bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nuer
/
Nuer Bible © Bible Society in South Sudan 1998,2012
/
2 Chronicles 34
2 Chronicles 34
Nuer Bible © Bible Society in South Sudan 1998,2012
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 35 →
1
Kä mëë took Yo-ci-yaa kuäär, tëë kɛ run bädäk, kä cuɛ ruëc kä Jɛ-ru-tha-lɛm kɛ run ti jiɛn diɔ̱k wi̱cdɛ kɛl.
2
Kä cuɛ la̱t ni gɔy nhiam Kuɔth Nhial, cuɛ guɔ̱ɔ̱r ni dup gua̱n ni Dee-bid. Kä /kenɛ rɔ ri̱t kɔɔr Kuɔth.
3
Kä kɛ bädäk runi ruecdɛ mëë ŋotdɛ ɛ dhɔl mi tɔt, cuɛ Kuoth gua̱n ni Dee-bid tok kɛ mi palɛ jɛ. Kä kɛ wäl rɛw runi ruecdɛ, cuɛ tok kɛ mi däkɛ gua̱th pali kuthni baaŋ Juda kɛnɛ Jɛ-ru-tha-lɛm kɛ kuoth Ä-ce-rim Kɛ kuth jiɛn kɛnɛ tin ca täth kɛ yiëëth.
4
Kä cua yi̱kni kuɔth Baal däk kä piny kɛ ruacdɛ. Kä cuɛ yi̱kni tin la wal a waŋkɛ thi̱n ciel kä piny wi̱i̱diɛn. Kä cuɛ kuoth Ä-ce-rim to̱l kä piny kɛnɛ kuth tin ca la̱t kɛ jiɛn kɛnɛ yiëëth kä cuɛ kɛ yuɔr wi̱i̱ muɔ̱ni nɛɛni tëë la thöpkɛ kɛ muc.
5
Kä cuɛ cɔ̱w bööthni palikiɛn waŋ wi̱i̱ yi̱knikiɛn. Inɔ cuɛ Juda kɛnɛ Jɛ-ru-tha-lɛm jak kä gɔaa.
6
Kä cuɛ la̱t nin, kä wi̱i̱ Ma-na-thɛ kɛnɛ wi̱i̱ Ɛ-pa-rim kɛ wi̱i̱ Cim-on aräth ni wi̱i̱ni Nap-ta-li kɛ wi̱i̱ tin thieek kɛ jɛ,
7
cuɛ yi̱knikiɛn kɛ kuth Ä-ce-rim tiac, kä cuɛ yi̱kni wal ciel kä piny rɛy cieŋ I-thɛ-rɛl kɛɛliw. Kä cuɛ loc kä Jɛ-ru-tha-lɛm.
8
Kä kɛ wäl bädäk runi ruëc Yo-ci-yaa, mëë cɛ wec ku jak kä gɔaa kɛnɛ luak Kuɔth, cuɛ Ca-pan gat Ä-dhɛ̈l-yaa kɛnɛ Mɛ̈-the-yaa ruëëc wec kɛ bulkamiin ni Yo-ac gat Yo-a-ɣadh ja̱k, kɛ ɣöö ba luak Kuɔth Nhial ni Kuothdɛ wä buɔt.
9
Cukɛ ben kä bo̱o̱th palä in di̱i̱t ni Ɣil-ki-yaa, kä cukɛ jɛ ka̱m yio̱w tin ca nööŋ rɛy luaak Kuɔth, tëë ca mat ɛ ji̱ Lii-bay kɛnɛ ga̱a̱ŋ thuɔk luaak kä ji̱ Ma-na-thɛ kɛnɛ ji̱ Ɛ-pa-rim kɛ duɔth ji̱ I-thɛ-rɛl diaal kɛ ji̱ Juda diaal kɛ ji̱ Ben-ya-min kɛ ji̱ Jɛ-ru-tha-lɛm.
10
Kä cua kɛ ka̱m nɛy tin guɛckɛ la̱a̱t luaak Kuɔth Nhial, kɛnɛ nɛy tin buɔtkɛ jɛ.
11
Ŋa̱a̱t jiɛn kɛnɛ ta̱a̱th kɛ ɣöö ba pääm wä kɔk kɛnɛ jiɛn ti ba ben bot ni luak in ci kua̱r Juda jɛ jak kä däk.
12
Kä cukɛ jɛ la̱t agɔaa. Kä cua kɛ guɛc lät ɛ ji̱ Lii-bay ni Yɛ̈-ɣɛ̈th kɛnɛ O-bad-yaa gaat Mɛ-ra-ri, kɛ Dhɛ-kar-yaa kɛnɛ Mɛ-cu-lam gaat Kɛ-ɣath. Kä cu ji̱ Lii-bay diaal tin ŋa̱ckɛ puɔ̱t thuɔmni,
13
nɛy tin guɛc la̱t kɛ, nɛy diaal tin la̱t kɛ lät ti gööl. Kä cu tha̱a̱ŋkiɛn a gɔa̱a̱r kɛ bööth kɛ ga̱a̱ŋ thuɔk luaak.
14
Kä gua̱th in ka̱mkɛ yio̱w tin naŋkɛ rɛy Luaak Kuɔth Nhial raar, cu Ɣil-ki-yaa bo̱o̱th pala bok ŋuɔ̱tni Kuɔth Nhial mëë ca ka̱m Muthɛ jek.
15
Kä cu Ɣil-ki-yaa bulkamiin ni Ca-pan jiök i̱, “Ɣän ca bok ŋuɔ̱tni jek rɛy luaak Kuɔth Nhial.” Kä cuɛ jɛ ka̱m Ca-pan.
16
Kä cu Ca-pan ɛ nöŋ kuäär, kä cuɛ jɛ jiök i̱, “Tëë diaal tëë ci la̱r ji̱ kɔaaru, ca kɛ la̱t.
17
Ca yio̱w tëë ca jek rɛy luaak Kuɔth la̱th tetni nɛɛni tin guɛckɛ la̱t kɛnɛ la̱a̱t.”
18
Kä cuɛ kuäär jiök i̱, “Ci bo̱o̱th palä ni Ɣil-ki-yaa ɣä ka̱m bok.” Kä cuɛ jɛ kuɛn nhiam kua̱r.
19
Kä min ci kuäär rieet buɔk ŋuɔ̱tni liŋ cuɛ bieynikɛ rɛ̈t.
20
Kä cu kuäär ruac kɛ Ɣil-ki-yaa kɛnɛ Ä-ɣi-kam gaat Ca-pan min bulkamiin kɛ Ab-don gat Mi-ka-yaa kɛ Ca-pan bulkamiin kɛ Ä-tha-yaa läät kua̱r i̱,
21
“Wiaa thiecɛ Kuoth Nhial kɛ kui̱dä kɛnɛ nɛy ti ci duɔth ti kä ji̱ I-thɛ-rɛl kɛnɛ Juda, kɛ kui̱ rieetni buɔk ŋuɔ̱tni mi ca jekɛ. Kɛ ɣöö Kuoth Nhial cɛ kɛ̈c kɛ kɔn ɛlɔ̱ŋ, kɛ ɣöö /ken gua̱nikɔn ŋuɔ̱t Kuɔth Nhial tit. Kɛ ɣöö dëë kɛ la̱t ni min ca gɔ̱a̱r rɛy buɔk ɛ mi.”
22
Kä cu Ɣil-ki-yaa kɛnɛ nɛy tin ci kuäär kɛ ja̱k wä kä gök ciek ni Ɣul-daa, ciek Cɛ̈-lum gat Tɔ-kath gat Ɣath-raa gääŋ bieyni luaak Kuɔth (Kä jɛn cieŋɛ dho̱ri tin te bëër in rɛwdɛ kä Jɛ-ru-tha-lɛm) ruac kɛ jɛ.
23
Kä cuɛ kɛ jiök i̱, “Nɛmɛ ɛ min ci Kuoth Nhial Kuoth I-thɛ-rɛl ɛ lari, ‘La̱rɛ jɛ ram in jäk yɛ kä ɣä,
24
ci Kuoth Nhial wee i̱, “Nɛnɛ ɣän bä gua̱a̱th ɛ mi kɛnɛ ji̱kɛ nöŋ riɛk, lam in ca gɔ̱a̱r ɛn rɛy buɔk ɛ mɔ, tin ca kuɛn nhiam kua̱r Juda.
25
Kɛ ɣöö ca ɣä pa̱l ruëëc ɛ waa wa̱ŋ ni kuth ti kɔ̱ŋ wal tin kuɔ̱r kuɔ̱ɔ̱r, kä ca ɣä jak kä gak kɛ lätkiɛn ti jiäk. Kɛ kui̱c ɛmɔ, bä kɛ̈cdä naŋ ɛn guäth ɛmɛ kä /cɛ bi thuɔ̱k.”
26
Kä kɛ kui̱ kua̱r Juda min ci yɛ ja̱k kɛ ɣöö bia Kuoth Nhial ben thiec, bia la̱r mɛmɛ ci Kuoth Nhial ni Kuoth I-thɛ-rɛl nɛmɛ lar, “Kɛ kui̱ ruac in ci liŋ,
27
kɛ ɣöö cɛ rɔ ri̱t kä cɛ rɔ jak kä muɔ̱l nhiam Kuɔth mëë ci rieet ti̱ti̱ liŋ kɛ kui̱ wec ɛmɔ kɛnɛ ji̱kɛ. Kä curi rɔ jak kä kui̱c nhiamdä, kä ci bieyniku rɛ̈t, kä ci wiee nhiamdä, ɣän ca ji̱ liŋ,” ruac ni Kuoth Nhial.
28
“Kɛ kui̱c ɛmɔ ɣän bä jɛ mat kɛ gua̱ni. Bɛ wä kɔ̱kdɛ nikɛ mal, /cɛ jiäk diaal tin bä nööŋ ɛn wi̱c ɛmɛ bi nɛn kɛ waŋdɛ.” ’ ” Kä cukɛ thok luɔ̱c kuäär.
29
Kä cu kuäär bööth Juda kɛnɛ Jɛ-ru-tha-lɛm cɔl.
30
Kä cuɛ wä rɛy luaak Kuɔth Nhial kɛɛl kɛ ji̱ Juda diaal kɛnɛ ji̱ Jɛ-ru-tha-lɛm diaal kɛ bööth palä kɛ ji̱ Lii-bay diaal, kɛ nɛy diaal tin di̱i̱t ɛnɛ tin tiɛtni. Kä cuɛ rieet buɔk ŋuɔ̱tni diaal min ca jëk rɛy luaak Kuɔth Nhial kuën kɛ.
31
Cu kuäär rɔ jiɛc gua̱a̱thdɛ, kä cuɛ mat ruac lat nhiam Kuɔth Nhial, kɛ ɣöö bɛ guɔ̱ɔ̱r ni Kuoth Nhial kä bɛ tit ni luëëkɛ kɛnɛ ŋuɔ̱tkɛ kɛ lɔcdɛ kɛɛliw kɛnɛ ca̱rɛ kɛɛliw, kɛ ɣöö bɛ rieet ŋuɔ̱tni tin ca gɔ̱r rɛy buɔk ɛmɛ la̱t.
32
Kä cuɛ nɛy diaal tin te wa̱nɛ mɔ kä ji̱ Jɛ-ru-tha-lɛm kɛnɛ ji̱ Ben-ya-min jak kä tiɛtkɛ jɛ. Kä cu ji̱ Jɛ-ru-tha-lɛm la̱t ni min la mat ruac kɛ Kuoth Nhial, Kuoth gua̱ni.
33
Kä cu Yo-ci-yaa kuth guäyni diaal däk, tin te rɛy wi̱i̱ni tin cieŋ ji̱ I-thɛ-rɛl thi̱n. Kä cuɛ ji̱ I-thɛ-rɛl diaal jak kä ŋa̱thkɛ ni Kuɔth Nhial, Kuothdiɛn kɛ ni̱n Yo-ci-yaa diaal /ken ji̱ I-thɛ-rɛl Kuoth Nhial Kuoth gua̱ni palɛ päl.
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 35 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36