Leviticus 17

Romani Baltic Latin (Biblija - Pe Baltitko Romani čib (Romanes) 2019)

← Chapter 16 Jump to: Chapter 18 →

1I phendiá Raj Devél Mojzáske dasavé lavá:

2“Rakirén Aaronóske i léskire čhavénge i saré Izrailjoskire čhavénge i phen lénge: ‘Ĥáda, so priphenela Raj Devél:

3kóli kon Izrailjoskire kheréstyr začhinela guruvóres ci bakriá ci buznia dro stáno, ci kóli vari-kon začhinela len pal stáno

4i na janéla ke zagiibén dre skedyibnáskiri šátra (skínija), sob (kaj) te otdél dro svénto dyibén Ráske-Devléske angíl Ráskire-Devléskiro Kher, tedy odoléske manušéste javéla začhindló rateskiro pročhuviben: jov pročhudia rat, i xasjola odová manúš péskire manušéndyr;

5davá isyn vaš dová, sob (kaj) Izrailjoskire čhavé te kerén péskire svénta dyibená, savé jone začhinena pe félda, sob (kaj) te janén len angíl Raste-Devléste ke zagiibén dre šátra skedyibnáskiri, ke rašái, i te začhinen len Ráske-Devléske dro ramanjono (mírno) svénto dyibén;

6i počhuvela o rašáj ratésa pe altárjo Ráske-Devléske pašýl zagiibén dre šátra skedyibnáskiri, i zahačkirna čekén (túko) syr gudló thuv, lačhó Ráske-Devléske,

7sob (kaj) jone butýr te na janén svénta dyibén idolénge, pal savé jone psiréna nalačhé myslienca. Mek te javél davá vaš lénge viečnone priphenybnasa dre léngire ródy.’

8Iščo phen lénge: ‘Kóli vari-kon Izrailjoskire kheréstyr i manušéndyr, savé javné javire rigéndyr, savé dživéna maškír tuménde, janéna célo shačkiribén ci svénto dyibén,

9i na lydžála ke zagiibén dre šátra skedyibnáskiri, sob (kaj) te janes les Ráske-Devléske, tedy odová manúš xasjola péskire manušéndyr.

10Kóli vari-kon Izrailjoskire kheréstyr i manušéndyr, savé javné javire rigéndyr, savé dživéna maškír tuménde, javéla te xal vari-savó rat, tedy Me riskiráva Miro muj pe dová di, kon javéla te xal rat, i xasiakiráva les adalé manušéndyr,

11pal-dová so maséngiro džiibén (vaš kažno sozdyiben) isyn dro rat, i Me dyjom tuménge les vaš altárjo, sob (kaj) te vyžužakiren tumaré dijá;

12paldavá Me i phendjom Izrailjoskire čhavénge: Nijékh di tuméndyr naštý te xal rat, i manúš, savó javdiá javire rigátyr, savó dživéla maškír tuménde, naštý te xal rat.

13Kóli vari-kon Izrailjoskire čhavéndyr i manušéndyr, savé javné javire rigéndyr, savé dživéna maškír tuménde, pe stariben uhtyléla riskiribnáskire murdales (zvierjos) ci čirikliá, savjá saštý te xal, tedy jov isyn bangó te del te vythadel lákire rateske i te zaučhakirel la phuvjása,

14pal-dová so kažnoné-maséngiro džiibén isyn dro léskiro rat, jov isyn léskiro di; paldavá Me phendjom Izrailjoskire čhavénge: na xan rat ni savéstyr maséndyr, pal-dová so di kažnoné maséngiro sozdyiben isyn dro léskiro rat: kažno, kon javéla les te xal, xasjola.

15I kažno, kon javéla te xal muleskiro mas, ci zahane riskiribnáskire-murdaleskiro (zvierjoskiro) mas, péskiro manúš ci manúš, savó javdiá javire rigátyr, trej, sob (kaj) jov te vymorel péskire uribená i te obmorelpe paniésa, i nažužo javéla jov ke bel'vél', a korigedýr (pozžedýr) jov javéla žužó;

16kóli jov na vymorela péskire uribená, i na obmorela péskire masá, tedy jov te lydžál pe péste péskiri bang.’”

← Chapter 16 Jump to: Chapter 18 →