Leviticus 19

Romani Baltic Latin (Biblija - Pe Baltitko Romani čib (Romanes) 2019)

← Chapter 18 Jump to: Chapter 20 →

1I phendiá Raj Devél Mojzáske dasavé lavá:

2“Rákir saré skedyibnaske Izrailjoskire čhavéngire i phen lénge: ‘Javén svénta, pal-dová so Me som svénto Raj Devél, Devél tumaró.

3Dar kažno (sváko) manúš péskire datyr i péskire dadéstyr, i rakhén Miré sávaty (suboty). Me som Raj Devél, tumaró Devél.

4Na mangénpe idolénge, i na kerén péske vyčhudé devloré. Me som Raj Devél, tumaró Devél.

5Kiéli javéna te janén Ráske-Devléske mírno svénto dyibén, tedy janén les, sob (kaj) te doresen péske Devléskiri láska:

6dro dyvés, kiéli tumé janéna svénto dyibén (žértva) dro dyvés i pe javír dyvés tuménge trej te xan les, a so jačélape ke tríto dyvés isyn bangé te shačkiren pe jag;

7kóli vari-kon léla les te xal pe tríto dyvés, davá isyn džungaló (brytko): davá na javéla Ráske-Devléske pir Zakóno;

8kon léla la te xal, odová lydžála pe péste grého, pal-dová so jov magirdia Ráskire-Devléskiri sventyma, i xasjola dová di péskire manušéndyr.

9Kiéli javéna te ukeden, so vybarija pe jagóro (pe krajo) pe tyrí félda, i so jačélape tyré ukedyibnastyr, na podkede,

10i tyró vinagrado (drakh) na obkede ke žužypen, i múri, savé pyné dro vinagrádniko, na ĥázde, jačkir davá čororeske i manušéske, savó javdiá javire rigátyr. Me som Raj Devél, Devél tumaró.

11Na čoren, na rakirén načačipén, na xohaven jekh jekhés.

12Na den xohany sovél, pričhuvi ke davá lav Miro na magirén péskire Devléskiro. Me som Raj Devél.

13Na pritasav tyré pašatunes, i na le butýr syr trej. Pleskiriben butiarneske naštý te jačkires ke ránko (ke zlóko).

14Na obrakir kašukes, i na čhuv ničí angíl kororeste, sob (kaj) te na perél jov, dar Rástyr-Devléstyr tyrestyr. Me som Raj Devél.

15Na sendiakires xohanés pe séndo; na jav proti čororeste i na ker gudles (na ladin) barvalé manušénge. Pir čačipén sendiakir tyré pašatunes.

16Na psir piridyibnarisa maškír tyré manušénde, i na ĥazdepe pe tyré-pašatuneskiro džiibén. Me som Raj Devél.

17Na rikir xolý dre tyró iló pe tyré pšaléste; sykáv bang tyré pašatuneske, i na javéla pal léste grého.

18Na otdé pale čoripnasa (na otha pale), i na rikir xolý pe tyré-manušéngire čhavénde, a sykáv patýv ke tyró pašatuno, syr péske. Me som Raj Devél.

19Rakhén Miré uphenybená; tyré kheritkoné murdales (skoto) na zlyža javire porodasa; félda tyrí na začhuv duje raznone ziarkenca; na uripe dre rizy (dro uribén) kažnoné thavendyr, vylnátyr i ĥandladestyr (ljonostyr).

20Kóli vari-kon pirisovela džuvliása, a joj isyn pisharica, angrustiakirdy (obrenčyndly) romesa, ne iščo (inké) navykindly, ci vol'nyma iščo (inké) nane dyný láke: tedy trej te čhuvés kára iščo (inké) pe lénde, ne na meribnasa, pal-dová so joj isyn na vól'no.

21Mek jov te janel Ráske-Devléske ke zagiibén dre šátra skedyibnáskiri bakrés pal isyn bang, dro svénto dyibén pal péskiri isyn bang;

22i vyžužakiréla les o rašáj bakresa pal bang angíl Raste-Devléste grehostyr, i otmekno javéla léske grého, savó jov kerdiá.

23Kiéli tumé javéna pe phuv, saví Raj Devél déla tuménge, i počhuvena tumé vari-savó plodengiro veš, tedy léskire barjakirdé (plódy) ginen pal naobčhindle, naštý te xan len;

24a pe štárto berš saré léskire barjakirdé trej te javén svencindle vaš Ráskire-Devléskire svénki;

25a pe pándžto berš tumé saštý te xan léskire barjakirdé i te skedén péske saró, so léstyr isyn. Me som Raj Devél, Devél tumaró.

26Na xan ničí ratésa; na drabakiren i na čovahaniakiren.

27Na občinen tumaré šereskire balá saré rigéndyr, i na podčin tyré čhorengiro (brodakiro) jagóro (krajo).

28Vaš ripiribén pal muleste na kerén čhinybén pe tumaré masá, i na vyphusaven pe tumaré masá vari-savó začhinyben. Me som Raj Devél.

29Na magir tyrja čha, domeki la ke bléndo, sob (kaj) te na javél bléndo pe phuv i te na pherdjol phuv zlydnimasa.

30Rakhén miré sávaty (suboty) i den patýv Miré sventoné štetoske. Me som Raj Devél.

31Na riskirén godý ke manušá, savé vykharena mulen, i na psirén ke čovahane, i na dolydžan pes ke magiripén léndyr. Me som Raj Devél, tumaró Devél.

32Angíl phuré manušéste uštý i kutiakir léskiro phuripen, i dar tyré Devléstyr. Me som Raj Devél.

33Kiéli javéla te dživél manúš javire rigátyr pe tumarí phuv, na pritasaven les;

34o manúš, savó pritradyja javire rigátyr, i jaciá te dživél tuménde; mek te javél vaš tuménge dasavo-pac', syr tumaró manúš isyn; sykáv patýv léske, syr péske; pal-dová so i tumé sánas manušá, savé javné javire rigátyr pe Jegiptóskiri phuv. Me som Raj Devél, tumaró Devél.

35Na kerén xohaibén pe séndo, dre miéra, dre vaga (vieso) i dre miéra te čhuvés:

36mek te javén tuménde ubladýtka (viesy) čačuné, giri čačuné, efa čačuný i gino čačunó. Me som Raj Devél, tumaró Devél, Savó vylydžijá tumen Jegiptóskire phuvjátyr.

37Rakhén saré Miré uphenybená i saré Miré Zakóny i kerén pir lénde. Me som Raj Devél.’”

← Chapter 18 Jump to: Chapter 20 →