬ hpeh‸ ve yoˬ. Awˬ lawn kʼo, yehˬ lonˉ chi ve lehˬ, chaw yaˇ chehˇ tuˬ ve yehˬ maˇ heˆ. Gʼuiˬsha ve bon yehˬ lonˉ hpeh‸ ve yoˬ.

2Bon yehˬ lonˉ chi hta‸ te tuˬ awˬ pon ngaˬ lehˬ hpu, shi, kuiˇ, sho, suhˆ, shehnˉ shiˍ, leh awˬ nu loˍ ve mawˇ teˇ hpaˍ hta‸ coˇ caˇ leh ca teh taˍ peuˬ.

3Chi teˇ hpaˍ awˬ hkʼoˆ, ngaˬ Gʼuiˬsha ve bon yehˬ hta‸ ha‸ jaˇ ve pa taw, ngaˬ ve hpu shi mawˇ jeˬ teˇ hpaˍ hta‸ htawˇ yuˬ tawˆ leh, kanˉ chi awˬ pon tanˇ piˇ taˍ peuˬ ve yoˬ.

4Bon yehˬ chi awˬ pon ngaˬ lehˬ, shi 100 cawehˬ, hpu 240 cawehˬ leh, awˬ nu loˍ ve mawˇ teˇ hpaˍ tanˇ piˇ taˍ peuˬ.

5Nawˬ hui awˬ hkʼaw lo, a shu teˇ gʼaˇ kʼaw‸ tanˇ laˇ gaˇ sheˍ le, teh‸ yawˇ hui hta‸ kʼoˆ piˇ ve yoˬ.

6Oˇ htaˇ, Iˉsaˍreˍlaˆ chaw awˬ hoˉ awˬ naˬ teˇ hpaˍ, ma‸ poˍ lonˉ teˇ hpaˍ leh jawˇmawˇ ve mawˇ hta‸ ha‸ shaˉ chehˇ ve chaw teˇ hpaˍ, ha lehˬ ha kʼa kʼaw‸ hpoˆ tanˇ piˇ ve yoˬ.

7Yawˇ hui tanˇ laˇ ve mawˇ teˇ hpaˍ lehˬ, shi 170 cawehˬ hpu 340 cawehˬ kuiˇ 620 cawehˬ, sho 3,400 cawehˬ hpeh‸ ve yoˬ.

8Awˬ hpfuhˇ hkʼaˆ ve shehnˉ shiˍ cawˬ ve chaw teˇ hpaˍ lehˬ, shehnˉ shiˍ oˇ ve teˇ hpaˍ hta‸ mawˇ ha‸ shaˉ paˍ, Geˍraˍsonˍ awˬ ceuˬ awˬ hkʼaˇ Yeˍheˍlaˆ hta‸ chiˇ a‸ piˇ ve yoˬ.

9Iˉsaˍreˍlaˆ chaw teˇ hpaˍ htawˇ ha lehˬ ha kʼa tanˇ piˇ ve yoˬ. Yawˇ hui chi hkʼe gʼa tanˇ piˇ ve pa taw ha lehˬ jaˇ ve yoˬ. Jawˇmawˇ Daˍviˆ htawˇ ha lehˬ jaˇ ve yoˬ.

10Jawˇmawˇ Daˍviˆ lehˬ, oˇ kaˬ lo hpawnˬ da‸ chehˇ ve chaw chi ma ve gʼuˇ suhˍ Gʼuiˬsha hta‸ chiˇ mvuh leh kʼoˆ ve, Ngaˬ hui ve awˬ puˍ lonˉ Yaˍkoˆ ve Gʼuiˬsha-oˬ, nawˬ lehˬ co co taiˍ taiˍ chiˇ mvuh keunˍ ve Gʼuiˬsha hpeh‸ ve yoˬ.

11Nawˬ lehˬ awˬ me‸ awˬ hponˇ leh kanˇ paˆ uiˍ jaˇ ve yoˬ. Miˬguiˬ leh mvuhˇ naw ma hkʼoˆ cawˬ ve awˬ ceuˬ hkʼa peu-eˬ nawˬ ve deˇ deˇ yoˬ. Nawˬ lehˬ, hkʼa peu-eˬ ve hta‸ uˉ peunˍ shehˍ hpaˇ jawˇmawˇ lonˉ hpeh‸ ve yoˬ.

12Awˬ hpfuhˇ hkʼaˆ ve hpu shi mawˇ jeˬ hkʼa peu-eˬ nawˬ geh laˬ ve yoˬ. Nawˬ ve awˬ gʼaˇ awˬ shaˉ leh kanˇ paˆ hta‸ cuˇ leh, awˬ ceuˬ hkʼa peu-eˬ ve hta‸ nawˬ uˉ peunˍ chehˇ ve yoˬ. Nawˬ lehˬ, chaw teˇ gʼaˇ hta‸ awˬ gʼaˇ uiˍ la piˇ tuˬ te puiˉ ve yoˬ.

13Gʼuiˬsha-oˬ, chi beu‸ ngaˬ hui nawˬ ve awˬ meh hta‸ chiˇ uiˍ chiˇ mvuh ve yoˬ.

14Ya‸ hkʼaˇ, ngaˬ leh ngaˬ ve chaw teˇ hpaˍ nawˬ hta‸ piˇ laˇ tuˬ te‸ chiˉ maˇ cawˬ. Awˬ lawn kʼo, awˬ ceuˬ hkʼa peu-eˬ ngaˬ hui nawˬ geh gʼa taˍ ve yoˬ. Hkʼe te leh, ngaˬ hui nawˬ geh gʼa taˍ ve teˇ hpaˍ nawˬ hta‸ kʼaw‸ hkʼaw‸ piˇ laˇ ve yoˬ.

15Gʼuiˬsha-oˬ, ngaˬ hui lehˬ ngaˬ hui ve awˬ puˍ awˬ pi hui hkʼa shuˍ, hkehˉ chaw hkʼe gʼa te toˇ chehˇ ve hta‸ nawˬ shiˍ taˍ ve yoˬ. Ngaˬ hui ve awˬ nyi awˬ haˉ teˇ hpaˍ lehˬ, aˉ gʼuiˬ ha hkʼa shuˍ mehˉ kʼai chehˇ leh, suh ve teˇ ceuˬ hta‸ ponˬ maˇ hpeh‸.

16Ngaˬ hui ve Gʼuiˬsha-oˬ, ngaˬ hui nawˬ hta‸ taˍ uiˍ ve hkʼaw bon yehˬ teˇ maˬ te tuˬ, hpu shi mawˇ jeˬ chi teˇ hpaˍ hta‸ shaw hpoˆ taˍ ve yoˬ. Ya‸ hkʼaˇ, mawˇ chi hkʼa peu-eˬ nawˬ geh gʼa taˍ ve nawˬ ve mawˇ deˇ deˇ hpeh‸ ve yoˬ.

17Nawˬ lehˬ, chaw hkʼa peu-eˬ ve nyi ma hta‸ lawˇnyi leh, da‸ ve chaw teˇ hpaˍ hta‸ nawˬ nyi ma cawˇ ve hta‸ ngaˬ hui shiˍ taˍ ve yoˬ. Nawˬ hta‸ ha‸ jaˇ ve hkʼaw hpu shi mawˇ jeˬ chi teˇ hpaˍ ngaˬ nawˬ hta‸ tanˇ laˇ ve yoˬ. Choˬ kaˬ lo hpawnˬ chehˇ taˍ ve chaw chi teˇ hpaˍ htawˇ, nawˬ hta‸ gʼa tanˇ piˇ ve pa taw, ha lehˬ jaˇ chehˇ ve hta‸ ngaˬ gʼa mawˬ ve yoˬ.

18Ngaˬ hui ve awˬ puˍ lonˉ Aˍbraˍhanˍ, Iˉcaˆ leh Yaˍkoˆ hui ve Gʼuiˬsha-oˬ, nawˬ ve chaw chi teˇ hpaˍ lehˬ, kanˉ chi hkʼe gʼa te taˍ peuˬ ve hta‸ hkʼaˬ htaˆ ka‸ dawˇ nawˇ chehˇ leh, nawˬ hta‸ ka ti‸ yeˬ puiˉ tuˬ a ciˉ ga piˇ-oˆ.

19Ngaˬ yaˇ paˍ Sawˉla‸monˬ htawˇ, nyi ma awˬ tawˬ hkʼa gaˬ nawˬ ve tawˇ hta‸ na yuˬ puiˉ leh, chi beu‸ ngaˬ awˬ hkʼaˇ gu taˍ ve bon yehˬ lonˉ hta‸ te gʼa tuˬ a ciˉ ga piˇ-oˆ, teh‸ kʼoˆ ve yoˬ.

20Oˇ ve hkʼaw‸ nawˉ Daˍviˆ lehˬ, Nawˬ hui ve Gʼuiˬsha hta‸ chiˇ mvuh-o, teh‸ yawˇ hui hta‸ kʼoˆ piˇ ve yoˬ. Hkʼe te leh, yawˇ hui Gʼuiˬsha hta‸ chiˇ mvuh leh, Gʼuiˬsha hta‸ maˇ kʼoˆ, jawˇmawˇ hta‸ maˇ kʼoˆ, taˍ uiˍ taˍ mvuh piˇ ve yoˬ.

21Awˬ hkʼaw‸ nawˉ teˇ nyi, yawˇ hui lehˬ nuˇ paˍ lonˉ 1,000 hkeh, yawˬ paˍ lonˉ 1,000 hkeh leh yawˬ ehˉ 1,000 hkeh Gʼuiˬsha hta‸ tuˉ tanˇ piˇ ve yoˬ. Yawˇ hui Gʼuiˬsha hta‸ tuˉ tanˇ piˇ tuˬ a pehˉ meuˇ gʼuiˬ htawˇ yuˬ laˬ ve yoˬ.

22Oˇ ve teˇ nyi, yawˇ hui Gʼuiˬsha mehˆ gʼuˇ suhˍ lo hti caˇ hti dawˬ leh ha lehˬ ha kʼa te ve yoˬ. Yawˇ hui lehˬ nyiˇ pawˆ teˇ pawˆ Sawˉla‸monˍ hta‸ naˍ manˇ kʼaw‸ pfuhˍ piˇ leh, yawˇ hui ve jawˇmawˇ te tcuh ve yoˬ. Zaˍdoˆ hta‸ htawˇ paw hkuˇ lonˉ te tuˬ, naˍ manˇ pfuhˍ piˇ ve yoˬ.

23Hkʼe te leh, Sawˉla‸monˍ lehˬ yawˇ awˬ pa Daˍviˆ awˬ tan jawˇmawˇ te ve yoˬ. Yawˇ lehˬ, cheuˬ jaˇ ve jawˇmawˇ hpeh‸ leh, Iˉsaˍreˍlaˆ chaw hkʼa peu-eˬ yawˇ ve tawˇ hta‸ na yuˬ ve yoˬ.

24Iˉsaˍreˍlaˆ chaw hui ve ma‸ poˍ lonˉ hkʼa peu-eˬ leh Daˍviˆ ve yaˇ hkʼa peu-eˬ Sawˉ la‸monˍ jawˇmawˇ te ve hta‸ nyi hkʼaˇ suh ve yoˬ.

25Gʼuiˬsha lehˬ, chaw ceuˬ hkʼa peu-eˬ Sawˉla‸ monˍ hta‸ nyi leh anˇ jaˇ piˇ lawˬ ve yoˬ. Yawˇ lehˬ, Iˉsaˍreˍlaˆ jawˇmawˇ hkʼa peu-eˬ a‸ kehˉ Sawˉlaˆmonˍ hta‸ awˬ me‸ awˬ hponˇ cawˬ piˇ lawˬ ve yoˬ.

26Yeˍsehˇ ve yaˇ paˍ Daˍviˆ lehˬ, Iˉsaˍreˍlaˆ mvuhˇmiˬ hta‸ 40 hkʼaw‸ uˉ peunˍ ve yoˬ.

27Yawˇ lehˬ, Heˍbronˍ venˇ hkʼaw 7 hkʼaw‸ leh Yeˍsuˆsaˍlehnˍ venˇ hkʼaw 33 hkʼaw‸ uˉ peunˍ ve yoˬ.

28Yawˇ a sha‸ mawˇ la leh suh-e ve yoˬ. Yawˇ suh-e htaˇ hkʼa gaˬ chaw yaˇ teˇ hpaˍ yawˇ hta‸ taˍ uiˍ taˍ mvuh piˇ chehˇ ve yoˬ. Oˇ ve hkʼaw‸ nawˉ, yawˇ ve yaˇ paˍ yawˇ awˬ tan jawˇmawˇ kʼaw‸ te ve yoˬ.

29Jawˇmawˇ Daˍviˆ hkʼa te ve kanˉ hkʼa peu-eˬ, tcuh kaˍ paˍ Saˍmo-eˍlaˆ, Naˍtanˍ leh Gaˆ hui bvuh‸ keu taˍ ve li‸ daw hkʼaw cawˬ ve yoˬ.

30Li‸ daw oˇ ve teˇ hpaˍ hkʼaw, yawˇ mvuhˇmiˬ hta‸ hkʼaˬ hkʼe te uˉ peunˍ ve awˬ lawn, yawˇ kanˇ paˆ hkʼaˬ ma uiˍ ve awˬ lawn leh, yawˇ awˬ to, Iˉsaˍreˍlaˆ mvuhˇmiˬ, leh awˬ nu ve mvuhˇmiˬ teˇ hpaˍ hkʼaˬ hkʼe hpeh‸ la ve awˬ lawn teˇ hpaˍ bvuh keu taˍ ve yoˬ.

← Chapter 28 Jump to:

Recommended Reading

Commentary 1 Chronicles Commentaries → Devotional 1 Chronicles Devotional Guide → Get This Bible Lahu Bible Edited © Thailand Bible Society and Bible Society of Myanmar, , . Study Bible →