Acts 21

Mazanderani GMB (گیله ماز)

1بعد اَز اینکه اوشانِ جی سیفا هَبَیم، دریای جی سَفرِ وَسین راهی هَبَیم و مستَقیم تا ’کوس‘ جزیره یه سَمت پیش بَشَیم. فردای اون روز، به جزیره رودِس بَرِسییَیم و اوجِه یه جی به پاتارای بَندرِ بَشَیم.

2اوجِه ایتا کشتی پیدا هکوردیم که دَبا بوشو فینیقیه. اونِه سَوار هَبَیم و راه دَکِتِیم.

3قبرسِ اَمی چَپِ وَر بَدییَیم و اوجِه یه جی بُگذشتِیم، سوریه یه سَمت رادَکِتِیم. ایما صورِ دِلِه پیادِه هَبَیم، چون بایِسّی اوجِه کَشتی یه بارِ خالی هَکونَن.

4شاگِردانِ اوجِه پیدا هکوردیم، هفت روز اوشانِ وَرجه بُمانِسّیم. اوشان خُدای روحِ هِدایتِ هَمرهَ پولُسِ باگوتِن به اورشَلیمِ نَشو.

5وَختِی اَمِی بُمانِسَّن فرصَت تَمام هَبا، سَفرِ وَسین راهی هَبَیم. تمام شاگِردِان خودِشانِه زِناکان و وَچِه هانه هَمرهَ اَمَرِه تا شهرِ دِرگا بَدرَقِه هَکُردَن. اوجِه دریاکنار زانو بَزَیم و دُعا هَکُردیم.

6بعدِ اینکه خدافظی هَکُردیم، کَشتی رِه سَوار هَبَیم، وَ اوشان هَم خودِشانِه سِرِه وَگرِسَّن.

7اَما اَمی دریایی سَفرِ صورِ بندرِ جی شروع هَکُردیم و به پْتولامائیس شهر بَرِسییَیم. اوجِه اَداشانِ جی دیدَن هَکُردیم و ایتا روز اوشانِ وَر بُمانِسِّیم.

8فردَئی، اوجِه یه جی بَشَیم و به قیصریه شهر بومَیم. مُبَشر فیلیپُسِ سِرِه بَشَیم که ایتا اَزون هَفت نفری با که خِدمتِ وَسین انتخاب هَبا با، وَ اونِه وَرجه بُمانِسّیم.

9فیلیپُس چهار تا اَذَب کیجا داشتِه که نَبوَّت کِانِه بان.

10بعد چند روز که اوجِه دَبَییم، ایتا پِیغمبر که اونِه اِسم آگابوس با یَهودیه جی بَرِسیه.

11اون اَمِی وَرجه بوما و پولُسِ قیشِ بِیتِه، خودِشِه دَس و لِنگِ اونه هَمرهَ دَبِسِّه و باگوتِه: «روح القُدُس گونِه: ”اورشلیمِ یَهودیِان این قِیشِ صاحابِ اینجوری دَبِدِنِن و غیرِ یهودیِان دَس تَسلیم کانِن.“‌»

12وَختِی اینه بِشنَویسّیم، اَما و اوجِه یه مَردم پولُسِ اِلتماس هَکُردیم که به اورشلیمِ نَشو.

13وَلی پولُس جواب هَدَه: «این چه کاریِه کانین؟ چِرا شیمی بِرمِه یه هَمرهَ می دِلِ اِشکِندِنین؟ مَن حاضِرم عیسی خُداوند اِسمِ خاطری نه فقط زِندان بوشوم، بَلکِه اورشلیمِ دِلِه بَمیرم.»

14وَختِی بَدییَیم قانِع نَبونِه، دَس بَکِشییَیم و باگوتیم: «اونچه خداوند خَنِه، هَبو.»

15بعدِ این روزا، سَفرِ وَسین تَدارک بَدییَیم و اورشلیمِ سمت رادَکِتِیم.

16شاگردان جی بعضیان که قیصریه زندگی کِانِه بان هَم اَمِی هَمرهَ بومَن و اَمَرِه مِناسونِ سِرِه بَبِردَن تا اونِه مِهمان هَبیم. مِناسون، قبرس جی و ایتا اَز قَدیمی شاگردان با.

17وَختِی اورشَلیم بَرِسییَم، آداشان خوشحالی یه هَمرهَ اَمِی پیشواز بومَن.

18فردَئی پولُسِ هَمرهَ یعقوبِ بَدییَین وَسین بَشَیم. تمام مشایخ اوجه دَبان.

19پولُس اوشانِه سَلام هَکردِه و اونچه که خدا اونِه خِدمتِ هَمرهَ غیر یهودیِان دِلِه هَکُرد با رِه ایتا ایتا توضیح هَدَه.

20اوشان وَختِی بِشنَوِسَّن، خدا رِه حمد و ثنا باگوتِن. ایما پولُسِ باگوتِن: «اِی اَداش، هَمونجور که دینی هِزاران یَهودی ایمان بیاردِن و همه شریعَتِ وَسین غیرت دارِن.

21اوشانِ میِن اینجور شایع هَبا که تو تمام یَهودیِانی که غیرِ یهودیِان دِلِه زندگی کانَن رِه تَعلیم دَنی که موسی یه پیغمبرِ شَریعَتِ جی وَگِردِن، وَ اوشانِه گونی نباید خودِشانِه وَچِهان رِه خَتنِه هَکُنَن و طِبق رَسم و رُسوم رفتار هَکُنَن.

22اَسه چه باید هَکُردَن؟ حتما، اوشان تی بَموئَنِ جی خَبَردار بونَن.

23پَس اونچه که تِرِه گونیم رِه هَکُن. ایجِه اَمِی وَر چهار تا مَردای دَرِن که نَذر دارِن.

24اوشانِه تی هَمرهَ بَبِر و اوِشانِ هَمرهَ تطهیرِ رَسم و رُسومِ بِجا بیار و اوشانِ خَرجِ هَدِه تا بَتَّنَن خودِشانِه سَرِ بِتراشَن. اینجوری هَمِه فَهمِنِن این چیزان که تی باره چو دَکِتِه راس نییِه، بَلکِه تو هَم شریعَتِ داری، وَ اونه دِلِه زندگی کانی.

25وَلی غیرِ یَهودی ایماندارنِ بارِه، اَما اَمی حکمِ ایتا نامِه یه دِلِه اوشانِ وَسین بَرِساندیم و باگوتیم که بایسّی بُتِشانه تَقدیم هَبا خُوراکی یه جی، خون جی، خَفِه هَبا حیوان گوشتِ جی، وَ زَنایه جی دوری هَکُنَن.»

26پس، فردای اون روز پولُس اون آدَمان رِه خودِشِه هَمرهَ بَبِردِه و اوشانِ هَمرهَ تطهیرِ رَسم و رُسومِ بِجا بیاردِه. ایما معبدِ دِلِه بَشَه تا تطهیر تاریخ تمام هَبوسَّنِ روزِ که اون دِلِه هر کدام از اوشانِ رَه قربانی پیشکش بونه با رِه اعلام هَکونه.

27چیزی نُمانِسِّه با تطهیرِ هفت روز تَمام هَبو که چَن یَهودی آسیای منطقه یه جی، پولُسِ مَعبدِ دِلِه بَدییَن. اوشان تمام جَماعتِ آنتریک هَکُردَن و اونِه بِیتَن،

28شول کَشِنِه بان: «اِی یَهودیِان، کمک هَکُنین؛ این هَمونِه که تمام مَردم رِه هَمِه جا اَمِی قوم و اَمِی شریعَت علیه و این مَکان علیه تعلیم دَنِه. پِیش از این یونانیِان رِه مَعبدِ دِلِه بیاردِه و این مقدَّس جا رِه نَجِس هَکردِه.»

29اوشان پِیش تَر تْروفیموسِ اَفِسُسی رِه شَهرِ دِلِه پولُسِ هَمرهَ بَدیه بان و خیال هَکُردَن پولُس اونِه مَعبدِ دِلِه بَبِردِه.

30تمام شَهر شلوغ هَبا! مَردم هر طرف جی هجوم بیاردِن و پولُسِ بِیتَن، مَعبدِ جی دِرگا بَکِشین و دَرجا مَعبدِ دَرِشانِ خودِشانِ دُمّالسَر دَبِسَّن.

31وَ هَمونجور که خَسَّن اونِه بَکوشَن، رومِ سَربازان فرماندِه رِه خَبَر هَدَئن که تمام اورشلیمِ دِلِه آشوب هَبا.

32اون فَرماندِه بِتیش خودِشِه سَربازان و اَفسَرانِ هَمرهَ جَماعتِ سمت بَشَه. وَختِی جَماعتِ چِشم فَرماندِه و اونِه سَربازانِ بخاردِه، پولُسِ بَزَئنِ جی دَس بَکِشییَن.

33فَرماندِه پِیش بوما و پولُسِ دَسگیر هَکردِه و دَستور هَدَه اونِه دو زنجیلِ هَمرهَ دَبِدَن. ایما بَپرسیِه که اون کیِه و چه هَکردِه.

34جَماعتِ میَن جی هر کی داد زَنِه با و یِچی گونِه با. فَرماندِه که اون همه سَر و صدای جی نَتَّنِسِّه حَقیقَتِ بِفَهمِه، دَستور هَدَه پولُسِ قلعه یه سَمت بَبِرَن.

35وَختِی پولُس قلعه یه پِلِّه یه نَزیکی بَرِسیِه، جَماعت اینقدر عصبانی بان که سَربازان مَجبور هَبان اونِه خودشانِه بالِ سَر بَبِرَن.

36جماعتی که اوشانِ دُمّالسَر هَنِه بان، داد زَنِه بان: «اونِه بَکوشین!»

37هَلَه پولُس رِه قَلعه یه دِلِه نَبِردِه بان که فَرماندِه رِه باگوتِه: «اِجازه دَنی یِچی شِمِرِه باگوم؟» فَرماندِه باگوتِه: «تو یونانی بَلَدی؟

38مَگِه تو هَمون مِصری نییَیی که چَن وَخت پیش شورِش هَکردِه و چهار هِزار تا آدمکشِ خودِشِه هَمرهَ صَحرای دِلِه بَبِردِه؟»

39پولُس جِواب هَدَه: «مَن یَهودیمِ و کیلیکیه‌ تارسوسِ جی هیسَم، شَهری که بی‌نام و نِشان نیِه. خواهش کانَم اِجازه هَدین مَردُمِ هَمرهَ گَب بَزِنَم.»

40وَختِی فَرماندِه اِجازه هَدَه، پولُس پِلِّه‌ یه سَر بیِسَا و خودِشِه دَسِ مَردُمِ سَمت تِکان هَدَه، وَختِی همه جا کُلاً ساکِت هَبا، عبرانیانِ زَبانِ هَمرهَ اوشانِه اینجور باگوتِه:

← Chapter 20 Jump to: Chapter 22 →