1 Chronicles 26

Lahu Bible Edited © Thailand Bible Society and Bible Society of Myanmar, 2010, 2020.

← Chapter 25 Jump to: Chapter 27 →

1Chaw chi teˇ hpaˍ lehˬ, bon yehˬ hta‸ shaw tuˬ leuˆ yuˬ taˍ ve Leˍviˆ chaw teˇ hpaˍ hpeh‸ ve yoˬ. Kawˇraˆ awˬ ceuˬ awˬ hkʼaˇ awˬ hkʼaw lo, Aˍsaˆ ve awˬ ceuˬ awˬ hkʼaˇ Kawˇraˍ ve yaˇ Meˍshaˍleˍmiˆ hpeh‸ ve yoˬ.

2Yawˇ lehˬ, yaˇ paˍ 7 gʼaˇ cawˬ ve yoˬ. Yawˇ hui lehˬ Zaˍhkaˍriˆ, Yeˍdeˍlaˆ, Zaˍbaˍdiˆ, Yaˍtaˍneˍlaˆ,

3Eˇlanˍ, Yeˍhawˇhaˍnanˍ, leh Eˇlawˇnehˇ hui hpeh‸ ve yoˬ.

4Awˇbehˆ Eˇdonˍ ve yaˇ paˍ 8 gʼaˇ lehˬ, Sheˍmaˍyaˆ, Yeˍhawˇzaˍbaˆ, Yawˇaˍ, Shaˍhkaˍ, Neˍtaˍneˍlaˆ,

5Aˍmeˍlaˆ, Iˉsaˍhkaˍ, leh Puˇlaˍ tehˇ hui hpeh‸ ve yoˬ.

6Awˇbehˆ Eˇdonˍ ve yaˇ paˍ uiˍ Sheˍmaˍyaˆ lehˬ yaˇ paˍ 6 gʼaˇ cawˬ ve yoˬ. Yawˇ hui lehˬ, Awˇtaˍniˆ, Reˍhpeˍlaˆ, Awˇbehˆ, Eˇlaˍzaˍbiˆ, Eˇliˇhuˆ leh Sheˍmaˍhkiˆ hui hpeh‸ ve yoˬ.

7Yawˇ hui lehˬ, cheuˬ jaˇ ve chaw teˇ hpaˍ hpeh‸ ve pa taw, yawˇ hui ve awˬ ceuˬ awˬ hkʼaˇ teˇ hpaˍ awˬ hkʼaw lo awˬ meh bvuhˬ jaˇ ve chaw teˇ hpaˍ hpeh‸ ve yoˬ. Awˬ leh meuˇ ve nyiˇ gʼaˇ lehˬ, shu a‸ kehˉ cheuˬ jaˇ ve chaw teˇ hpaˍ hpeh‸ ve yoˬ.

8Awˇbehˆ Eˇdonˍ ve yehˬ yaˇ kʼa yaˇ teˇ hpaˍ awˬ hkʼaw lo, bon yehˬ shaw ve kanˉ hta‸ te chehˇ ve chaw 62 gʼaˇ cawˬ ve yoˬ.

9Meˍshaˍleˍmiˆ ve awˬ ceuˬ awˬ hkʼaˇ teˇ hpaˍ hkʼaw bon yehˬ shaw ve kanˉ hta‸ te ve chaw 18 gʼaˇ cawˬ ve yoˬ.

10Meˍraˍriˆ awˬ ceuˬ awˬ hkʼaˇ Hawˇsaˍ lehˬ, yaˇ paˍ 4 gʼaˇ cawˬ ve yoˬ. Yawˇ hui lehˬ, Shiˉmaˍriˆ (yawˇ lehˬ yaˇ paˍ uiˍ maˇ heˆ htawˇ, awˬ pa yawˇ hta‸ awˬ hoˉ te tcuh ve yoˬ.)

11Hiˇlaˍhkiˆ, Teˍbaˍliˆ leh Zaˍhkaˍriˆ hui hpeh‸ ve yoˬ. Hawˇsaˍ ve awˬ ceuˬ awˬ hkʼaˇ teˇ hpaˍ hkʼaw bon yehˬ hta‸ shaw ve chaw 13 gʼaˇ cawˬ ve yoˬ.

12Bon yehˬ hta‸ shaw shehˍ hpaˇ teˇ hpaˍ hta‸ htawˇ, a shu yawˇ ve awˬ ceuˬ awˬ hkʼaˇ cawˬ ve hkʼe, awˬ moˍ pehˬ taˍ leh, Leˍviˆ chaw hkʼa shuˍ kanˉ gʼa te ve yoˬ.

13Taˍ meu‸ hpe‸ hkʼaˬ ve teˇ maˬ hta‸ gʼa shaw tuˬ, yawˇ hui htawˇ mehˇ hkaˆ leh shaw ve yoˬ.

14Sheˍlaˍmiˆ lehˬ, mvuhˇ nyi tawˆ hpawˇ lo cawˬ ve taˍ meu‸ hpe‸ hta‸ gʼa shaw leh, hkʼaˬ htaˆ ka‸ yawˇ ve awˬ pa hta‸ da‸ ve dawˇ hkʼaˇ piˇ puiˉ ve yoˬ. Zaˍhkaˍriˆ lehˬ, awˬ na hpawˇ lo ve taˍ meu‸ hpe‸ hta‸ gʼa shaw ve yoˬ.

15Awˇbehˆ Eˇdonˍ lehˬ, awˬ hawˉ hpawˇ lo ve taˍ meu‸ hpe‸ hta‸ gʼa shaw leh, yawˇ ve yaˇ teˇ hpaˍ lehˬ mawˇ teh kuiˬ bawehˇ teˇ hpaˍ hta‸ gʼa shaw ve yoˬ.

16Suˆpenˍ leh Hawˇsaˆ lehˬ mvuhˇ nyi kʼehˬ hpawˇ ve taˍ meu‸ hpe‸ leh, Shaˍleˍhkehˆ taˍ meu‸ hpe‸ hta‸ gʼa shaw ve yoˬ. A shu yawˇ awˬ yanˇ cawˇ ve hkʼe, shaw ve kanˉ chi teˇ hpaˍ hta‸ hkʼa deh‸ gʼa te chehˇ ve yoˬ.

17Mvuhˇ nyi tawˆ hpawˇ lo cawˬ ve taˍ meu‸ hpe‸ hta‸ teˇ nyi ve chaw 6 gʼaˇ gʼa shaw leh, awˬ na hpawˇ leh awˬ hawˉ hpawˇ ve taˍ meu‸ hpe‸ hta‸ teˇ nyi ve chaw 4 gʼaˇ gʼa shaw ve yoˬ. Teˇ bawehˇ ve nyiˇ gʼaˇ gʼa shaw taˍ ve yoˬ.

18Mvuhˇ nyi kʼehˬ hpawˇ ve taˍ meu‸ hpe‸ hta‸ 4 gʼaˇ gʼa shaw leh, aˉ po kʼo bon yehˬ paˇ lo 2 gʼaˇ gʼa shaw taˍ ve yoˬ.

19Chi ve lehˬ, Kawˇraˆ leh Meˍraˍriˆ awˬ ceuˬ awˬ hkʼaˇ teˇ hpaˍ hta‸ shaw tcuh tuˬ piˇ taˍ ve kanˉ hpeh‸ ve yoˬ.

20Awˬ nu ve Leˍviˆ chaw teˇ hpaˍ lehˬ, bon yehˬ hkʼaw cawˬ ve hpu tanˇ ta kʼoˍ leh, Gʼuiˬsha hta‸ tanˇ piˇ taˍ ve mawˇ teˇ hpaˍ keu taˍ ve bawehˇ teˇ hpaˍ hta‸ gʼa ha‸ shaˉ ve yoˬ.

21Geˍraˍsonˍ ve yaˇ paˍ Laˍdanˍ lehˬ, yawˇ ve yaˇ paˍYeˍheˍliˆ leh awˬ nu ve yawˇ ve awˬ ceuˬ awˬ hkʼaˇ teˇ hpaˍ ve awˬ hoˉ hpeh‸ ve yoˬ.

22Laˍdanˍ ve yaˇ paˍ Zeˍtanˍ leh Yawˇlaˆ hui lehˬ, bon yehˬ hkʼaw cawˬ ve hpu tanˇ ta kʼoˍ leh, mawˇ keu taˍ ve bawehˇ teˇ hpaˍ hta‸ ha‸ shaˉ shehˍ hpaˇ hpeh‸ ve yoˬ.

23Aˍmaˍranˍ, Iˉzaˍhaˍ, Heˍbronˍ leh Awˇzeˍlaˆ hui hta‸ htawˇ kanˉ teˇ hpaˍ pehˬ piˇ taˍ ve yoˬ.

24Moˉseˍ ve yaˇ paˍ Geˍraˍsonˍ ve awˬ ceuˬ awˬ hkʼaˇ Sheˍboeˍlaˆ lehˬ, bon yehˬ hkʼaw cawˬ ve hpu tanˇ ta kʼoˍ hta‸ ha‸ shaˉ shehˍ hpaˇ awˬ hoˉ lonˉ hpeh‸ ve yoˬ.

25Geˍraˍsonˍ ve awˬ nyi paˍ lehˬ, Eˇlaˍsaˍ yoˬ. Eˇlaˍsaˍ ve yaˇ lehˬ, Reˍhaˍbiˆ yoˬ. Reˍhaˍbiˆ ve yaˇ lehˬ, Yeˍshaˍyaˆ yoˬ. Yeˍshaˍyaˆ ve yaˇ lehˬ Yawˇranˍ yoˬ. Yawˇranˍ ve yaˇ lehˬ, Ziˇhkaˍriˆ yoˬ. Ziˇhkʼaˍriˆ ve yaˇ lehˬ, Sheˍlawˇmiˆ yoˬ.

26Sheˍlawˇmiˆ leh yawˇ ve yehˬ yaˇ kʼa yaˇ teˇ hpaˍ lehˬ, jawˇmawˇ Daˍviˆ, Iˉsaˍreˍlaˆ chaw awˬ hoˉ awˬ naˬ teˇ hpaˍ, leh ma‸ poˍ lonˉ teˇ hpaˍ Gʼuiˬsha hta‸ tanˇ piˇ taˍ ve mawˇ teˇ hpaˍ hta‸ ha‸ shaˉ shehˍ hpaˇ hpeh‸ ve yoˬ.

27Yawˇ hui ma‸ bawˆ kuiˬ lo gʼa veu laˇ ve mawˇ teˇ hpaˍ hta‸ bon yehˬ lo yuˬ laˬ leh, bon yehˬ hkʼaw loˍ ve hkʼe yehˇ tuˬ tanˇ piˇ taˍ ve yoˬ.

28Sheˍlawˇmiˆ leh yawˇ ve yehˬ yaˇ kʼa yaˇ teˇ hpaˍ lehˬ, bon yehˬ hkʼaw loˍ ve hkʼe yehˇ tuˬ shu tanˇ laˇ ve mawˇ teˇ hpaˍ leh, tcuh kaˍ paˍ Saˍmo-eˍlaˆ, jawˇmawˇ Sawˉlu‸, Neˍraˆ ve yaˇ Aˍbaˍnaˍ leh Zeˍruˆyaˍ ve yaˇ Yaˍbaˆ hui tanˇ laˇ ve mawˇ hkʼa peu-eˬ hta‸ nyi ha‸ shaˉ shehˍ hpaˇ hpeh‸ ve yoˬ.

29Iˉsaˍhaˍ awˬ ceuˬ awˬ hkʼaˇ teˇ hpaˍ hkʼaw, Hkeˍnaˍniˆ leh yawˇ ve yaˇ teˇ hpaˍ lehˬ, ceˇ leˇ lonˉ ve kanˉ hta‸ te leh, shu hta‸ suhˉ ka‸ gʼa jehˬ piˇ ve yoˬ.

30Heˍbronˍ awˬ ceuˬ awˬ hkʼaˇ teˇ hpaˍ hkʼaw, Haˍshaˍbiˆ leh yawˇ ve chaw 1,700 gʼaˇ lehˬ, Yawˇ danˍ iˉ kaˆ lawˬ mvuhˇ nyi kʼehˬ hpawˇ lo chehˇ ve Iˉsaˍreˍlaˆ chaw hui hta‸ uˉ peunˍ shehˍ hpaˇ hpeh‸ ve yoˬ.

31Heˍbronˍ awˬ ceuˬ awˬ hkʼaˇ teˇ hpaˍ ve awˬ hoˉ lehˬ, Yeˍriˇyaˆ hpeh‸ ve yoˬ. Jawˇmawˇ Daˍviˆ uˉ peunˍ chehˇ ve 40 hkʼaw‸ teˇ hkʼaw‸ htaˇ, Heˍbronˍ awˬ ceuˬ awˬ hkʼaˇ teˇ hpaˍ ve caˇ lanˇ gʼawˆ nyi leh, chaw chi ve teˇ moˍ lehˬ Giˇlaˆ mvuhˇmiˬ, Yaˍzaˍ venˇ hkʼaw chehˇ taˍ ve hta‸ gʼa mawˬ ve yoˬ.

32Hkʼe te leh, jawˇmawˇ Daˍviˆ lehˬ, Yeˍriˇyaˆ awˬ ceuˬ awˬ hkʼaˇ hkʼaw lo ve awˬ hoˉ awˬ naˬ 2,700 gʼaˇ hta‸ leuˆ yuˬ leh, Yawˇdanˍ iˉ kaˆ lawˬ mvuhˇ nyi tawˆ hpawˇ lo cawˬ ve Ruˇbenˍ, Gaˆ leh mvuhˇ nyi tawˆ hpawˇ chehˇ ve Maˍnaˍseˍ chaw chi teˇ hpaˍ hta‸ uˉ peunˍ tcuh ve yoˬ.

← Chapter 25 Jump to: Chapter 27 →