bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nuer
/
Nuer Bible © Bible Society in South Sudan 1998,2012
/
2 Chronicles 30
2 Chronicles 30
Nuer Bible © Bible Society in South Sudan 1998,2012
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 31 →
1
Ɛ jɛn cu Ɣidh-ki-yaa ji̱ I-thɛ-rɛl kɛnɛ ji̱ Juda diaal, kä cuɛ ji̱ Ɛ-pa-rim kɛ ji̱ Ma-na-thɛ jäk kä warɛgak, kɛ ɣöö deekɛ ben luaak Kuɔth Nhial kä Jɛ-ru-tha-lɛm, kɛ ɣöö deekɛ ŋar ca̱ŋ bälä Kuɔth Nhial Kuoth I-thɛ-rɛl ben ŋar.
2
Kɛ ɣöö ci kuäär kɛnɛ ji̱ kɔaarɛ kɛ nɛy diaal ɛ mat ɛn ɣöö ba ŋar ca̱ŋ bälä ŋar kɛ rɛw päthni.
3
Kä ca dëë ŋar kɛ gua̱a̱thdɛ min wen kɛ ɣöö /ken bööth ti ŋuan rɔ lɛy kä /ken naath rɔ̱ mat kä Jɛ-ru-tha-lɛm.
4
Kä ɛn ca̱r ɛmɔ cua nhɔk ɛ kuäär kɛnɛ nɛy diaal.
5
Kä cukɛ ji̱ I-thɛ-rɛl diaal cɔl, a känɛ jɛ nikä Ber-cɛ-ba cu mäni Daan, kɛ ɣöö dëë naath ben, dëë ŋar ca̱ŋ bälä Kuɔth Nhial Kuoth I-thɛ-rɛl, ben ŋar kä Jɛ-ru-tha-lɛm. /Ka̱nɛ met ŋar ɛ nɛy ti ŋuan, ce̱tkɛ min ca lat.
6
Kä cu nɛy tin ca ja̱k ruac in ca lar ɛ kuäär kɛnɛ ji̱ kɔaarɛ naŋ rɛy cieŋ Juda kɛnɛ I-thɛ-rɛl kɛɛliw, i̱, “Yɛn Ji̱ I-thɛ-rɛl luɔ̱nyɛ kä Kuoth Nhial Kuoth A-bɛ-ram kɛnɛ Ay-dhɛk kɛ Je-kɔb, dɔ̱ŋ bɛ ben kä yɛ, yɛn tin ci kään tetdä kua̱r A-thi-ri-ya.
7
/Cuarɛ bi ce̱tkɛ guuri kɛ gaat muɔɔri, tëë thil ŋa̱th kɛ Kuoth Nhial, Kuoth gua̱ni, mëë cukɛ jak kä riɛk ce̱tkɛ mi cia nɛn ɛ.
8
Kä ɛn täämɛ ɛ wuɔ̱thkun /ci bum ce̱tkɛ mëë te guuri, bia kä Kuoth Nhial. Bia luaak Kuɔth, min cɛ lɛy amäni cäŋ kɛ, kä palɛ jɛ, dɔ̱ŋ bɛ waŋ lɔaacdɛ päl kɛ yɛ.
9
Mi wä yɛn rɔ̱ riet Kuoth Nhial, bi dämuɔɔri kɛ gaatkun gɔɔy jek kä nɛy tin cikɛ pɛc, a bikɛ luny ɛn muun ɛ mi. Kɛ ɣöö Kuoth Nhial Kuothdun gɔaa ɛ, kä tëë kɛ pälikä. Cɛ rɔ bi ri̱t kä yɛ, mi wä yɛn luny kä jɛ.”
10
Kä cu nɛy tin ca ja̱k wä wi̱i̱ni diaal rɛy cieŋ Ɛ-pa-rim kɛnɛ Ma-na-thɛ, a räth nikä Dhɛ-bu-lun. Duundɛ ɣöö cu naath kɛ dɔl, kä cua kɛ buy.
11
Kä cu tha̱a̱ŋ nath kä ji̱ A-cɛr kɛnɛ ji̱ Ma-na-thɛ kɛ ji̱ Dhɛ-bu-lun ben kä Jɛ-ru-tha-lɛm.
12
Kä cu buɔ̱m Kuɔth te kɛɛl kɛ ji̱ Juda, cuɛ kɛ jak kä ka̱pkɛ ruac kua̱r kɛnɛ ji̱ kɔaarɛ kɛ lɔc kɛl, a guɔ̱ɔ̱rkɛ ruac Kuɔth Nhial.
13
Cu nɛy ti ŋuan rɔ̱ mat kä Jɛ-ru-tha-lɛm kɛ ɣöö ba ŋar mi̱eth mi thil thuɔp ben ŋar kɛ rɛw päthni.
14
Kä cukɛ yi̱kni tin te kä Jɛ-ru-tha-lɛm, kɛnɛ yi̱kni tin la wäl in kur kur a waŋkɛ thi̱n naŋ ni lo̱o̱lä Kid-ron.
15
Kä cukɛ ruath dɛ̈ɛ̈l rɔɔmä ŋarä ca̱ŋ bälä näk kɛ cäŋ kä wäl ŋuaan kä pay in rɛwdɛ. Kä cu bööth palä kɛ ji̱ Lii-bay tëë /ken rɔ lɛy po̱c, kɛ ɣöö dëë kɛ muc in waŋkɛ naŋ rɛy luaak Kuɔth Nhial.
16
Kä cukɛ wä gua̱thnikiɛn rɛy luaak Kuɔth, ce̱tnikɛ ŋuɔ̱t Muthɛ raan Kuɔth. Kä cu bööth palä riɛm in ca ka̱m kɛ ɛ ji̱ Lii-bay kith.
17
Kɛ ɣöö ŋuan ni nɛy tin /ka̱n lɛy rɛy matdä, cu ji̱ Lii-bay ruath dɛ̈ɛ̈l rɔɔmä ŋarä ca̱ŋ bälä näk kɛ kui̱ nɛɛni diaal tin /ka̱n rɔ lɛy, kä /ca rueeth deet rɔɔmnikiɛn dëë luäŋ kɛ lëy Kuoth Nhial.
18
Kɛ ɣöö nɛy tin ŋuan nikɛn bäkɛ kä Ɛ-pa-rim kɛnɛ Ma-na-thɛ kɛ Yi-tha-kar kɛ Dhɛ-bu-lun, kɛn nɛy tɔ̱tɔ̱ /ka̱n rɔ̱ lɛy, kä cikɛ mi̱eth ca̱ŋ ŋarä bälä cam, min gua̱c kɛ min ca gɔ̱r. Kä cu kuäär ni Ɣidh-ki-yaa pal kɛ kui̱diɛn i̱, “Kuoth Nhial in gɔaa päli ramɔ ikä,
19
min ci lɔcdɛ ka̱m ji̱n Kuoth, min la Kuoth Nhial, Kuoth gua̱ni, a cäŋ ni mɔ /cikɛn gɔw ɔ.”
20
Kä cu Kuoth Nhial pal Ɣidh-ki-yaa liŋ. Kä cuɛ naath pälikä.
21
Kä cu ji̱ I-thɛ-rɛl tin ci ben kä Jɛ-ru-tha-lɛm, cäŋ ŋarä mi̱eth mi thil thuɔp ŋar kɛ ni̱n bärɔw ti tɛth lo̱ckiɛn. Kä ji̱ Lii-bay kɛ bööth palä puanykɛ Kuoth Nhial ni ciaŋ, kɛ buɔ̱mdiɛn kɛɛliw.
22
Kä cu Ɣidh-ki-yaa ruac liakɛ ji̱ Lii-bay diaal tëë ci ŋäc mi gɔaa nyoth rɛy lätni Kuɔth Nhial. Kä cu naath mi̱eth ŋarä cam kɛ ni̱n bärɔw, kä thöpkɛ muc nyuaakä, kä puanykɛ Kuoth Nhial, Kuoth gua̱ni.
23
Ɛ jɛn cu duɔl kɛɛliw ɛ mat i̱ ba ŋar nyɔk kɛ ni̱n bärɔw ti kɔ̱kiɛn. Kä cukɛ rɔ̱ nyɔk kɛ ŋar kɛ tɛth lɔaac mi di̱i̱t kɛ ni̱n bärɔw ti kɔ̱ŋ.
24
Kä cu kuäär ni Ɣidh-ki-yaa thääk ti bathdɔɔr kɛl, kɛ det ti bathdɔɔri bärɔw, ti la muc thöp Kä cu bööth duɔl moc kɛ thääk ti bathdɔɔr kɛl kɛ det ti bathdɔɔri wäl. Kä cu bööth palä ti ŋuan rɔ̱ lëy Kuoth Nhial.
25
Kä cu buɔ̱n ji̱ Juda diaal, kɛ bööth palä kɛ ji̱ Lii-bay kɛ buɔ̱n ji̱ I-thɛ-rɛl, kɛ nɛy tin cieŋ muun I-thɛ-rɛl kɛ nɛy tin cieŋ kä Juda lo̱ckiɛn tɛɛth ɛlɔ̱ŋ.
26
Inɔ cuɛ tekɛ tɛth lɔaac mi di̱i̱t kä Jɛ-ru-tha-lɛm, kɛ ɣöö nikɛ ni̱n ruëc Thɔ-lo-mon gat Dee-bid kuäär I-thɛ-rɛl, thilɛ mi ce̱tkɛ nɛmɛ mi ca kɔn la̱t kä Jɛ-ru-tha-lɛm.
27
Kä cu bööth palä kɛnɛ ji̱ Lii-bay rɔ̱ jiɛc, kä cua naath poth, kä cua paliɛn liŋ ɛ Kuoth ni nhial guäth cieŋädɛ.
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 31 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36