2 Chronicles 23

Nuer Bible © Bible Society in South Sudan 1998,2012

← Chapter 22 Jump to: Chapter 24 →

1Kɛ bärɔw runi, cu Yɛ-ɣo-ya-da rɔ bum, kä cuɛ ruac mat kɛnɛ bööth kur, Ä-dhar-yaa gat Yɛ-ro-ɣaam kɛnɛ I-ca-mel gat Yɛ-ɣo-ɣa-nan kɛ Ä-dhar-yaa gat O-bɛd kɛnɛ Mɛ̈-the-yaa gat Ä-da-yaa kɛ Ɛ-li-ca-pat gat Dhik-ri.

2Kä cukɛ wä rɛy cieŋ Juda kɛɛliw, cukɛ ji̱ Lii-bay tin cieŋ rɛy cieŋ Juda kɛɛliw thol, kɛ bööth thuk duëli ji̱ I-thɛ-rɛl, kä cukɛ ben kä Jɛ-ru-tha-lɛm.

3Kä cu duɔl kɛɛliw ruac mat kɛ kuäär rɛy luaak Kuɔth. Kä cu Yɛ-ɣo-ya-da kɛ jiök i̱, “Bi gat kua̱r ruëc ce̱tkɛ mëë ci Kuoth Nhial ɛ lar kɛ kui̱ gan Dee-bid.

4Kä täämɛ nɛmɛ ɛ min bia la̱t. Kä yɛn bööth palä kɛ ji̱ Lii-bay tin bi lät kɛ cäŋ lɔ̱ŋä, a buɔ̱n kɛl gaŋkɛ thok luaak.

5Kä bi buɔ̱n in dɔ̱ŋ te dhɔr kua̱r, kä bi buɔ̱n thok in di̱i̱t gaŋ, kä bi nɛy diaal te rɛy kal luaak Kuɔth Nhial.

6Kä a thil ram mi wä rɛy luaak Kuɔth Nhial ɛ ni bööth palä kɛnɛ ji̱ Lii-bay tin lät, kɛ ɣöö kɛ nɛy ti ca lɛy. Kä bi nɛy diaal min ci Kuoth Nhial Ɛ ka̱mkɛ gaŋ.

7Kä bi ji̱ Lii-bay kuäär go̱l kä te ramɔ yio̱o̱kɛ tetädɛ, kä ramɔ bi ben dueelɔ ba jɛ näk. Ta̱yɛ kɛɛl kɛ kuäär gua̱thni diaal tɔ̱ wëë thi̱n tɔ̱.”

8Kä cu ji̱ Lii-bay kɛ ji̱ Juda diaal la̱t ni min ci bo̱o̱th palä ni Yɛ-ɣo-ya-da ɛ lar. Kä cu ramɔ nɛɛkɛ na̱ŋ tin thuk kɛ la̱t kɛ cäŋ lɔ̱ŋä kɛnɛ tin wä lät kɛ cäŋ lɔ̱ŋä, kɛ ɣöö /ken bo̱o̱th palä ni Yɛ-ɣo-ya-da buɔ̱n ni jak kä däk piny.

9Kä cuɛ bo̱o̱th palä kɛ ka̱m yio̱w kɛnɛ köötni tëë la nyin kua̱r ni Dee-bid tëë te rɛy luaak Kuɔth, tin di̱t kɛnɛ tin tiɛtni.

10Kä cuɛ nɛy diaal jak kä gaŋkɛ kuäär a te ramɔ yio̱o̱kɛ tetädɛ, a känɛ jɛ ni kui̱c cuëëc luaak amäni kui̱c caam luaak, kam yi̱kä kɛnɛ luak.

11Kä cuɛ gat kua̱r nööŋ raar, kä cuɛ kum kuäärä la̱th wi̱i̱dɛ, kä cuɛ jɛ ka̱m bok ŋuɔ̱tni. Kä cukɛ jɛ jak kä kuäär, kä cu Yɛ-ɣo-ya-da kɛnɛ gaatkɛ jɛ yier, kä cukɛ wee, “Bi kuäär jääny kɛ tëk.”

12Kä min ci Ä-thɛ̈l-yaa rɔal nath liŋ kä wurkɛ kä liakɛ kuäär, cuɛ ben kä naath luaak Kuɔth Nhial.

13Kä min cɛ guic cuɛ kuäär nɛn tëë cuŋä gekä rikädɛ thok luaak Kuɔth Nhial, kä te bööth kɛnɛ kuɔ̱ɔ̱th kaaŋni gekä kua̱r, kä ji̱ wec diaal ŋar kɛ kä kuɔthkɛ kaaŋni, kɛ ji̱ kët din kɛ thuɔmnikiɛn ŋar kɛ. Kä cu Ä-thɛ̈l-yaa bieynikɛ rɛ̈t kɛ jiath lɔaac wieeɛ i̱, “Ɛ ca̱p mi jiääk! Ɛ ca̱p mi jiääk!”

14Kä cu bo̱o̱th palä ni Yɛ-ɣo-ya-da bööth kuri tin te wi̱i̱ rɛ̈m cɔl, kä cuɛ kɛ jiök i̱ “Naŋɛ jɛ kɛ kam bëëri, kä ramɔ bi jɛ guɔ̱ɔ̱rɔ na̱kɛ jɛ.” Kɛ ɣöö ci bööth palä wëë, “/Cuarɛ jɛ näk rɛy luaak Kuɔth Nhial.”

15Kä cua jɛ käp, kä min cɛ cop thok kal jiöŋkööri gekä dhɔaar kua̱r, cua jɛ näk thi̱n.

16Kä cu Yɛ-ɣo-ya-da ruac mat kɛnɛ naath kɛ kuäär kɛ ɣöö bikɛn a nɛɛ Kuɔth Nhial.

17Kä cu nɛy diaal wä duëël kuɔth Baal kä wa jɛ da̱k piny. Kä cukɛ yi̱kni Baal kɛnɛ puɔ̱nydɛ tiëëth ni ŋëëtni, kä cukɛ bo̱o̱th palädɛ ni Mɛ̈-tan näk nhiam yi̱kni.

18Kä cu bo̱o̱th palä ni Yɛ-ɣo-ya-da bööth palä tin la ji̱ Lii-bay ka̱m ti̱et luaak Kuɔth Nhial, tëë ci Dee-bid kɛ ka̱m la̱t luaak Kuɔth, kɛ ɣöö ba Kuoth Nhial thöp muc tin waŋkɛ, ce̱tnikɛ min ca gɔ̱a̱r rɛy buɔk ŋuɔ̱tni Muthɛ, kɛ tɛ̈th lɔaac kɛ kët din ce̱tnikɛ mëë ci Dee-bid ɛ lar.

19Kä cuɛ ga̱a̱ŋ la̱th thukni luaak Kuɔth Nhial, kɛ ɣöö bɛ thil ram mi ci rɔ yia̱r kɛ duɔ̱ɔ̱r mi bi wä rɛy luaak.

20Kä cuɛ bööth rɛ̈m kɛnɛ bööth nath kɛ ruëëc nath kɛ nɛy diaal, cua kuäär ben naŋ rɛy luaak Kuɔth Nhial, cukɛ wä dhɔr kua̱r kɛ duɔ̱ɔ̱p nhial. Kä cua kuäär nyuɔ̱ɔ̱r wi̱i̱ kɔam kuäärä.

21Kä cu nɛy diaal lɔcdiɛn tɛɛth. Kä cu wec rɔ pa̱l piny mëë ca Ä-thɛ̈l-yaa näk.

← Chapter 22 Jump to: Chapter 24 →