2 Kings 5

Sotho 1951 (BIBELE)

← Chapter 4 Jump to: Chapter 6 →

1Naemane molaodi wa dira tša kgoši ya Siria e be e le monna e mogolo pele ga mong wa gagwe, monna e a tumilego, ka gobane Morena o be a namolela Siria ka yena; fela, monna eo wa senatla o be a na le lephera.

2Bjale Basiria e kile ya re ba tšwile dira, ba boa ba thopile mosetsanyana e mongwe nageng ya Isiraele. Mosetsanyana eo a ba molata wa mosadi wa Naemane;

3a bolela le mong wa gagwe a re: Ge mong waka a ka be a eya go moporofeta wa Samaria, a ka be a mo fodiša lephera le.

4Gomme Naemane a ya go mong wa gagwe, a mo anegela taba ye a re: Mosetsana e a tšwago nageng ya Isiraele o boletše ka gore le ka gore.

5Kgoši ya Siria ya re: Napa o ye; kgoši ya Isiraele ke tlo mo ngwalela lengwalo. Gomme Naemane a ya a na le Talente tše lesome tša silifera, le Sekele tše dikete tše di selelago tša gauta, le diaparo tše lesome tša monyanya.

6A fihliša lengwalo lela go kgoši ya Isiraele. Lengwalo le le be le re: E re ge lengwalo le le fihla, o tsebe gore mohlanka waka Naemane ke mo rometše go wena, gore o mo alafe lephera.

7Kgoši ya Isiraele ya re go bala lengwalo leo, ya gagola diaparo tša yona ya re: A ke nna Modimo e nkago bolaya goba ka phediša, ge motho e a roma monna e a re ke mo fodše lephera? Tsebang mme le bone ka mo a tsomago taba ya go šitana le nna!

8Elisa monna wa Modimo ge a ekwa gore kgoši ya Isiraele e gagotše diaparo tša yona, a iša lentšu a re: O reng o gagola diaparo tša gago? A a tle go nna, a tle a lemoge ge mo go Isiraele go na le moporofeta.

9Gomme Naemane a tla a na le dipitsi tša gagwe le dikoloi tša gagwe, a ema mojakong wa ngwako wa Elisa.

10Elisa a roma motseta, a tla a re: Yaa o hlape gašupa nokeng ya Jorodane, ke mo mmele wa gago o tlogo fola wa thakgafala.

11Ya ba mo Naemane a tlalwago ke pelo, a tloga, a re: Hleng nna ke be ke re, o tlo tšwa, a tla go nna a ema fa a rapela leina la Morena Modimo wa gagwe a išitše diatla felo mo go babago; ya ba gona go mphodiša lephera.

12A dinoka tša Abana le Farafara ga se tše botse naa? Dinoka tša Damaseko a ga di phale meetse ka moka a Isiraele? A ke be nka se ke ka hlapa gona ka thakgafala? Gomme a wela tsela a befetšwe.

13Bahlanka ba gagwe ba batamela ba bolela le yena ba re: Tata, ge e ka be moporofeta a go laetše go dira se segolo, a o ka be o sa se dire? Bjale o reng o gana ge a re: Hlapa o thakgafale?

14Ke mo a fologetšego nokeng ya Jorodane, a nwelela gašupa, ka mo monna wa Modimo a mmoditšego ka gona; mme mmele wa gagwe wa boela wa ba bjalo ka wa lesogana le lefsa, wa thakgafala.

15Bjale a boela go monna wa Modimo a na le lešaba la gagwe ka moka, a ema pele ga gagwe, a bolela a re: o tsebe gore nna ke lemogile ge mo lefaseng ka moka go se' Modimo ge e se go Isiraele. Bjale a ko amogele tebogo ya mohlanka wa gago.

16Elisa a re: Ka bophelo bja Morena yo ke mo hlankelago, nka se ke ka ba ka tšea selo! Monna yola ge a mo phegelela, Elisa a fela a gana.

17Naemane a ba a re: Ge o gana, gona nna mohlanka wa gago a nke ke newe mabu a ka bago morwalo wa dipokolopitsana tše pedi; gobane nna mohlanka wa gago nka se hlwe ke iša didimo medimong e šele, ge e se go Morena.

18Taba e lego gona še: Morena a a ntebalele nna mohlanka wa gago, ge mong waka a tlo tsena ngwakong wa Rimone a o khunamela moo, mme a tlo ba a ithekgile ka letsogo laka, le nna ka tlo khunama ke na nael. A Morena a ntebalele tšona tšeo!

19Elisa a re: Sepela o rotše pelo.

20Ya na ya re a fulere, a šetše a sepetše sebaka Gehasi mohlanka wa Elisa monna wa Modimo a re: Hleng mong waka o fo lesa Naemane monna e wa Siria a tloga, a sa tšea dilo tše a bego a tlile natšo! Ka bophelo bja Morena, nna ke a mo kganyelela ka yo tšea selo go yena.

21Ke moka Gehasi a kganyelela Naemane. Ya re ge Naemane a mmona a mo kganyelela, a fologa koloing ya gagwe, a mo hlakanetša, a re: A go sa thabilwe?

22Gehasi a re: Go sa thabilwe! Mong waka o nthomile a re: Sea masogana a mabedi a barwa ba baporofeta ba tšwago dithabeng tša Efuraimi; ba fihla go nna e sa le bjale. O ko ba nee Talente e tee ya silifera, le diaparo tše pedi tša monyanya.

23Naemane a re: O ko tšee ditalente tše pedi! A mo phegelela; a ba a phuthela Talente tše pedi tša silifera dikgwameng tše pedi, le diaparo tše pedi tša monyanya; a di nea masogana a mabedi a gagwe, ba goma le Gehasi ba mo rwaletše.

24Ya re ge ba etla mmotong, Gehasi a di tšea diatleng tša bona, a di uta ka ngwakong; banna bao a ba gomiša ba ikela.

25Gomme yena a tsena a hlankela mong wa gagwe. Ke mo Elisa a mmotšišitšego a re: Gehasi, o tšwa kae? Yena a re: Nna mohlanka wa gago ga ke na mo ke tšwago.

26Elisa a re: A pelo yaka ga se ya ya nago mola monna yola a fologa koloing a go hlakanetša? A ke lona lebaka la go tšea disilifera, le diaparo, le dirapa tša mehlware, le dirapa tša merara, le dinku, le dikgomo, le balata ba banna le ba basadi?

27Bjale lephera la Naemane le tlo gomarela wena le bana ba gago neng le neng. Gomme Gehasi a tloga go yena a šweufetše wa leswela.

← Chapter 4 Jump to: Chapter 6 →