Hosea 7

Romani Baltic Latin (Biblija - Pe Baltitko Romani čib (Romanes) 2019)

← Chapter 6 Jump to: Chapter 8 →

1Kiéli Me sastiakiravas Izrailjo, tedy xohaibén [čoripén-ju.o.] Jefriemoskiro otkerdiape / sykadyjá i fuipén Samarijakiro. Pal-dová so jone keréna xohanés, lénde isyn čora, savé phagirena kherá, i rozmaribnari (šajka rozmaribnytko) peréla javrí pe manušénde.

2Jone na duminéna dre péskire ile, so Me ripirava saró léngiro fuipén; akane léngire réndy isyn trusciál (vokrug) lénde; jone isyn saré angíl Mánde.

3Jone radynena kralís léngire fuipnasa, i thagar'jen léngire xohaibnasa.

4Jone xačona te kerén biladžaipén sýrby bov, savó roshačkirdia pekibnaskiro (piekarjo) – ĥáda, jov pirijaciá te kerél butedýr jag paló dová, syr zamiešyndlo xumer (tiasto) ĥazdélape.

5Pe svenkitko dyvés amaré kralíste, e thagárja (kniázi) nasvaliakirde les, matiakirde moliasa (vinosa); i jov lyjá te tyrdel péskiro vast ke odolé, savé xoliames sanape léstyr.

6Jone roshačkirena péskiro iló sýrby bov, kiéli jone podrakhena te zamarén: léngiro pekibnaskiro (piekarjo) sovela sarí rat, ne tasiárles (pe zlóko) jov xačola syr bari jag.

7Jone isyn xačkirdé syr bov, i jone pohane péskire sendar'jen. I léngire králja pyné, nane nijékh manúš maškír lénde te kharel Man.

8O Jefriémo khetaniakirdiape (zmiešyndia pes) maškír Najudytkoné manušénde; Jefriémo isyn sýrby paramo [maró-r.s.], so pekelape napiriskirdo.

9Javiré – theméskire (čúža) manušá pohane léskiri zor, ne jov na džinéla dová. Léste isyn syva balá adáj i odój, ne jov na džinéla davá.

10Izrailjoskiro phut'kiribén dophenéla dro muj léskire manušénge, ne jone na risiné pale ke Raj Devél, léngiro Devél, i jone na rodéna Les dro saró davá.

11Jefriémo adiáke-pac' isyn sýrby dylynin'ko golumbo, savéste nane godý: jone kharéna Jegípto, ne jone džána ke Asirija.

12I kiéli jone džána, Me čhurdava Mirí khudý (siet') te uhtylav len; Me tyrdava telé len syr bolybnytkone čiriklien, savé isyn dro fáno (vozduho). Me pirisykliakirava len ke dukhá, kiéli léngiro skedyibén šunéla pal davá.

13Bida pe lénde, pal-dová so jone otginé [našné-ju.o.] Mándyr! Xasibén pe lénde, pal-dová so jone kerdé čoripén proti Mánde! Na dykhí pe dová, so Me vyrakhcjom len, usajékh jone rakirdé xohaibén proti Mánde.

14Jone na khardé zoralés Man saré léngire iléstyr, kiéli jone tugindle jasvénca pe péskire čhuibena. Jone kedenaspe khetané pal maró (givá) i mol (vino), i jone keréna búnto proti Mánde.

15Na dykhí pe dová, so Me sykliakirdjom len ke dukhá, i zoraliakirdjom Me léngire vastá, ne jone priduminenas čoripén proti Mánde.

16Jone risiné pale, ne na ke Sámo Barydyr; jone isyn syr došvalo lúko. Léngire thagárja peréna kurtalátyr pal péskiri čib, so rakirdiá xoliamipen (dierzosti). Pe phuv Jegiptóskiri léndyr javéna te sanpe.

← Chapter 6 Jump to: Chapter 8 →