2 Kings 7

Sotho 1951 (BIBELE)

← Chapter 6 Jump to: Chapter 8 →

1Elisa a re: Kwang se Morena a se bolelago. Morena o re: Ka moswana pakeno seroto sa bupi bjo bo tokilwego se tlo rekwa ka mašeleng a mabedi le seripa; diroto tše pedi tša mabele di tlo rekwa ka mašeleng a mabedi le seripa, gona mo kgorong ya Samaria.

2Gwa fetola kala e lego yena molaki wa mošate, a bolela le monna wa Modimo a re: Nna ke re, le ge Morena a ka bula maroba legodimong, taba yeo e ka se ke ya ba ya direga! Elisa a re: Ka mahlo a gago o tlo di bona; fela, o ka se ke wa di ja.

3Gomme kwa ntle ga motse go be go na le banna ba bane ba lephera; bona bao ba boledišana ba re: Re reng re fela re dutše mo go fihla ge re ehwa?

4Ge re ka re re tsena motseng, motseng go tlala; re yo hwela ntshe. Ge re ka dula mo, le gona re tlo hwa. A re yeng re yo itahlela mešašeng ya Basiria. Ge ba ka re phediša, re tlo phela; ge ba ka re bolaya, re tlo fo ikhwela.

5Ba tsoga e sa le ka lerothwana, ba tla mešašeng ya Basiria. Ge ba fihla matsenong a mešaša ya Basiria, ba hwetša go se motho.

6E be e le ka gobane Morena o be a kwišitše madira a Basiria modumo wa dikoloi, le kitimešito ya dipitsi, le lešata la madira a mantši; ba botšana ba re: Ka kgonthe kgoši ya Isiraele e tšwa go rapa dikgoši tša Bahethe, le dikgoši tša Baegipita, gore di re wele godimo.

7Ya napa ya ba go nanoga; ba tšhaba e sa le ka lerothwana, ba tlogela mešaša ya bona, le dipitsi tša bona, le dipokolo tša bona, le mešaša ka moka, ba fo tšhabiša bophelo fela.

8Banna bala ba lephera ge ba tla matsenong a mešaša, ba tsena mokutwaneng o mongwe, ba ja, ba nwa, ba tšea disilifera, le digauta, le diaparo ba ya ba di uta. Ba boela ba tsena mokutwaneng o mongwe, ba tšea tša ntshe, ba ya ba di uta.

9Ba ba ba botšana ba re: A re se keng ra dira ka mokgwa wo. Letšatši le ke letšatši la go thaba ge re ka homola, ra letla la moswana, re tlo oba molato. A re yeng re yo botša ba mošate.

10Ba tla, ba bitša bahlapetši ba kgoro ya motse, ba ba botša ba re: Re tšwa kwa mešašeng ya Basiria, ra hwetša go se motho le ge e le lentšu la motho; ra hwetša dipitsi le dipokolo di kgokilwe, mekutwana e le madulong a yona.

11Bahlapetši ba kgoro ba hlaboša mantšu ba tsebiša batho taba yeo, ya ba ya fihla mošate.

12Kgoši ya tsoga e le bošego, ya bolela le bahlanka ba yona ya re: A nke ke le botše se Basiria ba ratago go se dira. Ba tseba ge re wetšwe ke tlala, bjale ba tlogetše mešaša, mme ba utame nageng, ba re: E tlo re ge ba tšwile motseng ra ba swara ba sa phela, ra tsebo tsena motseng.

13E mongwe wa bahlanka ba gagwe a re: A go tšewe dipitsi tše tlhano mo go tše di re šaletšego mono motseng. Hleng tše di kago di diregela ke tše di diregetšego mehlape ka moka ya Isiraele. A re romeng tšona, re kgono bona.

14Ke moka ba ntšha dikoloi tše pedi le dipitsi tša tšona; kgoši ya di roma go yo latela madira a Basiria, ya re: Sepelang le yo hlola.

15Bjale ge ba latela Basiria, ba ba ba fihla nokeng ya Jorodane; ba hwetša tsela ka moka e tletše diaparo le dibetša tše Basiria ba di lahlilego ba tšhaba. Bahlodi ba boa ba di anegela kgoši.

16Ya ba gona batho ka moka ba tšwilego motseng, ba hula mešaša ya Basiria. Ya ba gona seroto sa bupi bjo bo tokilwego se rekilwego ka mašeleng a mabedi le seripa, diroto tše pedi tša mabele tša rekwa ka mašeleng a mabedi le seripa, ka mo Morena a boletšego.

17Kgoši ya roma kala yela molaki wa mošate, a re a yo hlapetša kgorong. Gona moo kgorong batho ba mo katakela a hwa, ka mo monna wa Modimo a boletšego mohla wola ge kgoši e tlile go yena.

18Gwa direga se monna wa Modimo a se boletšego a re: Ka moswana pakeno diroto tše pedi tša mabele di tlo rekwa ka mašeleng a mabedi le seripa, le seroto sa bupi bjo bo tokilwego se tlo rekwa ka mašeleng a mabedi le seripa fa kgorong ya Samaria.

19Mola kala e fetola le le boletšwego ke monna wa Modimo ya re: Le ge Morena a ka bula maroba legodimong, taba yeo e ka se ke ya ba ya direga.

20Elisa a re: Ka mahlo a gago o tlo di bona; fela, o ka se ke wa di ja.

21Go diregile ka mokgwa woo, ka gobane batho ba mo kataketše kgorong, a hwa.

← Chapter 6 Jump to: Chapter 8 →