Leviticus 11

Romani Baltic Latin (Biblija - Pe Baltitko Romani čib (Romanes) 2019)

← Chapter 10 Jump to: Chapter 12 →

1I phendiá Raj Devél Mojzáske i Aaronóske, rakirí lénge:

2“Phenén Izrailjoskire čhavénge: ‘Ĥáda, isyn murdalá (žyvotna), savén saštý tuménge te xan saré murdaléndyr pe phuv:

3kažno kherítko murdál (skoto), savéste isyn roskerdo kopyto (naj), i pe kopyty isyn xor rosčhinyben (razriezo), i savó žujskirela žvačka, xan;

4iekhe dolen na xan kodolendyr, savé žujskirena žvačka, i savénde isyn na roskerdo kopyto: vierbliudos, pal-dová so jov žujskirela žvačka, ne kopyto léste naroskerdo, nažužo jov isyn vaš tuménge;

5i tuškančykos, pal-dová so jov žujskirela žvačka, ne kopyto léste naroskerdo, nažužo jov isyn vaš tuménge,

6i šušujos (zajcos), pal-dová so jov žujskirela žvačka, ne kopyto léste naroskerdo, nažužo jov isyn vaš tuménge;

7i balyčen, pal-dová so kopyto lénde roskerdo i pe kopyto isyn xor rosčhinyben (razriezo), ne jone na žujskirena žvačka, nažužé jone isyn vaš tuménge;

8mas léngiro na xan i ke trúpy léngire na pričilavenpe; nažužé jone isyn vaš tuménge.

9Saré murdaléndyr (žyvotnendyr), savé isyn dro paní, xan dolen: savénde isyn pora i češuia dro paní, dro mórjo (derjáv) ci dre reka (len'), dolen xan;

10a saré dolé, savénde nane pora i češuia, dro mórjo (derjáv) ci dre réki (leniá), kon plyvinela dro paní i saréndyr, kon dživéla dro paní, magirdé jone isyn vaš tuménge;

11jone isyn bangé (musinen) te javén magirdé vaš tuménge: mas léngiro na xan, i léngire trupendyr gidinenpe;

12saré murdalá (žyvotna), savénde nane pora i češuia dro paní, magirdé jone isyn vaš tuménge.

13Gidinenpe dalé čirikliendyr: orlostyr (kidostyr), grifostyr i morjoskire (derjavéskire) orlostyr (kidostyr),

14kaĥnialestyr (koršunostyr), i sokolostyr léskire rodosa,

15kažnoné korakostyr (voronostyr) léskire rodosa,

16strausostyr, sovatyr, čajkatyr, i jastriebostyr (kaĥnialestyr) léskire rodosa,

17filinostyr, mačheskire staribnaristyr i ibisostyr,

18liebiedjostyr, pieliekanostyr i sipostyr,

19butianostyr (capliatyr), zujostyr léskire rodosa, udodostyr i nietopyrjostyr (vurniaibnytkone kar-musostyr).

20Saré murdalá (žyvotna), savé polzynena, vurniana, psiréna pe štar ĥerá, magirdé isyn vaš tuménge;

21saréndyr, savé polzynena, vurniana, psiréna pe štar ĥerá, kodolén jekhe xan, savénde isyn lytki vučedýr ĥerendyr, sob (kaj) lénca te uhten pir phuv;

22adalen xan léndyr: saranča lákire rodosa, solamos lákire rodosa, xargolos (xruščos) lákire rodosa, i xagabsa lákire rodosa.

23Kažno javír vurniaibnytko, savó polzynela, savéste isyn štar ĥerá, magirdó isyn vaš tuménge.

24Léndyr tumé javéna nažužé: kažno, kon pričilavelalape ke léngiro trúpo, nažužo javéla ke bel'vél';

25i kažnonéske, kon léla léngiro trúpo, trej te obmorel péskiri ídia, i nažužo javéla ke bel'vél'.

26Kažno murdál, savéste kopyty (naja) roskerde pe duj (razdvoiena), ne savéste nane baró ročhinyben (razriezo), i savó na žujskirela žvačka, nažužo isyn vaš tuménge: kažno, kon čilavéla les, javéla nažužo.

27Saré murdaléndyr, savó psiréla pe štar ĥerá, pe lapy, kon psiréla, dová nažužo isyn vaš tuménge: kažno kon čilavéla léngiro trúpo, odová javéla nažužo ke bel'vél'. Jov isyn nažužo vaš tuménge.

28Kon léla léngiro trúpo, odoléske trej te obmorel péskire ídi, i nažužo jov javéla ke bel'vél', nažužé jone isyn vaš tuménge.

29Ĥáda, so javéla nažužo vaš tuménge murdaléndyr (žyvotnenendyr), savé polzynena pir phuv: kroto, karmus (myšo), jaščerka lákire rodosa,

30anaka, xamielieono, lieta (lietaho), xomieto i tinšemieto,

31dalé isyn nažužé vaš tuménge saréndyr, savé polzynena: kažno, kon pričilavelape ke jone mulé, nažužo javéla ke bel'vél'.

32I saró, pe so peréla vari-so léndyr muléndyr, kažno khoró (sasudo) vešéstyr, ci ídia, ci cýpa, ci gonó, i kažno viešč, saví trej pe réndo, javéna nažužé: dro paní trej te čhuvén len, i nažužé javéna jone ke bel'vél', korigedýr (pozžiedyr) jone javéna žužé;

33kóli vari-so léndyr peréla dro savó-libo khoró glinatyr (ĥlejatyr), tedy so isyn dre léste, javéla nažužo, i kokoró khoró (sasudo) rozmaren.

34Kažno xabén, savó xána, pe savó sys paní dasavé khorostyr, nažužo javéla, i kažno pibén, savó p'jena, dro kažno dasavo khoró, nažužo javéla.

35Saró, pe so peréla vari-so léndyr léngire trupostyr, nažužo javéla: bov i bovoro trej te rosphagiren, jone javéna nažužé: i jone isyn te javén nažužé vaš tuménge;

36ĥanyngori (istočniko) i ĥanýng kokori, dre so isyn paní, jačénape žužé; a kon pričilavelape ke léngiro trúpo, odová jačélape nažužo.

37I kóli vari-so léngire trupostyr peréla pe vari-saví ziárka (siemjo), saví čhuvéna dre phuv, tedy joj iavéla žužy;

38ne kóli tedy, syr paní čhudo pe ziárka, peréla pe léste vari-so léngire trupostyr, to joj (ziárka) javéla nažužy vaš tuménge.

39I kiéli murdjola vari-savó kherítko murdál (skoto), savó tumé xána, tedy kon čilavéla léskiro trúpo, javéla nažužo ke bel'vél';

40i odoléske, kon javéla te xal léskire-muleskiro mas, trej te obmorel péskire ídi, i nažužo javéla ke bel'vél'; i odová, kon lydžála léskiro trúpo, bangó te obmorel péskire ídi, i nažužo javéla bel'vél'.

41Kažno murdál (žyvotno), savó polzynela pirí phuv, isyn magirdó vaš tuménge, naštý les te xan.

42Saré, kon polzynela pe per i saré, kon psiréla pe štar ĥerá, i buté-gerengiren murdaléndyr (žyvotnendyr), savé polzynena pir phuv, na xan, pal-dová so jone isyn magirdé;

43na magirén tumaré dijá vari-savé murdalesa (žyvotnonesa), savó polzynela, i na kerén pes pir lénde nažuženca, sob (kaj) te javén pir lénde magirdenca,

44pal-dová so Me som Raj Devél, Devél tumaró: svenciakiren pes i javén svénta, pal-dová so Me som Svénto, i na magirén tumaré dijá vari-savé murdalesa (žyvotnonesa), savó polzynela pirí phuv,

45pal-dová so Me som Raj Devél, savó vylydžijá tumen Jegiptóskire phuvjátyr, sob (kaj) Mánge te javav tumaré Devlésa. I adiáke javén svénta, pal-dová so Me som svénto.

46Ĥáda, isyn Zakóno pal kheritkoné murdalénde (pal skoto), pal čirikliende, pal kažno džidó sozdyiben, savó dživéla dro paní, i pal saré murdalénde (žyvotnonende), savé polzynena pir phuv,

47sob (kaj) te roskeden nažužo žužestyr, i murdalén (žyvotnonen), savén saštý te xas, murdaléndyr, savén naštý te xan.”

← Chapter 10 Jump to: Chapter 12 →