2 Chronicles 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1A Salmo yãka raop tus pis-yopoe sẽn na n yɩ zɩ-zɩtba, la neb tus pis-nii sẽn na n peesd kugã tãmsã zutu, la neb tus a tã, la kobs-yoobe sẽn na n getẽ tʋmtʋmdbã yelle.

2Dẽ zugẽ, a Salmo tʋmame tɩ b tɩ yeel Tɩɩr naaba a Huram yaa: «Yãmb da maana m ba Davɩɩd neer n kõ-a sɛɛdr tɩɩs t'a me a yiri. Bɩ y maan a woto me n kõ maam.

3Bala, mam dat n mee roog Sẽn-Ka-Saab sẽn yaa mam Wẽnnaamã yʋʋr yĩng n kõ-ba. Tɩ b tõe n yõogd tɩdar bãmb taoore, la tɩ b tõe n dɩgend kaset burã bãmb taoor wakat fãa, la b maan maand sẽn yõogd bugum bãmb taoor yibeoog ne zaabre, la vʋʋsg rayã, ne ki-paalã, la Sẽn-Ka-Saab tigã wakat wa Israyɛll nebã sẽn tog n maanã.

4Roog ning mam sẽn na n me wã tog n yɩɩ kãsenga, bala, tõnd Wẽnnaamã yaa kãseng n yɩɩd wẽnnaam-dãmbã fãa.

5Sɩdã, ned ka tõe n me roog n kõ bãmb ye. Bala, saasã ne a yalmã ka tõe n deeg bãmb ye. Dẽ, mam yaa ãnda n tõe n me roog bãmb yĩnga? Mam sẽn dat bal yaa tɩ m me zĩig sẽn na yõogd tɩdar bãmb taoore.

6Moasã, bɩ f tʋm ned sẽn yaa tʋʋm-mit t'a wa m nengẽ, ned sẽn mi sãnem, la wanzuri, la zũudu, ne kutu tʋʋmde, ned sẽn tõe n wʋg pɛɛl n gʋl miuudu, ne moaama, la kẽeg haoo, la sẽn mi gʋlb sõama, t'a tõe n wa tʋm ne neb nins m ba a Davɩɩd sẽn da yãk tɩ b yaa tʋʋm-mit n be ne maam Zʋʋda la Zeruzalɛm ka wã.

7Bɩ y tʋm sɛɛdr tɩɩsã sẽn be Libã tãmsã zutã raado, ne sɩprɛse, la Sãntall raado. Bala, mam miime tɩ fo tʋmtʋmdbã mii Libã tɩɩsã kɛɛbo. La ade, mam tʋmtʋmdbã na n wa naaga fo tʋmtʋmdbã.

8Bɩ b segl daad wʋsgo, bala, roog ning m sẽn na n me wã na n yɩɩ kãseng la neer wʋsgo.

9Mam na n kõ yãmb tʋmtʋmdb nins sẽn na n kɛ b raadã ki yond tus-pisi la baning yond tus-pisi, la reezẽ rãam yʋy tus-pisi, ne kaam dʋgd tus-pisi.»

10Dẽ, Tɩɩr dĩmã, a Huram, gʋlsame n leok a Salmo n yeel-a yaa: «Yaa Sẽn-Ka-Saab sẽn nong bãmb nebã yĩng la b sẽn kɩt tɩ fo lebg b naabã.»

11La a Huram leb n yeelame yaa: «Bɩ Sẽn-Ka-Saab sẽn yaa Israyɛll Wẽnnaamã sẽn naan yĩngr la tẽngã paam pẽgre, bãmb sẽn kõ a Davɩɩde, biig sẽn tar yam la yẽesem ne bãngre, sẽn na n me roog Sẽn-Ka-Saab yĩngã, la a me a na-yir a menga yĩngã.

12Ade, mam tʋmda ned sẽn yaa tʋʋm-mita, la sẽn tar bãngr sõama f nengẽ,

13yaa a Huram-Abi, yẽnda ma wã yaa Dan buudã bi-pugla, t'a ba wã yaa tɩɩr neda, yẽnda mii sãnem, wanzuri, zũudu, kutu, kuga, la raad tʋʋmde. La a mi gar buud toor-toor losbo, sã n yaa moaama, miidu, bɩ kẽeg haoo, la ne tʋʋmd ning fãa fo sẽn na n kõ-a t'a maan ne fo tʋʋm-mitbã, la ne f ba a Davɩɩd tʋʋm-mitbã. Sã n yaa ne wʋgb ne gĩs-bãanega, la gʋlb buud toor-toore, la teed buud fãa naanego yẽnda mi-b-la sõama.

14Moasã, m soaala, mam kot-y lame tɩ y tʋm koodã, ne kaamã, la rãamã y sẽn kãabã.

15La tõnd na n dʋʋ Libã tãmsã zut n kɛ tɩɩsã y sẽn datã tɛka. La d na n sẽb-b-la kil-kil n ning koomẽ wã n dugs n tãag Zafa, dẽ, yãmb na yaool n tall-b n kẽng Zeruzalɛm.»

16A Salmo sõda sãamb nins fãa sẽn dag n be Israyɛll soolmã pʋgẽ wã, yẽnda ba a Davɩɩd sẽn dag n sõdã, la b mikame tɩ yaa neb tus-koabg la pis-nu la a tãab la kobs-yoobe.

17Dẽ, yẽnda yãka neb tus-pis-yopoe, tɩ b na n yɩ kug-zɩtba, la neb tus-pis-nii, sẽn na n peesd kugã tãmsã zutu, la neb tus a tã la kobs yoob sẽn na n get nebã n kɩt tɩ b tʋʋmdẽ.

← Chapter 1 Jump to: Chapter 3 →