2 Chronicles 18

Nuer Bible © Bible Society in South Sudan 1998,2012

← Chapter 17 Jump to: Chapter 19 →

1Kä täämɛ Yɛ-ɣo-ca-pat cɛ tekɛ ria̱ŋ mi di̱i̱t kɛnɛ luth. Kä cuɛ kuɛɛn kɛ juɔ̱r, kä kuäär thuk duëli kuec caam ni Ɛ̈-ɣab.

2Kɛ kɔr runi, cuɛ wä kä Ɛ̈-ɣab kä Tha-mɛ-ria. Kä cu Ɛ̈-ɣab ɛ na̱k det kɛnɛ thääk ti ŋuan, kɛnɛ nɛɛkɛ tin te kɛɛl kɛ jɛ, kä cu Ɛ̈-ɣab ɛ go̱r i̱ bikɛ Ra-moth-gil-yad wä mak.

3Kä cu Ɛ̈-ɣab kuäär Juda ni Yɛ-ɣo-ca-pat jiök i̱, “Bi wä kɛɛl kɛ ɣä kä Ra-moth-gil-yad?” Kä cu Yɛ-ɣo-ca-pat ɛ loc i̱, “Ɣän ca̱tdä kɛ ji̱, kä nɛɛkä ce̱tkɛ kɛ nɛɛku. Bakɔ wä ko̱o̱r kɛɛl kɛ ji̱.”

4Kä cu Yɛ-ɣo-ca-pat kuäär thuk duëli kuec caam jiök i̱, “Thiec Kuoth Nhial kɛ nhiam.”

5Kä cu kuäär thuk duëli kuec caam go̱o̱k duɔl guäth kɛl, nɛy ti kur ŋuaan, kä cuɛ kɛ jiök i̱, “Banɛ wä nyiëëny kɛ ji̱ Ra-moth-gil-yad kiɛ /cä bi wä?” Kä cua jɛ loc i̱, “Wër mak nikɛ, bi Kuoth kɛ ka̱m ji̱.”

6Duundɛ ɣöö cu Yɛ-ɣo-ca-pat ɛ thiec i̱, “A kuɛ thil gök Kuɔth Nhial mi tëë wa̱nɛ mi dënɛ thiec?”

7Kä cu kuäär thuk duëli kuec caam ɛ loc i̱, “Te ram kɛl mi denɛ Kuoth Nhial thiec kä jɛ thi̱n, gat Yim-laa ni Mi-ka-yaa a thi̱n. Duundɛ ɣöö lökä jɛ, kɛ ɣöö /kenɛ mi gɔaa met lat kɛ kui̱dä, la latdɛ ni ti jiäk gua̱thni diaal.” Kä cu Yɛ-ɣo-ca-pat wee, “Kuäär /cu jɛ lar inɔ.”

8Kä cu kuäär thuk duëli kuec caam raan kɔaarɛ cɔl, kä cuɛ jiök i̱, “Wër no̱o̱ŋni Mi-ka-yaa gat Yim-laa kɛ pɛ̈th.”

9Täämɛ kuäär thuk duëli kuec caam kɛnɛ Yɛ-ɣo-ca-pat kuäär Juda tekɛ nyuurä wi̱i̱ kɔamni kuäärädiɛn, kä ca bieyni kuäärä. Tekɛ nyuurä do̱o̱r kɔ̱a̱m bɛɛl thok rɛ̈ɛ̈k Tha-mɛ-ria. Kä lat go̱o̱k diaal ruaacni go̱o̱kä nhiamdiɛn.

10Kä cu Dhid-ki-yaa gat Kɛ-nɛ̈ɛ̈-naa rɔ moc tuɔ̱ŋ yieethä, kä cuɛ wee, “Nɛmɛ ɛ min ci Kuoth Nhial ɛ lar i̱, ‘Kɛ ti̱ti̱ bi ji̱ A-thi-ri-ya joc amäni mi cikɛ däk.’ ”

11Kä cu go̱o̱k diaal lat niɛ nɔ, wä kɛ i̱, “Wër mäkni Ra-moth-gil-yad, bi Kuoth Nhial kɛ ka̱m ji̱ kuäär.”

12Kä cu ram in ci Mi-ka-yaa wä cɔl wee i̱, “Nɛnɛ Mi-ka-yaa, ruac göökni ɛ kɛl mi gɔaa kɛ kuäär. Ku ruacdu jak kä ce̱tkɛ ruacdiɛn, ala ruac mi gɔaa.”

13Duundɛ ɣöö cu Mi-ka-yaa wee i̱, “Ce̱tnikɛ ciöt Kuɔth Nhial, mɔ bi Kuothdä jɛ la̱rä mɔ ɛ jɛn bä lat ni jɛ mɔ.”

14Kä min cɛ cop kä kuäär, cu kuäär ɛ jiök i̱, “Mi-ka-yaa banɛ wä nyiëëny kɛ ji̱ Ra-moth-gil-yad, kiɛ /cä bi wä?” Kä cuɛ loc i̱, “Wër mak nikɛ, bakɛ ka̱m ji̱.”

15Duundɛ ɣöö cu kuäär ɛ jiök i̱, “Kä ca ku lɛ ruac kɛ ji̱ nikä di, kä thilɛ mi la latdi kɛ ɣä, la latdi ni thuɔ̱k kɛ ciöt Kuɔth Nhial?”

16Kä cu Mi-ka-yaa wee, “Ɣän ca ji̱ thuk duëli kuec caam diaal nɛn, cikɛ däk wuɔ̱thni päämni ce̱tkɛ det ti thil yiëën. Kä cu Kuoth Nhial wee, ‘Kɛn nɛy ti̱ti̱ thilɛ kɛ bo̱o̱th. Ɛ ramɔ loc dhɔrɛ kɛ mal.’ ”

17Kä cu kuäär thuk duëli kuec caam Yɛ-ɣo-ca-pat jiök i̱, “Ka̱n jɛ la̱r ji̱ ɛn ɣöö /cɛ mi gɔaa dëë lat kɛ kui̱dä, bɛ lat ni mi jiääk?”

18Kä cu Mi-ka-yaa wee, “Kɛ kui̱c ɛmɔ liŋ ruac Kuɔth Nhial. Ɣän ca Kuoth Nhial nɛn te nyuurä kɔaam kuäärädɛ, kä te jaak nhial diaal cuŋä gëëknikɛ.

19Kä cu Kuoth Nhial wee, ‘Ɛŋa mi bi Ɛ̈-ɣab kuäär thuk duëli kuec caam wä pɛlɔ a bɛ wä ko̱o̱r kä bɛ wä li̱w kä Ra-moth-gil-yad?’ Kä cu ram ɔ nɛmɛ lat, kä cu ram in dɔ̱ŋ min dɔ̱ŋ lar.

20Kä cu yiëë ben cuɔ̱ŋ nhiam Kuɔth Nhial wee i̱, ‘Bä jɛ wä pɛl.’ Kä cu Kuoth Nhial jɛ thiec i̱, ‘Kɛ duɔ̱ɔ̱p in mith?’

21Kä cuɛ wee i̱, ‘Bä wa̱a̱ yiëë kacä mi cieŋ thok gööknikɛ diaal.’ Kä cu Kuoth Nhial wee, ‘Wër biɛ wä pɛl.’ Kä biɛ luäŋ wër lät ni jɛ.

22Kɛ kui̱c ɛmɔ täämɛ, ci Kuoth Nhial yiëë kacä jäk kä thukni gööknikɛ diaal. Kä cɛ mi jiääk lat kɛ kui̱du.”

23Kä cu Dhɛ-dɛ-ki-yaa gat Kɛ-nɛ̈ɛ̈-naa ben thieekä Mi-ka-yaa, kä cuɛ pat ni jio̱mdɛ kä cuɛ, wee i̱, “Ɛ duɔ̱ɔ̱p in mith jiɛc kɛ yiëë Kuɔth Nhial kä ɣä mɔ, a bɛ wä ruac kɛ ji̱?”

24Kä cu Mi-ka-yaa wee i̱, “Biɛ nɛn cäŋ in wi̱i̱ rɔ wä tɛ̱̈ɛ̱̈ rɛy duëël rɛci ɛ.”

25Kä cu kuäär thuk duëli kuec caam wee, “Yianɛ Mi-ka-yaa, kä luɔcɛ jɛ jɔk, nöŋɛ jɛ A-mon ruëëc wec kɛnɛ gat kua̱r ni Yo-ac.

26Kä jiökɛ kɛ ɛn ɣöö, ci kuäär wee, ‘La̱thɛ ram ɛ mi duëël yieenä, kä mocɛ jɛ kɛ mi̱eth mi dak kɛnɛ pi̱w ti tɔt, amäni mi ca luny jɔk kɛ mal.’ ”

27Kä cu Mi-ka-yaa wee, “Mi wi̱i̱ luny jɔk kɛ mal, /ken Kuoth Nhial ruac kɛ ɣä.” Kä cuɛ wee, “Liɛŋɛ mi ca latdɛ yɛn nɛy ti diaal ti̱ti̱.”

28Inɔ cu kuäär thuk duëli kuec caam kɛnɛ Yɛ-ɣo-ca-pat kuäär Juda Ra-moth-gil-yad wä mak.

29Kä cu kuäär thuk duëli kuec caam Yɛ-ɣo-ca-pat jiök i̱, “Ɣän bä rɔ jay, kä bä wä ko̱o̱r, kä ji̱n ciɛŋ bieyniku.” Kä cuɛ rɔ jay. Kä cukɛ wä köör.

30Kä täämɛ cu kuäär A-thi-ri-ya bööth thurbiɛɛlikɛ jiök i̱, “/Cuarɛ nyiëëny kɛ nɛy tin kɔ̱ŋ, a nyiëëny ni yɛn kɛ kuäär thuk duëli kuec caam kärɔa.”

31Kä mëë ci bööth thurbiɛɛli Yɛ-ɣo-ca-pat nɛn, cukɛ wee i̱, “Ɛ thuɔ̱k ɛ jɛn kuäär thuk duëli kuec caam ɛn, cukɛ rɔ̱ ri̱t wä kɛ nyiëëny kɛ jɛ.” Kä cu Yɛ-ɣo-ca-pat wiee, kä cu Kuoth Nhial ɛ luäk. Cu Kuoth kɛ joc kä jɛ,

32kä min ci bööth thurbiɛɛli jɛ nɛn ɛn ɣöö /ciɛ jɛn kuäär thuk duëli kuec caam, cukɛ rɔ ri̱t jucdɛ.

33Kä cuɛ lɛ tekɛ ram mi cu bäärɛ lɛ yuɔr bɛ, cuɛ kuäär thuk duëli kuec caam bär ni röm lääkä kuɛn kuɛɛni kɛnɛ ko̱t kath. Kä cuɛ geer thurbiɛɛlɛ jiök i̱, “Ri̱t ni rɔ gekä naŋ ni ɣä raar rɛy köör, kɛ ɣöö ca ɣä moc kɛ buɔ̱t.”

34Kä cu ko̱r lëëth ɛn cäŋ ɛmɔ, kä cu kuäär thuk duëli kuec caam rɔ bum rɛy thurbiɛɛlɛ lotdɛ ni ji̱ A-thi-ri-ya amäni thiaŋ. Kä cuɛ li̱w konyä ca̱ŋ.

← Chapter 17 Jump to: Chapter 19 →