Leviticus 13 — Romani Baltic Latin (Biblija - Pe Baltitko Romani čib (Romanes) 2019)

1I phendiá Raj Devél Mojzáske i Aaronóske:

2“Kiéli konéste jačéla pe léskire-masengiri cýpa šulypen, ci lišajo ci pliama, i pe léskire-masengiri cýpa jačéla, xaj, prokazakiro fránso, tedy trej te janén les ke Aaróno, rašái, ci ke jekh léskire čhavéndyr, rašandyr;

3rašáj obdykhela fránso pe cýpa pe masá, i kóli balá pe fránso parudyne dre parné, i fránso isyn xor (gluboko) dre léskire-masengiri cýpa, tedy davá isyn prokáza; rašái, obdykhi les, déla te džinén pal léste, so jov isyn nažužo.

4A kóli pe léskire-masengiri cýpa pliama (piatno) isyn parny, ne joj nane xor dre cýpa, i balá pe léste na parudynepe dre parné, tedy rašáj phandela manušés, savéste isyn fránso pe eftá dyvesá;

5pe eftáto dyvés rašáj les obdykhela, i kóli fránso jačélape dasavo, syr sys, i na rozdžalape fránso pir cýpa, tedy rašáj bangó te phandel les pe javír eftá dyvesá;

6pe eftáto dyvés rašáj nevéstyr obdykhela les, i kóli fránso tyknedýr bicialó, i na rozgijápe fránso pir cýpa, tedy rašáj isyn bangó te phenél manušénge, so jov isyn žužó: davá isyn lišajo, i mek jov te vymorel péskire ídi, i javéla žužó.

7Kóli lišajo jačéla te rozdžalpe pir cýpa, korigedýr (pozžie) dová, syr jov psirdiá ke rašáj te žužakirelpe, tedy jov javír mólo bangó te javél ke rašái;

8o rašái, dykhí, so lišajo rozdžalape pir cýpa, jov déla te džinél manušénge, so jov isyn nažužo: davá isyn prokáza.

9Kóli javéla pe vari-konéste fránso ke prokáza, tedy trej les te janel ke rašái;

10o rašáj obdykhela les i, kóli šulypen pe cýpa isyn parnó, i bal parudyja dre parnó, i pe šulypen isyn džidó mas,

11to davá isyn ĥaratuny prokáza pe léskire-masengiri cýpa; i rašáj priĥaljola les nažužesa i phandela les; pal-dová so jov isyn nažužo.

12Kóli fránso rozbuĥljola pe cýpa, i učhakiréla prokáza sarí cýpa nasvaleskiri, léskire šerestyr ke ĥerá, ci but moginen te dykhén rašaskire jakhá,

13i dykhéla rašái, so fránso učhakirdiá saré léskire masá, to tedy jov priĥaljola nasvales žužesa, pal-dová so saró kerdiápe dro parnó, jov isyn žužó.

14Kiéli jačéla pe léste džidó mas, tedy jov isyn nažužo;

15i o rašái, dykhí džidó mas, priĥaljola les nažužesa, pal-dová so džidó isyn mas nažužo: davá isyn prokáza.

16Kóli džidó mas parudjola i piririsjola dro parnó, mek jov te javél ke rašái;

17i o rašáj obdykhela les, i kóli fránso obrisija dro parnó, rašáj priĥaljola nasvales žužesa; jov isyn žužó.

18Kóli konéste pe masengiri cýpa, sys čyl'čako (naryvo) i jov zadživdia,

19i pe čyl'čakoskiro štéto jaciá parnó šulypen, ci pliama parny ci lolovato, tedy jov isyn bangó te javél ke rašái;

20i rašáj obdykhela les i, kóli čyl'čako javéla tel cýpa, i bal léskiro parudyja dro parnó, tedy rašáj prigaljola les nažužesa: davá isyn prokazakiro fránso, jov roscvecyndia (rozluludija) pe čyl'čako;

21ne kóli rašáj dykhéla, so bal pe fránso isyn naparno, i jov nane tel cýpa, i nábut (kutý) isyn bicialy, tedy rašáj phandela les pe eftá dyvesá;

22kóli jov jačéla drieván te rozdžalpe pir cýpa, tedy rašáj priĥaljola les nažužesa: davá isyn prokazakiro fránso;

23kóli pliama jačélape pe péskiro štéto i na rozdžalape, tedy davá isyn čyl'čakoskiro šulypen, i rašáj priĥaljola les žužesa.

24I, kóli konéste pe masengiri cýpa javéla obhačkiriben, i pe zadživdo obhačkiribnaskiro jačéla lolovato ci parny pliama,

25i rašáj udykhéla, so bal pe pliama (piatno) piriparudyja dro parnó, i jov jačéla xor dre cýpa, tedy davá isyn prokáza, joj zacvecyndia pe obhačkiriben; i rašáj priĥaljola les nažužesa: davá isyn prokazakiro fránso;

26kóli rašáj dykhéla, so bal pe pliama naparno, i jov nane tel cýpa, i nane drieván bicialó, tedy rašáj phandela les pe eftá dyvesá;

27pe eftáto dyvés rašáj obdykhela les, i kóli joj drieván rozdžalape pir cýpa, tedy rašáj priĥaljola les nažužesa: davá isyn prokazakiro fránso;

28kóli pliama jačélape pe péskiro štéto, i na rozdžalape pir cýpa, i nábut so nane bicialy, tedy davá šulypen obhačkiribnastyr; rašáj priĥaljola les žužesa, pal-dová so davá šulypen obhačkiribnastyr.

29Kóli muršeste ci džuvliáte javéla fránso pe šeró ci pe čhora (broda),

30i tén'či obdykhela rašáj fránso, i jov jačéla xor dre cýpa i bal pe láte žylto sano, tedy rašáj priĥaljola len nažuženca: davá isyn parhima, davá isyn prokáza pe šeró ci pe čhora (broda);

31kóli rašáj obdykhela fránso parhimakiro, i joj na jačéla xor dre cýpa, i bal pe láte isyn na kaló, tedy rašáj odolés, konéste isyn fránso parhimakiro, phandela pe eftá dyvesá;

32pe eftáto dyvés rašáj obdykhela fránso, i kóli parhima na rozdžalape, i nane pe láte žylto bal, i parhima na jačéla xor dre cýpa,

33tedy nasvaleste trej te občhinen balá, ne štéto, kaj parhima te na občhinen, i rašáj isyn bangó parhatones javír mólo te zaphandel pe eftá dyvesá;

34pe eftáto dyvés rašáj obdykhela parhima, i kóli parhima na rozgijápe pir cýpa i na jačéla xor dre cýpa, tedy rašáj priĥaljola les žužesa; mek jov te vymorel péskire ídi, i javéla žužó.

35Ne kóli paló léskiro žužakiriben javéla but te rozdžalpe parhima pir cýpa,

36i rašáj udykhéla, so parhima rozdžalape pir cýpa, tedy rašáj mek te na rodél žylto bal: jov isyn nažužo.

37Kóli parhima jačélape, syr sys, i sykavelape pe láte kaló bal, tedy pošara progijá, jov isyn žužó; rašáj priĥaljola les žužesa.

38Kóli muršeste ci džuvliáte pe léngire-masengiri cýpa javéna jarka pliamy, jarka parné pliamy,

39i rašáj dykhéla, so pe léngire-masengiri cýpa bliedna-parné pliamy, tedy davá isyn lišajo, so roscvecyndia pe cýpa: jov isyn žužó.

40Kóli konéste pe šeró vyresne balá, tedy davá isyn pliešo: jov isyn žužó;

41a kóli angíl pe čykat vyresne balá, tedy jov isyn lyso: jov isyn žužó.

42Kóli pe pliešo ci pe lysina javéla parny ci lolovato pliama, tedy pe léskiro pliešo ci pe léskiri lysina roscvecyndia prokazakiro fránso.

43I o rašáj obdykhela les i, kóli dykhéla, so pe šulypen pe fránso parnó ci lolovato pe léskiro pliešo ci pe léskiri lysina, bicialy so poddžála pe masengire-cypakiro prokáza,

44tedy adavá manúš isyn prokazytko, nažužo jov isyn; rašáj isyn bangó te priĥaljol les nažužesa, léste pe šeró fránso.

45Prokazytkoneste, pe savéste isyn davá fránso, trej, sob (kaj) pe léste te javél rozkušny ídia, i léskiro šeró isyn bangó te javél na učhakirdo, i ke uštá jov bangó te javél učhakirdo i te del gódla: ‘Nažužo! nažužo!’

46Dre saré dyvesá, paka pe léste isyn fránso, jov isyn bangó te javél nažužo, nažužo isyn jov; jov isyn bangó te dživél jekhdžinó, pal stáno te javél léskiro džiibén.

47Kóli javéla prokazakiro fránso pe ídi, ci pe ídia vylnátyr (šersiatyr), ci pe ídia ljonostyr (ĥandladestyr),

48ci pe osnova thavengiri, savé džána upralestyr, ci pe utoko thava, so džána pir buĥlypén ljonostyr (gandladestyr) ci vylnátyr, ci pe cýpa, ci pe vari-savó savó cypitko keriben,

49i fransakiri pliama (piatno) javéla zelenovato ci lolovato pe ídia, ci pe cýpa, ci pe osnova, ci pe utoko, ci pe vari-savó cypitko uribén, – tedy davá isyn fránso ke prokáza: trej te sykavén la rašáske;

50o rašáj obdykhela fránso, i zaphandela nasvaly ídia prokazasa pe eftá (bitrinéngiro deš) dyvesá

51pe eftáto dyvés rašáj prodykhela fránso, i, kóli fránso rozgijápe pir ídia, ci pe osnova, ci pe utoko, ci pir cýpa, ci pir vari-so, so kerdó cypatyr, tedy davá isyn prokáza zahaly, nažužo isyn fránso;

52jov isyn bangó te shačkirel ídia, ci osnova, ci vylnakiro utoko ci ĥandladeskiro (ljonoskiro), ci saví da te na javél, saví kerdy cypatyr, pe saví javéla fránso, pal-dová so davá isyn zahaly prokáza: trej te shačkiren la pe jag.

53Kóli rašáj dykhéla, so fránso na rozgijápe pe ídia, ci pe osnova, ci pe utoko, ci pe saví b te na javél riza, so kerdy cypatyr,

54tedy rašáj uphenela te obmoren dová, pe saví isyn fránso, i javír mólo zaphandela pe eftá dyvesá;

55kóli korigedýr (pozžedýr) nasvale-idiakiro vymoribnastyr rašáj udykhéla, so fránso na parudia péskiro bicialyben i fránso na rozgijápe, tedy joj isyn nažužy, shačkirla ídia pe jag; davá isyn vyhano štéto pe muitko rig ci pe palatuny;

56kóli rašáj dykhéla, so fránso pir lákiro moriben jaciá tyknedýr bicialó, tedy rašáj mek te otkušel štéto fransosa idiatyr, ci cypatyr, ci osnovatyr, ci utokostyr.

57Kóli jov nevéstyr sykadjola pe ídia, ci pe osnova, ci pe utoko, ci pe vari-so kerdó cypatyr, tedy davá isyn prokáza, saví rozdžalape: xačkir pe jag davá, pe so prokáza isyn.

58Kóli ídia, ci osnova, ci utoko, ci vari-so so kerdó cypatyr vymoresa, i džála krig léndyr fránso, tedy trej te vymoren len javír mólo, i jone javéna žužé.

59Ĥáda, isyn zakóno pal fránso ke prokáza pe vylnakiri ci ĥandladeskiri (ljonytko) ídia, ci pe osnova ci pe utoko ci pe vari-so, so kerdó cypatyr, syr te priĥaljos la žužesa ci nažužesa.