2 Chronicles 21

Mossi MPBU (WẼNNAAM SEBRE 2014)

← Chapter 20 Jump to: Chapter 22 →

1A Zozafat saka a saam-dãmba, la b mum-a-la a ba-rãmb yaadẽ, a Davɩɩd na-tẽnga pʋga. La a biig a Zoram n led a zĩigẽ n dɩ naamã.

2A Zoram rag n tara saam-biisi, yaa a Azariya, a Yekiyɛlle, a Zakari, a Azariya, ne a Mikayɛlle, la a Sefatiya, bãmb fãa rag n yaa Israyɛll rĩm a Zozafat kamba.

3Bãmb ba a Zozafat ra kõo bãmb kũun wʋsgo. Yaa wanzuri, sãnem, la te-sõmy buud toor-toore, la tẽms sẽn me n gũbg Zʋʋda tẽngã pʋgẽ, la yẽnda yaool n dɩka naamã n kõ a Zoram, bala, yẽnda n dag n yaa bi-kãsenga.

4A Zoram sẽn led a ba wã n dɩ naamã, a naamã waa n paama pãnga, woto, yẽnda yõga a yaopã fãa ne Israyɛll taoor dãmb kẽer n kʋ ne zabr sʋʋga.

5A Zoram sẽn wa n na n deeg naamã t'a tara yʋʋm pis-tã la a yiibu, la yẽnda zĩnda Zeruzalɛm n dɩ naamã yʋʋm a nii.

6La yẽnda rɩka Israyɛll rĩm-dãmbã naoore, n maan wa a Akaab buudã sẽn da maanã. Bala, yẽnda da rɩka a Akaab bi-pugl n maan a paga. Yẽnda maana sẽn yaa wẽng Sẽn-Ka-Saab nifẽ.

7Baoosgo, Sẽn-Ka-Saab rag n ka rat n sãam a Davɩɩd doogã ye. Bala, bãmb dag n maana kaool ne a Davɩɩd n yeel t'a ka na n kong yageng sẽn na n led a zĩigẽ ye.

8La a Zoram rĩungã wakate, Edom tẽngã zãgsame tɩ Zʋʋda tẽngã ka na n leb n soog yẽnda ye. La bãmb yãka b toorẽ dĩma.

9Woto, a Zoram ne a nanambs la a saar-dãmbã fãa kẽngame n na n tɩ zabe. Dẽ, bãmb yika ne yʋng n zab ne Edom nebã sẽn gũbg bãmbã n tõog-b ne b saar-dãmbã nanambsã.

10La baoosg zãnga, Edom tẽngã kell n zãgsame tɩ Zʋʋda ka na n soog bãmb hal tɩ ta rũndã. La wakat-kãng me, Libna tẽngã neb me yikame n zãgsa a Zoram rĩungã. Bala, yẽnda basa Sẽn-Ka-Saab sẽn yaa a yaab-rãmbã Wẽnnaamã.

11A Zoram tol n kɩtame tɩ b me maoong kʋʋb zĩis Zʋʋda tãmsã zutu, n kɩt tɩ Zeruzalɛm ne Zʋʋda nebã waoog bõn-naandse.

12La daar a yembre Wẽnnaam no-rɛɛs a Eli gʋlsa a Zoram sebr n yeel-a yaa: «Ad Sẽn-Ka-Saab sẽn yaa fo yaab a Davɩɩd Wẽnnaamã sẽn yeta: Fo sẽn ka rɩk f ba a Zozafat la f yaab a Aaza sẽn yɩ Zʋʋda rĩm-dãmbã naoorã yĩnga,

13la fo sẽn maan wa Israyɛll rĩm-dãmbã n kɩt tɩ Zʋʋda ne Zeruzalɛm nebã waoog bõn-naands wa a Akaab buudã sẽn maanã, la fo sẽn kʋ f yaopã sẽn yaa fo saam-biisã tɩ b yaool n dag n são foomã yĩng kɩtame,

14tɩ Sẽn-Ka-Saab na n kɩt tɩ to-kãseng paam f nebã, ne f kambã, la f pagbã, la bũmb ning fãa f sẽn so wã zugu.

15La fo mengã na n paama bã-kegemse, la na n yɩɩ pʋg-roog bãaga. Bãagã na n tara yãngr daar fãa, hal tɩ f yãadã wa yita.»

16Dẽ, Sẽn-Ka-Saab kɩtame tɩ Filistẽ-dãmbã ne Araab-rãmb nins sẽn be Kuus sẽnẽ wã sũy yik ne a Zoram.

17La bãmb wa n zaba ne Zʋʋda soolmã, n kẽ tẽngã n wʋk paoong nins fãa sẽn da be rĩmã zak pʋgẽ wã, la baa ne a kom-dibli wã ne a pagbã fãa, yaa a Zoakaaz sẽn dag n yaa bi-yao wã bal n põse.

18Rẽ loogr poore, Sẽn-Ka-Saab lobga a Zoram pʋg bãag sẽn ka tõe n maage.

19Bãaga rag n tara yãngr daar fãa, la yʋʋm a yiibã baoosgẽ, bãagã kɩtame t'a yãadã yi, la a Zoram kii to-kãseng pʋgẽ. La a nebã ka yõog wisd a yĩng wa b sẽn maan ne a yaab-rãmbã ye.

20A Zoram sẽn wa n na n deeg naamã t'a tara yʋʋm pis-tã la a yiibu, la yẽnda zĩnda Zeruzalɛm n dɩ naamã yʋʋm a nii. Yẽnda kiime tɩ ned ba a ye ka yãb-a ye. B mum-a-la a Davɩɩd tẽnga pʋga, la ka yɩ rĩm-dãmbã yaadẽ ye.

← Chapter 20 Jump to: Chapter 22 →