2 Chronicles 30

Mossi MPBU (WẼNNAAM SEBRE 2014)

← Chapter 29 Jump to: Chapter 31 →

1A Ezekɩyaas tʋma neb tɩ bool Israyɛll ne Zʋʋda nebã fãa, la yẽnda tol n gʋlsa sɛb tɩ b tɩ kõ Efrayiim ne Manaase nebã, n yeel-b tɩ b wa Sẽn-Ka-Saab roogẽ wã Zeruzalɛm, tɩ b maan Israyɛll Wẽnnaamã Pak tigrã.

2Dĩmã ne a nanambsã, la zãma wã maana tiging yãk yam tɩ b na n maana Pak tigrã kiuug n a yiib soaba Zeruzalɛm pʋgẽ.

3Bala, b rag n ka tõe n maan Pak tigrã a wakat ye. Bala, maan-kʋʋdbã wʋsg rag n ka paam n yɩlg b mense, la nebã me rag n ka paam n tigim Zeruzalɛmã me ye.

4La yam yãk-kãng taa rĩmã ne zãma wã fãa yam.

5Dẽ, bãmb maana wa b sẽn yãk yam to-to wã. Woto, bãmb tʋma neb tɩ saag Israyɛll soolmã gilli, sẽn sɩng ne Dan, hal n tãag Bɛɛrseba, n bool nebã tɩ b wa Zeruzalɛm, n maan Pak tigrã, Sẽn-Ka-Saab sẽn yaa Israyɛll Wẽnnaamã yĩnga. Bala, neb wʋsg rag n ka paam n maan tigrã wa sẽn gʋls tõogã sebr pʋgẽ to-to wã ye.

6Woto, Koe-toagsdbã looga ne sɛb nins rĩmã ne a nanambsã sẽn gʋlsã, Israyɛll ne Zʋʋda soolmã fãa pʋgẽ. La wa rĩmã sẽn kõ noor ninga wã, bãmb dag n moondame n yetẽ: «Israyɛll kamba, yãmb sẽn yaa neb nins sẽn põs Asiiri rĩm-dãmbã sãoongã, lebg-y n wa-y Sẽn-Ka-Saab sẽn yaa a Abrahaam, ne a Izake, la a Zakoob Wẽnnaamã nengẽ, la bãmb me na n lebg n wa yãmb sẽn pa-b ka wã nengẽ.

7Bɩ y ra yɩ wa y ba-rãmbã, bɩ y saam-biisã sẽn maan sẽn ka zems ne Sẽn-Ka-Saab sẽn yaa bãmb ba-rãmb Wẽnnaamã ye, yaa bõn-kãng yĩng n kɩt tɩ b bas tɩ b sãam-b wa yãmb sẽn ne rũndã wã.

8Moasã, bɩ y ra keng y sũyã wa y yaab-rãmbã ye. Lebg-y n bao-y Sẽn-Ka-Saabo, la y wa bãmb zĩ-sõngã pʋg bãmb sẽn yãk wakat fãa yĩngã, n waoog Sẽn-Ka-Saab sẽn yaa yãmb Wẽnnaamã, tɩ bãmb tõe n zãag b sũ-puugrã ne yãmba.

9Sɩda, yãmb sã n lebg n wa Sẽn-Ka-Saab nengẽ, bãmb na n kɩtame tɩ neb nins sẽn dag n yõg yãmb saam-biisã ne y kambã n kẽng yembdã, zoe bãmb nimbãaneg n bas-b tɩ b lebg n wa tẽn-kãngã pʋgẽ. Bala, Sẽn-Ka-Saab sẽn yaa yãmb Wẽnnaamã yaa nimbãan-zoɛta, yãmb sã n lebg n wa bãmb nengẽ, bãmb ka na n leb n bas yãmb ye.»

10Koe-toagsdbã saaga tẽng-tẽnga, Efrayiim, ne Manaase soolmã pʋgẽ, hal n tãag Zabulõ soolmẽ wã, la nebã rag n laad-b lame la b yaand-b bala.

11La baoosgo, Asɛɛre, ne Zabulõ, la Manaase neb kẽer sika b mens n wa Zeruzalɛm.

12La Zʋʋda pʋgẽ, Sẽn-Ka-Saab tẽega b nug tɩ nebã fãa paam yam a yembr n sak noor ning rĩmã ne a nanambsã sẽn yãkã, wa sẽn zems Sẽn-Ka-Saab goamã.

13Neb wʋsg tigma Zeruzalɛm, n na n maan bur sẽn ka rã-bɩll tigrã yʋʋmdã kiuug a yiib soabã. La neb nins sẽn tigim Zeruzalɛmã sɩd yɩɩ zãma kãsenga.

14Bãmb yikame n pãb tẽn-kug nins sẽn be Zeruzalɛm ne wisdã tẽn-kugã n wã, la b wʋk-b lame n tɩ lob Sedrõ longã pʋga.

15Bãmb kʋʋ Pakã rũms kiuug a yiib soaba rasem piig la a naas raarã. Yãnd n dag n yõk maan-kʋʋdbã la Leevi nebã, dẽ, b rag n yɩlga b mense, sẽn na n yɩlẽ n tõog n tall maand sẽn yõogd bugmã n kẽng Sẽn-Ka-Saab roogẽ wã.

16La bãmb ned kam fãa rag n yasa a zĩigẽ, wa sẽn zems tõog ning Wẽnnaam daoã a Moyiis sẽn dag n gʋlsã. Woto, maan-kʋʋdbã reega zɩɩmã Leevi nebã sẽn kõt-bã, n kɩrg tẽn-kugrã zugu.

17La neb wʋsg sẽn dag n be zãma wã sʋk n dag n ka yɩlg b mensã yĩng kɩtame, tɩ Leevi nebã reeg bãmb rũmsã n kʋ b zĩisẽ.

18Bala, neb wʋsg sẽn dag n yi Efrayiim, ne Manaase, la Izakaare, ne Zabulõ n dag n ka paam n yɩlg b mens ye, la bãmb dɩɩ Pakã tigrã n ka tũ wa sẽn gʋlsã ye, la a Ezekɩyaas yõka sɛɛg bãmb yĩng n yeele: «Bɩ Sẽn-Ka-Saab sẽn yaa sõng soabã kõ neb nins fãa sẽn bao Wẽnnaam Sẽn-Ka-Saab sẽn yaa bãmb yaab-rãmbã Wẽnnaam ne b sũur fãa wã sugri, baa ne bãmb sẽn ka tõog n yɩlg b mens wa sẽn gʋlsã.»

20Woto, Sẽn-Ka-Saab leoka a Ezekɩyaas pʋʋsgã, n ka sɩbg nebã ye.

21Israyɛll kamb nins sẽn dag n be Zeruzalɛmã maana Pak tigrã dasem a yopoe ne sũ-no-kãsenga, la Leevi nebã ne maan-kʋʋdbã rag n pẽgda Sẽn-Ka-Saabã daar fãa ne b yʋʋm teedã pãng fãa.

22A Ezekɩyaas goamã sɩɩsa Leevi neb nins fãa sẽn dag n tar yam-yãk sõng ne Sẽn-Ka-Saabã, la bãmb kell n maana tigrã dasem a yopoe, la b maand laafɩ maand n pʋʋsd Sẽn-Ka-Saab sẽn yaa bãmb ba-rãmbã Wẽnnaam barka.

23Dẽ poore, zãma wã leb n yẽsa ne taab n yãk yam n na n kell n maan tigrã rasem a yopoe n paase.

24Zʋʋda rĩm a Ezekɩyaas kõo zãma wã lols tusri, la piis tus a yopoe. Nanambsã me waa ne niig tusri, la piis tus piiga. La maan-kʋʋdb wʋsgo rag n yɩlga b mense.

25Zʋʋda nebã ne maan-kʋʋdbã, la Leevi nebã, la neb nins sẽn yi Israyɛll soolmẽ wã n wa wã, la Israyɛll neb nins sẽn dag n wa n kẽ Zʋʋda tẽngã maana sũ-noogo.

26La sũ-noogã yɩɩ kãseng Zeruzalɛm, bala, hal sẽn sɩng a Davɩɩd biig a Salmo zamaane, bũmb a woto rag n na n zɩ n leb n maan ye.

27Leevi nebã sẽn yaa maan-kʋʋdbã yikame n ning nebã barka, la bãmb pʋʋsgã zẽk n taa Wẽnnaam zĩ-sõngẽ wã saasẽ, la b leoka b pʋʋsgã.

← Chapter 29 Jump to: Chapter 31 →