Acts 13 — Mazanderani GMB (گیله ماز)

1اَنطاکیِه کلیسای دِلِه مُعَلِمین و پیغمبَران دَبان: بَرنابا، شَمعون مَعروف بِه نیجِر، لوکیوسِ قیرَوانی، مَنائِن که هیرودیسِ حاکم ناتَنی اَداش با، وَ شائول.

2موقِه ایی که اوشان روزِه بان و دَبان خَدا رِه پَرَسِش هَکونَن، روح القُدُس باگوتِه: «بَرنابا و شائول رِه اون کارِ وَسین که مَن اوشانِه دعوت هَکُردَم، سیفا هَکُنین.»

3ایما، بعد از روزِه و دُعا، اون دُتایِ سَر دَس بَنَن و اوشانِه سَفرِ وَسین راهی هَکُردَن.

4اینجوری، اون دُتا که روح القُدُسِ طرفِ جی بَرِساندِه هَبا بان، به بَندرِ سِلوکیه بَشَن و اوجِه یه جی کَشتی یه هَمرهَ به قبرِسِ بَرِسین.

5وَختِی سَلامیسِ شَهرِ دِلِه بَشَن، یَهودیِانِ عبادتگاهانِ دِلِه خُدایِ کَلامِ اعلام هَکُردَن. اوشان ”یوحَنایِ“ معروف به ”مَرقسِ“ خودِشانِه هَمرهَ بَبِردِه بان تا اوشانِه کمک هَکونِه.

6اوشان تمام جزیره رِه بَگَرِسَّن تا به پافوسِ شَهر بَرِسین. اوجِه ایتا یَهودی مَردای که اونِه اِسم باریِشوع با رِه بَدییَن که دِروئی پیغَمبَر و جادوگر با.

7اون رومِ فرماندار، سِرگیوس پولُسِ‘ رَفیق با. فرماندار که عاقِلِ مَردای با، بَرنابا و شائولِ خودِشِه وَر دُخوانِسِّه، چون خَسِّه خُدای کَلامِ بِشنوئِه.

8وَلی اون جادوگر که اونِه اِسمِ معنی عالِم با اوشانِ هَمرهَ مُخالِفَت هَکردِه و تَقلّا کانه با نُزارِه فَرماندار ایمان بیارِه.

9وَلی شائول، که اونِه پولُس هم گونه بان، روح القُدُسِ جی پِرُ هَبا، اون مَردای چِشمِ میَن رِه بِیشیِه و باگوتِه:

10«تو اِی اِبلیسِ وَچِه، تو اِی تمام خوبیان دشمن، اِی که مَکر و فَریبِ جی پُری، اینه جی که خُداوند راسِ راها رِه کَج هَکونی دَس نَکِشِنی؟

11بِدان که خُداوند دَس تی بَزَئنِ وَسین تی سَرِ وَر دَرِه. اَسه کور بونی و تا چَن وَخت آفتابِ نَینی.» دَرجا، اونِه چِشم تیرِه و تار هَبا، خودِشِه دور چَرخِسِّه و ینَفَرِ دُمّال گَردِنِه با که اونِه دَسِ بَگیرِه و را رِه اونِه نَشان هَدِه.

12وَختِی فرماندار این جریانِ بَدییِه، ایمان بیاردِه، چون تَعلیمی که خُداوند بارِه دَنِه بانِ جی بُهت هَکُردِه با.

13پولس و اونِه هَمراهان دَریای راهِ جی، پافوس جی به پِرجِه بَشَن که پامفیلیِه منطقه یه دِلِه با. وَلی اوجِه یوحنای معروف به مَرقُس اوشانِ جی سیفا هَبا وبه اورشَلیمِ وَگرِسِّه.

14وَلی اوشان پِرجِه یه جی رَد هَبان وبه اَنطاکیۀ پیسیدیه منطقه بَرِسین. مُقَدَّس شَنبِه روز، عبادتگاهِ دِلِه بومَن و بنیشتَن.

15بعدِ اینکه تورات و پِیغمبَران نِوِشتِه رِه بُخوانِسَّن، عبادتگاهِ رَئیسان اوشانِ وَسین پِیغام روانه هَکوردَن و باگوتَن: «آداشان، اَگه گَبی دارِین که مَردمِ تشویق کانِه، باگویید.»

16پولُس وَرِسَه و دَس هَمرهَ اِشارِه هَکردِه، باگوتِه: «اِی یهود مَردم، وَ شما اِی خُداتَرسان، گوش هَدین!

17این یَهود قومِ خدا، اَمِی پیرانِ اِنتخاب هَکردِه و اون موقِه ایی که اَمِی قومِ مصر مِلکِ دِلِه غریب بان رِه سَربُلَن هَکردِه، وَ قوَّتِ هَمرهَ اوشانِه اون مِلکِ جی دِرگا بیاردِه،

18وَ نزیکِ چِهل سال صحرای دِلِه اوشانِه تَحمل هَکردِه.

19اون بعدِ اینکه هَفتا قوم که کَنعان دِلِه دَبان رِه از بِین بَبِردِه، اوشانه مِلک رِه به اوشان اِرثیِه هَدَه.

20این جریان حدودِ چهار صد و پَنجاه سال طول بَکشیِه. «بعدِ اون، خدا تا سَمَوئیلِ پِیغَمبرِ دورِه، داوَران اوشانِه هَدَه.

21ایما اوشان ایتا پادشاه بِخَسَّن و خدا، شائول، قِیسِ ریکا، بنیامینِ قَبیلِه یه جی رِه اوشانِه هَدَه، که چِهل سال حکومت هَکردِه.

22بعدِ اینکه شائول برکِنار هَبا، داوودِ اِنتخاب هَکردِه تا اوشانِ پادشاه هَبو، وَ اونِه بارِه شهادت هَدَه و باگوته: ”من داوود یِسی یه ریکا رِه، مَردی بَدییَم که خیلی می دِل نیشِنِه، اون تمام می خواسِّه رِه بِجا هارنِه.“

23«خدا طِبق خودِشِه وَعدِه، این مَردای یه نَسلِ جی، یَهودِ قومِ وَسین ایتا نِجات دهندِه یعنی عیسی رِه بیاردِه.

24پیش از اینکه عیسی بییِه، یحیی تمام یَهودِ مَردُمِ وَسین غسلِ تَعمیدِ توبِه رِه اعلام کانِه با.

25وَختِی یحیی خودِشِه خِدمَتِ تَمام کانِه با، باگوتِه مَرِه کی دانید؟ مَن اون نیَم، بَلکِه اون بعدِ مَن هَنِه و مَن حتّی لایق نیَم اونِ چَمیشِ بَنِّ واز هَکُنَم.“

26«اِی آداشان، اِی ابراهیم وَچِهانِ نَسل، وَ اِی خداتَرسانی که شِیمی میِن دَرِن! این نِجاتِ پِیغام اَمِی وَسین روانه هَبا.

27چون اورشلیمِ مَردم و اوِشانِ گَتِ عیسی رِه نِشناختِن، وَ پِیغَمبَرانِ گَبِ شانِه که هر مُقَدَّسِ شَنبِه اوشانِ وَسین خواندِه بونِه با رِه نِفَهمِسَّن. اوشان اونِه مَحکوم هَکُردنِ هَمرهَ پیغَمبَرانِ گَبِ شانِه به اَنجام بَرِساندِن.

28هر چَن اوشان هیچ دَلیلِی اونِه بَکوشتن وَسین پیدا نَکوردَن، پیلاتُسِ جی بِخَسَّن اونِه اعدام هَکونِه.

29وَ وَختِی تمام اونچه که اونِه باره بَنویشته هَبا با رِه، اَنجام هَدَن، اونِه صَلیب جی جیر بیاردِن، مقَبره یه دِلِه بَنَن.

30وَلی خدا اونِه مُردِگانِ جی زندِه هَکردِه.

31خیلی روزان عیسی خودِشه اوشانِ رَه که اونِه هَمرهَ جلیلِ جی اورشلیمِ سَمت بوما بان ظاهر هَکردِه، که اَلانَم اوشان قومِ وَسین اونِه شاهِدانَن.

32«اَسه اَما این خَبَر خوشِ شِمِرِه دَنیم که خدا اونچه که اَمِی پیرانِ وَعدِه هَدَه با رِه،

33عیسی یه زندِه هَکردَنِ هَمرهَ، اَمِی وَسین که اونِه وَچِهانیم وَفا هَکردِه. هَمونجور که دوّمین مزمورِ دِلِه بَنویشته هَبا: «”تو می ریکائی؛ امروز، مَن تِرِه مولود هَکُردَم.“

34«خدا اونِه مردگانِ جی زندِه هَکردِه تا دِ هرگز فِسادِ نَینِه، خدا اینجور باگوتِه: «‌”مَن مُقَدَّس و مطمئنِ بَرکات که داوودِ وعدِه هَدَه هَبا رِه، شِمِرِه دَنَم.“

35وَ هَمینجورَم ایتا دیگَر مَزمور دِلِه گونِه: «تو نُزارنی تی مُقَدَّس، فِسادِ بَینِه.“

36«داوود بعدِ اونکه خُدایِ اِراده یه هَمرهَ خودِشِه دورِه یه مَردمِ خِدمت هَکردِه، بَمِردِه و خودِشِه اَجدادِ مُلحق هَبا، و فِسادِ بَدییَه.

37وَلی اونیکه خدا اونِه زندِه هَکردِه، فِسادِ نَدییَه.

38«پَس، اِی آداشان، بِدانین که این مَردای یه طریقِ جی گناهان آمرزِش شِمِرِه اعلام بونِه.

39اَسه هر کی عیسی رِه ایمان بیارِه، اونِ طَریق صالِح بِشمارِسِّه بونِه، هر اونچه یه دِلِه که نَتِّنِسین موسایه شَریعَت طَریق صالِح بِشمارِسِّه هَبین.

40پس بِپّائین پِیغَمبَرانِ این بَنویشته شِیمی سَر نیِه که گونِه:

41«”بِیشین، اِی کسایی که مسخره کانین، بُهت هَکُنین و نابود هَبین، چون شِیمی روزگارِ دِلِه کاری کانَم، که هر چی اونِه شیمی وَسین تعریف هَکُنَن هَرگز باوَر نُکانین.“

42وَختِی پولُس و بَرنابا عِبادَتگاهِ جی دِرگا شونه بان، مَردم اوشانِ جی خَواهِش هَکُردَن که شَنبِه بعدی هم این جَریانِ بارِه اوشانِ وَسین گَب بَزِنَن.

43بعدِ اینکه جَماعَت عِبادَتگاهِ جی بَشَن، خِیلی از یَهودیِان و اون خداپَرَس مَردم که یَهودی هَبا بان، پولُس و بَرنابای دُمّالسَر رادَکِتَن. پولُس و برنابا این دَسِّه یه هَمرهَ گَب بَزَن و اوشانِه تشویق کانِه بان که خُدای فیضِ دِلِه اِدامِه هَدِن.

44شَنبِه بَعدی، حدوداً، تمام مَردم شَهر جَم هَبان تا خداوَندِ کَلامِ بِشنُئِن.

45وَلی وَختِی یَهودیِان جَماعتِشانه بَدییَن، حَسودی یه جی پُر هَبان و بی حِرمتی یه هَمرهَ پولُس گَبانِ هَمرَه مُخالِفَت کِانِه بان.

46ایما پولُس و بَرنابا جُرأتِ هَمرهَ باگوتِن: «لازِم با خُدای کَلام هَمِه جی پیشتر شِمِرِه باگوتِه هَبو. وَلی وَختِی اونِه رَد هَکوردین و شِمِرِه اَبَدی زندگی یه لایِق ندانِسّید، پَس اَلان اَما غیرِ یَهودیِان سَمت شونیم.

47چون خُداوَند اَمَرِه اینجور باگوتِه که: «”مَن تِرِه غیرِ یَهودیِانِ وَسین نُور بِساتِم، تا نِجاتِ دُنیای چهار سو بَرِسانی.“

48وَختِی غیر یهودیان اینه بِشنَوِسَّن، خوشحال هَبان و خداوَندِ کَلامِ حُرمَت بَنَن، وَ اوشانیکه اَبدی زندگی یه وَسین اِنتخاب هَبا بان، ایمان بیاردِن.

49اینجوری خداوَندِ کَلام تمام اون مَنطقه یه دِلِه دَپیتِه.

50وَلی یَهودیِان، متِعَصِب و سَرشِناسِ زِناکان و شهرِ مَرداکان که رَهبر بان رِه آنتِریک هَکُردَن و اوشان پولُس و بَرنابا رِه اَذیت و آزار هَکُردَن. پس پولُس و بَرنابا رِه اون مَنطقه یه جی دِرگا هَکُردَن.

51اوشان هَم اون شَهرِ خاکِ خودِشانِه لِنگِ جی بِتِکاندِن و به شَهرِ قونیه بَشَن.

52شاگِردِان روح القُدُس و خوشحالی یه جی پُر بان.