2 Kings 10

Sotho 1951 (BIBELE)

← Chapter 9 Jump to: Chapter 11 →

1Ahaba o be a na le barwa ba masome a šupago gona moo Samaria. Bjale Jehu a ngwala mangwalo a a romela Samaria go bakgoma, le go bagolo ba Jeseriele, le go balaki ba bana ba Ahaba, a re:

2E re ge lengwalo le le fihla go lena, le na le barwa ba mong wa lena, le na le dikoloi le dipitsi, le na le motse wa sebo le dibetša,

3le ke le bone yo e lego senatla le moloki mo go barwa ba mong wa lena, le mo dudiše sedulong sa tatagwe, gomme le hlabanele ba leloko la mong wa lena.

4Bona ba boifa ka kudukudu, ba re: Ge ešita dikgoši tše pedi di paletšwe go hlabana nae, rena re tlo ema bjang?

5Molaki wa ngwako wa Ahaba, le mokgoma wa motse, le bagolo, le balaki ba bana ba Ahaba, ba iša lentšu go Jehu ba re: Rena re bahlanka ba gago. Tšohle tše o re laelago tšona re tlo di dira. Re ka se ke ra bea kgoši. Dira tše o ratago go di dira.

6Ke mo Jehu a ba ngwaletšego lengwalo la bobedi, a re: Ge le ema le nna, gomme ge le kwa lentšu laka, gona tšeang dihlogo tša banna bao e lego bana ba mong wa lena, le di tlišeng go nna mono Jeseriele ka moswana pakeno. Ka gobane barwa ba kgoši ba masome a šupago ba be ba dutše go bagolo ba motse ba godišwa gona.

7Bjale ge lengwalo le fihla go bona, ba swara barwa ba kgoši ba ba bolaya, banna ba masome a šupago. Dihlogo tša bona ba di fakela dirotong, ba di romela go Jehu kwa motseng wa Jeseriele.

8Motseta a tla a tsebiša Jehu a re: Ba tlišitše dihlogo tšela tša barwa ba kgoši, Jehu a re: Di direng mekgobo e mebedi kgorong go fihla ka moswana.

9Ka la ka moswana a tšwa a ema, a bolela le setšhaba ka moka a re: Lena ga le na molato. E a hlanogetšego mong wa gagwe ke nna, ka mmolaya. Ge e le ba, ba bolailwe ke mang ka moka ga bona?

10Tsebang gobane lentšu la Morena, le a boletšego moloko wa Ahaba ka lona, ga la ka la wela fase. Morena o dirile se a se boletšego ka Eliya mohlanka wa gagwe.

11Gomme Jehu a bolaya bohle ba ba šetšego ba leloko la Ahaba motseng wa Jeseriele, le bagolo bohle ba gabo, le Metswalo ya gagwe, le baperisita ba gagwe, a se ke a mo šiela le lešalela.

12A tsoga a leba Samaria; tseleng a tla merakeng ya badiši;

13a hwetša go na le bana ba boAhasia kgoši ya Juda; a botšiša a re: Le bomang? Bona ba re: Re bana ba boAhasia; re tlile go dumediša bana ba kgoši le bana ba mohumagadi.

14Jehu a re: Ba swareng ba sa phela! Ba ba swara ba sa phela, ba ba bolaya sedibeng sa gona moo merakeng, e le banna ba masome a mane le metšo e mebedi; a se ke a šadiša le o tee wa bona.

15A tloga fao, a hwetša Jonadaba morwa wa Rekaba a etla go mo gahlanetša. Jehu a mo dumediša, a mo rera a re: A pelo ya gago e mpotegetše bjalo ka yaka ge e Go botegetše? Jonadaba a re: Go bjalo! Jehu a re: Gona fana diatla le nna! Ba fana diatla, mme a mo nametša koloing ya gagwe.

16Jehu a re: Tlaa le nna, o bone ge ke fišegela Morena! A tloga le yena ka koloi ya gagwe.

17Ge a fihla Samaria a bolaya bohle ba ga Ahaba ba ba bego ba šetše Samaria, a ba a ba feletša, ka mo Morena a boletšego ka Elia.

18Jehu a napa a botha setšhaba ka moka, a bolela a re: Ahaba o be a direla Baali ka gonyenyane fela; Jehu o tlo o direla ka gogolo.

19Ke gona mpiletšeng baporofeta ka moka ba Baali, le bahlanka ba wona ka moka, le baperisita ba wona ka moka, go se ke gwa hlokwa le o tee; ka gobane ke rata go direla Baali sedimo se segolo. E a kago hlokwa go sona, a ka se ke a phela. -- Fela e be e le maano a Jehu, gore a fediše bahlanka ba Baali.

20A laela a re: Hlabang mokgoši le re: Monyanya wa Baali! Mme ba goelela bayalo.

21Yena Jehu a roma batseta ba putlaputla la Isiraele; bahlanka ka moka ba Baali ba tla, gwa se ke gwa ba le e a sa kago a tla; ba tsena ngwakong wa Baali; ngwako wa Baali wa tlala mo go fela.

22Jehu a laela molakadiaparo a re: Ntšhetša bahlanka bohle ba Baali diaparo! Gomme ba ntšhetšwa diaparo.

23Bjale Jehu a tsena ngwakong wa Baali a na le Jonadaba morwa wa Rekaba, a bolela le bahlanka ba Baali a re: Tsomešang le bone, e se be mohlomongwe mo go lena go ka ba le e mongwe wa bahlanka ba Morena; e be bahlanka ba Baali fela.

24Ya re ge ba le ngwakong, ba sa dira didimo le dihlabelo, ke ge Jehu a šetše a beile banna ba masome a seswai ka ntle; a ba laela a re: Banna ba ke ba gafetše lena. Ge e mongwe wa bona a ka thoba ka go e mongwe wa lena, o tlo lefa ka bophelo bja gagwe.

25Bjale ge go fela modiro wa dihlabelo, Jehu a laela dikala le balaodi ba dira, a re: Tsenang le ba bolayeng; go se ke gwa phonyokga le o tee! Gomme ba ba fediša ka marumo. Ba dikala le balaodi ba dira ba lahlela ditoto ka ntle, ba tsebo ya motseng wa ngwako wa Baali.

26Ba ntšha diswantšho tša ngwakong wa Baali, ba di tšhuma.

27Ba pšhatla seswantšho sa Baali; ba phušola ngwako wa Baali, ba o dira sethobolo go fihla la lehono.

28Ke wona mokgwa wo Jehu a fedišitšego tša Baali mo go Isiraele ka wona.

29Ge e le dibe tšele tša Jerobeama morwa wa Nebata, e a rutilego Isiraele go dira dibe, tšona Jehu ga a ka a di tlogela; ke dinamane tšela tša gauta motseng wa Bethele le wa Dani.

30Morena o kile a tsebiša Jehu a re: Bana ba gago ba tlo hlatlamana ba dula sedulong sa bogoši sa Isiraele go fihla molokong wa bone, ka gobane o thakgile ka go dira se Morena a rego se lokile, ge leloko la Ahaba o le dirile tše nna ke bego ke di rerile pelong yaka.

31Fela, Jehu ga a ka a šetša go swara ka tsela ya molao wa Morena Modimo wa Isiraele ka pelo ka moka, ka gobane dibe tša Jerobeama e a rutilego Isiraele go dira dibe, tšona ga a ka a di tlogela.

32Mehleng yeo Morena o thomile go notla Isiraele; Hasaele a fela a ba fenya mellwaneng ka moka ya Isiraele;

33a ba amoga naga go tloga ka noka ya Jorodane go ya bohlabela, naga ya Gileada ka moka, ya Bagada, le ya Barubeni, le ya Bamanase, go goma ka Aroere nokeng ya Arinoni, le ya Gileada, le ya Basani.

34Ge e le ditaba tše dingwe tša Jehu, le tšohle tše a di dirilego, le tša mediro ya gagwe ya bogale, naa ga di a ngwalwa mo pukung ya ditaba tša kgale tša dikgoši tša Isiraele?

35Jehu o ithobaletše le botatagwe, ba mmoloka lebitleng motseng wa Samaria; legatong la gagwe gwa buša Joahase morwa wa gagwe.

36Lebaka le Jehu a bušitšego Isiraele ka lona a le Samaria, ke nywaga e masome a mabedi a metšo e seswai.

← Chapter 9 Jump to: Chapter 11 →