Hosea 14

Romani Baltic Latin (Biblija - Pe Baltitko Romani čib (Romanes) 2019)

← Chapter 13 Jump to:

1[13.16-ju.o.] Manušá Samarijatyr javéna bangé paldová, so jone kerdé búnto proti léngire Devléste. Jone peréna kurtalátyr, léngire bijaty javéna rosčingirde (pekade) pe koterá, i léngire pharé džuvliatyr otlena tyknemasen.’

2O Izrailie! Risjov pale ke Raj Devél, tyró Devél, pal-dová so tu obštadianpe ĥerjasa pal péskiro čoripén.

3Len pésa mangipnytka lavá i risjon pale ke Raj Devél, rakirén Léske: “Otmek aménge saró čoripén i prilé amen laskasa, sob (kaj) aménge te janas svénta dyibená amaré uštendyr.”

4Asuro (Asirija) butýr na javéla te rakhél amen, ame na javása te tradas uklisté, i ame na javása butýr te rakiras pe butý amaré vastengiri: ‘Tumé san amaré develá’; pal-dová so i piroty (bidadengire čhavoré) lathéna láska Túte.”

5Me sastiakirava len daléstyr, so jone otpyne (durine) Mándyr, Me sykaváva láska lénge iléstyr; pal-dová so Mirí xolý risijá krig léndyr.

6Me javáva sýrby pahlyn (rosa) vaš Izrailjo i jov javéla te luludjol syr lilija, i jov mekéla péskire kórni (rukhá) sýrby drevy pe Liváno.

7Léskire randiá (vétki) rozbugljona (rozmekenape), i léskiri šuk (gožyma) javéla sýrby maslinitko kašt i léskiro lačhé – sungakiro khandypen (parfuny) javéla sýrby kiedrendyr pe Liváno.

8Jone, savé javéna te dživén tel Mirí zer (zasienka), risjona i jone javéna te otdžidjon sýrby giv, i javéna te barjon sýrby vinagradýtko kašt. Jone javéna lačhés te pahnison sýrby mol (vino) Livanostyr.”

9Jefriémo phenéla: ‘So mánge iščo (inké) trej idolendyr?’ Me otphenava léske: ‘Me javáva te šunav, i te dykháv pal túte? Me javáva syr kipariso, savó rozmekcia, Raj Devél, patria (listy). Mándyr javéna túte baritka (plódy).’

10Kon isyn godó, sob (kaj) jov te ĥaljol saré dalé lavá? Kon isyn baré-godiákiro, sob (kaj) jov te džinél davá saró? Pal-dová so Ráskire-Devléskire dromá isyn čačuné, i čačipnaskire manušá psiréna pir lénde, ne čoripén-keribnaskire obštavenape pir lénde.

← Chapter 13 Jump to: