Leviticus 21

Romani Baltic Latin (Biblija - Pe Baltitko Romani čib (Romanes) 2019)

← Chapter 20 Jump to: Chapter 22 →

1I phendiá Raj Devél Mojzáske: “Rákir rašange, Aaronóskire čhavénge, i phen lénge: ‘Mek jone te na magirén pes čilavibnasa ke muló péskire manušéndyr;

2iekh so ke péskiri pašatuny seménca, ke péskiri daj i ke péskiro dad, ke péskiro čhavó i ke péskiri čhaj, ke péskiro pšal,

3i ke péskiri phen, saví te javél dre čhaja, i dživdiá pašýl léste i na sys paloróm, saštý léske te kerél davá nažužypen;

4i čilavibnasa ke kon by da te na javél dre péskire manušénde jov naštý te magirel pes, sob (kaj) te na jačél nažužo.

5Lénge naštý te čhinen ke nangipén (te muraven) péskire šeré i te podčhinen jagóry (kraí) dre péskire čhora (broda), i te kerén čhinybén pe péskire masá.

6Lénge trej te javén svénta péskire Devléske, i lénge naštý te teliakiren péskire-Devléskiro lav, pal-dová so jone janéna Ráske-Devléske svénto dyibén (žértva) pe jag, maró péskire Devléske, i paldavá isyn bangé te javén svénta.

7Lénge naštý te len pal péste biladžakunia džuvliá i došvalia čha, i naštý te len i džuvliá, savjá mekciá lákiro rom, pal-dová so jone isyn svénta péskire Devléske.

8Vysvencyn len, pal-dová so jone janéna maró tyré Devléske: mek te javén jone túte svénta, pal dová so Me som svénto Raj Devél, Savó svenciakirela tumen.

9Kóli e rašaskiri čhaj magirela pes biladžaipnasa, tedy joj teliakirela péskire dadés; jagása trej la te xačkirén.

10I baró rašáj péskire pšaléndyr, pe saveskiro šeró čhuvéla makhibnaskiro jeliejo (dzet), i savó isyn vysvencyndlo, sob (kaj) te ur'jelpe dre svénta rizy, naštý te nangiakirel péskiro šeró i te na kušel péskire rizy;

11i ni ke kon muléndyr naštý jov te poddžál: adiáke-pac' čilavibnasa ke muló péskiro dad i péskiri daj jov naštý te magirel pes.

12I sventoné štetóstyr jov naštý te otdžal i te teliakirel péskire Devléskiro svénto štéto, pal-dová les vysvencyndle makhibnaskire jeliejosa vaš léskire-Devléske. Me som Raj Devél.

13Paloróm léske trej te lel patyvalia ternia džuvliá.

14Léske naštý te lel džuvliá, savjate myjá rom, ci savjá rom mekciá, ci savjá obhohade, ci biladžakunia džuvliá, ne patyvalia ternia džuvliá péskire manušéndyr isyn bangó jov te lel paloróm;

15Léske naštý te ladžakirel péskiro siemjo (sal) dre péskire manušénde, pal dová so Me som Raj Devél, Savó les svenciakirava.’”

16I phendiá Raj Devél Mojzáske dasavé lavá:

17“Rákir Aaronóske dasavé lavá: ‘Nikón tyré rodóstyr dre saré léngire ródy, savénde pe masá javéla nauhtylyben, naštý te poddžál, sob (kaj) te janel maró péskire-Devléske;

18nikón, konéste pe masá isyn nauhtylyben, naštý te poddžál, ni kororó, ni langalo, ni ragando (urodo),

19ni savó, konéste isyn piriphagirdy ĥerój, ci piriphagirdo vast,

20ni ĥyrbasa, ni šuké člienosa, ni karliko, ni pliamasa pe jakh, ni ĥeralo, ni džuvalo (pošesiasa), ni došvalo murš (jevnuho);

21nijékh manúš rašaskire Aaronóskire rodóstyr, savéste pe masá isyn nauhtylyben, naštý te poddžál, sob (kaj) te janel Ráske-Devléske svénta dyibená; nauhtylyben isyn pe léste, paldavá léske naštý te poddžál, sob (kaj) te janel maró péskire-Devléske.

22Maro péskire Devléskiro isyn baré sventymatyr i sventymatyr jov saštý te xal;

23ne ke pologo jov naštý te javél, i ke altárjo naštý léske te poddžál, pal-dová so nauhtylyben isyn pe léste: jov naštý te teliakirel Miro svénto štéto, pal-dová so Me som Raj Devél, Savó svenciakirela len.”

24I dyjá te džinél davá Mójza Aaronóske i léskire čhavénge i saré Izrailjoskire čhavénge.

← Chapter 20 Jump to: Chapter 22 →