Hosea 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1‘Šunén davá, rašajale! Pričhuvén kan, kher Izrailjoskiro! Rikirenpe ke dová, so šunéna, o kher kralískiro! Pal-dová so séndo javéla proti tuménde, pir-dová so tumé sánas sýrby felý (pietlia) dre Masífa (Micpa) i sýrby khudý (siet') pe Favoro.

2Jone xor zaginé dro bléndo [buntyibnarja but zamarena vaš svénta dyibená-ju.o.], ne Me bangiakirava len sarén.

3Me džinóm Jefriemos, i Izrailjo isyn na garadó Mándyr, i akaná, Jefriémo, tu kerésa biladžakuné réndy, a Izrailjo isyn magirdó.

4Dová, so jone keréna, na domekela len te risjon ke léngiro Devél, pal-dová so dúho (fáno) te kerél biladžaipén, isyn maškír lénde, i jone na džinéna Ras-Devlés.

5Phut'kiribén Izrailjoskiro tykniakirdo dre léngire jakhá [dophenéla léskire manušénge dro muj-ju.o.], na dykhí pe dová, so Izrailjo i Jefriémo obštavenape (peréna) dro léngiro čoripén; i Juda obštavelape adiáke-pac' lénca.

6Jone javéna te rodén Ras-Devlés léngire bakréngire stadenca i tabunenca, ne jone na lathéna Les; Jov risijá (otgijá) krig léndyr.

7Jone jačkirdé (parude) napatiaibnytkes Ras-Devlés; pal-dová, so lénde lathnepe khelby (niezakonna bijaty): akaná nevó-čhonytko svénko pohala len i léngiro mištypén.

8Phurdén dro bakrano rógo dre Givá, phurdén dro rógo (truba), dre Ráma; den gódla zoralés dro Bief-Aveno, dykh ža palál pal péste, o Vieniamino!

9Jefriemostyr jačélape golotýnia (čhučipen) dro dyvés, syr Me bangiakirava len; maškír ródycy Izrailjoskire Me phendjom, so davá javéla čačes.

10Thagárja Judáskire isyn sýrby kodolé, kon durjakirdia špery (znaki) pe phuv: Me vyčhuvava Miro mižehipen (mižeh xolý) i pe lénde syr paní.

11O Jefriémo, pritasado, séndo pekadiá zoralés les, pir-dová, so jov iléstyr lyjá te psirél pir manušýtko uphenybén.

12Me javáva sýrby mol' (mel') vaš Jefriemoske, i sýrby kirmo [kirnypen-ju.o.] vaš kher Judáskiro.

13Kiéli Jefriémo dykhciá péskiri dukh, i Juda dykhciá péskiro fránso (rana), tedy gijá Jefriémo ke Asuro, i bičhadiá pal kralíste Iarievoste (Jarievoste), ne jov na déla ráda te sastiakirel tumen, ci te drabakirel tumen tumaré riskirdé fransostyr (ranatyr).

14Pal-dová so Me javáva sýrby ščer (liévo) pe Jefriemoste, i syr ternó ščeroro pe Judáskiro kher. Me až roskušava len i džáva krig, i Me lydžáva krig len, i odój na javéla nijékh te rakhél len.

15Me džáva krig, Me risjováva pe Miro štéto angíl dová, syr jone pridžinena péskiri bang [léngiro čoripén-ju.o.] i javéna te rodén Miro muj: kiéli len pritasavéna, jone javéna dobusóves te rodén Man.

← Chapter 4 Jump to: Chapter 6 →