1 Kings 10

Malagasy 2004 (DIEM PROTESTANTA)

← Chapter 9 Jump to: Chapter 11 →

1Ny mpanjakavavin’i Sebà dia nahare ny laza nananan’i Salômôna noho ny anaran’ny TOMPO, ka avy hitsapa azy tamin’ny fanontaniana sarotra.

2Dia tonga tany Jerosalema izy sy ny mpanaraka azy marobe, ny rameva izay nivesatra zava-manitra sy volamena sesehena ary vatosoa. Rehefa mby tao amin’i Salômôna ity mpanjakavavy, dia nilaza taminy izay rehetra tao am-pony.

3Voavalin’i Salômôna avokoa ny fanontaniana rehetra nataony, ka tsy nisy zavatra niafina tamin’ny mpanjaka ireny fa nanomezany valinteny avokoa.

4Ary rehefa samy hitan’ny mpanjakavavin’i Sebà ny fahendren’i Salômôna sy ny trano naoriny,

5ny sakafo teo amin’ny latabany ary ny toeram-ponenan’ireo tandapany, ny fitafian’ny mpandroso sakafo sy mpitondra divay ary koa ny sorona dorana manontolo natolony tao an-tranon’ny TOMPO, dia talanjona aoka izany izy

6ka nilaza tamin’ny mpanjaka hoe: –Marina avokoa izay resaka reko tany amin’ny taniko momba ny teninao sy ny fahendrenao.

7Nefa tsy nino ny filàzan’olona aho, raha tsy tonga sy atỳ, ka ny masoko no mahita. Hay na dia ny antsasany aza tsy voambara tamiko akory. Fa mihoatra lavitra noho ny laza efa reko ny fahendrena sy ny fahamendrehana izay anananao.

8Sambatra ireo olonao sy ireo tandapanao, satria eo anatrehanao mandrakariva ka mandre ny fahendrenao.

9Hisaorana anie ny TOMPO Andriamanitrao fa sitrany napetraka eo amin’ny sezafiandrianan’i Israely ianao; noho ny fitiavany mandrakizay an’i Israely manko no nanaovan’ny TOMPO anao ho mpanjaka mba hampihatra ny rariny sy ny fahamarinana.

10Dia nomen’ilay mpanjakavavy volamena telo taonina sy sasany ary koa zava-manitra sesehena sy vatosoa ny mpanjaka; tsy nisy na ovina na oviana haben-java-manitra tonga tao Israely tahaka izay nomen’ny mpanjakavavin’i Sebà ho an’i Salômôna.

11Ny sambon’i Hirama, izay naka volamena avy tany Ôfira, dia nitondra hazo sarobidy betsaka tokoa sy vatosoa.

12Ny hazo sarobidy dia nataon’ny mpanjaka arofanina tao amin’ny tranon’ny TOMPO sy ny lapan’andriamanjaka ary koa nanamboarany lokanga sy valiha ho an’ny mpihira; ka tsy nisy hazo sarobidy tonga na hita toy izany intsony tany Israely mandraka ankehitriny.

13Tetsy an-danin’izany kosa dia nomen’i Salômôna mpanjaka ny mpanjakavavin’i Sebà avokoa izay rehetra niriny sy nangatahiny, ankoatra izay natolony azy araka ny fahalalahan-tanan’i Salômôna mpanjaka. Avy eo ilay mpanjakavavy sy ireo mpanompony dia niverina nody tany amin’ny taniny.

14Ny lanjam-bolamena tonga tao amin’i Salômôna, tanatin’ny taona iray monja, dia nahatratra roapolo taonina,

15ankoatra ny haba nalainy tamin’ny mpandranto sy ny mpivarotra ary ny hetra naloan’ny mpanjaka vahiny na voaangon’ireo governoran’ny tany.

16Nampamboatra ampingabe roanjato tamina metaly miharo volamena i Salômôna mpanjaka; ka lanjam-bolamena enina kilao avy no nilaina isan’ampinga.

17Dia nampamboatra ampingakely telonjato tamina metaly miharo volamena koa izy; ka lanjam-bolamena iray kilao sy sasany avy no nilaina isan’ampinga. Ary napetraky ny mpanjaka tao amin’ilay trano antsoina hoe «Alan’i Libano» ireo.

18Dia nampamboatra sezafiandrianana lehibe koa izy, dia sezafiandrianana izay voaravaka ivoara sady nopetahana takela-bolamena madio.

19Nisy zanatohatra enina tamin’io sezafiandrianana io; miendrika faribolana ny fiankinana teo aminy ary nisy fitehenan-tanana teo an-daniny roa amin’ny fipetrahana. Nisy sarin-diona iray avy teo an-kilan’ny fitehenan-tanana;

20ary sarin-diona enina avy no teo an-daniny roa amin’ny zanatohatra enina. Tsy nisy natao tahaka izany mihitsy tany amin’ny fanjakana hafa rehetra.

21Volamena avokoa ny tsatokaty fisotroan’i Salômôna mpanjaka; ary volamena tsara avokoa ny kojakoja rehetra tao amin’ilay trano antsoina hoe «Alan’i Libano». Tsy nisy vita volafotsy ireo, satria noheverina ho tsy dia sarobidy loatra izany tamin’ny andron’i Salômôna.

22Ny mpanjaka manko dia nanana sambo vaventy izay nitety ranomasina niaraka tamin’ny sambon’i Hirama; ary indray mandeha isan-telo taona ireo sambo vaventy ireo no tonga mitondra volamena sy volafotsy amana ivoara ary koa rajako sy vorombola.

23I Salômôna mpanjaka dia nihoatra noho ny mpanjaka hafa rehetra tambonin’ny tany tamin’ny harena sy ny fahendrena.

24Olona avy amin’ny tany tontolo no nitady hahita an’i Salômôna mba hihaino ny fahendrena izay nataon’Andriamanitra tao am-pony.

25Ka isan-taona dia samy tonga nitondra fanomezana avy izy rehetra, dia kojakoja volafotsy sy volamena ary koa fitafiana sy fiadiana mbamin’ny zava-manitra sy soavaly na boriky.

26Nanangona kalesy fitondra miady sy mpitaingin-tsoavaly i Salômôna ka nanana kalesy 1 400 sy mpitaingin-tsoavaly 12 000 izay nisy natobiny tamin’ireo tanàna fitoeran-kalesy ary nisy notanany teo aminy tao Jerosalema.

27Toy ny hamaroan’ny vatokely no nataon’ny mpanjaka habetsaky ny volafotsy tao Jerosalema; ary toy ny hamaroan’ny aviavy any amin’ny lemak’i Sefelà no nataony habetsaky ny hazo sedera.

28Ny soavalin’i Salômôna dia avy tany Ejipta sy Silisia; ny mpandranton’ny mpanjaka no nividy azy tany.

29Ny kalesy fitondra miady anankiray avy tany Ejipta dia nitentina sekela volafotsy eninjato, ary ny soavaly anankiray kosa dia sekela volafotsy 150; toy izany vidiny izany koa no nitondran’ireo mpandranto ireo ho an’ny mpanjakan’ny Hetita sy ho an’ny mpanjakan’i Siria.

← Chapter 9 Jump to: Chapter 11 →