2 Kings 16

Sotho 1951 (BIBELE)

← Chapter 15 Jump to: Chapter 17 →

1Ahasi morwa wa Jothama kgoši ya Juda o thomile go buša ka ngwaga wa lesome le metšo e šupago wa Peka morwa wa Remalia.

2O be a na le nywaga e masome a mabedi ge a thoma go buša, a fetša nywaga e lesome le metšo e selelago a le kgoši motseng wa Jerusalema, a se ke a dira tše di kgahlilego Morena Modimo wa gagwe, a se ke a etša Dafida tatagwe.

3Yena o tšere ka tsela ya dikgoši tša Isiraele, a ba a iša morwa wa gagwe ka mollong, e le go dira makgapha a dithšaba tšela tše Morena a di lelekilego ge Baisiraele ba fihla.

4A iša didimo le diorelo mo mebotong le dihlareng tše tala ka moka.

5Mehleng yeo go tlile Retsini kgoši ya Siria le Peka morwa wa Remalia kgoši ya Isiraele, ba tšwela motse wa Jerusalema dira ba lwa le wona, ba rakelela Ahasi; fela, ba se ke ba kgona selo ntweng yeo.

6Lebakeng leo Retsini kgoši ya Siria o thopolotše motse wa Elathe, a o bušetša go Edomo, a leleka Bajuda ba motseng woo wa Elathe; Baedomo ba tla ba dula ntshe go fihla lehono.

7Ahasi a roma batseta go Thigilathe-Pilesere kgoši ya Asiria, a re: Nna ke mohlanka wa gago, ke ngwana wa gago; tlaa o nnamolele diatleng tša kgoši ya Siria le tša kgoši ya Isiraele, gobane ba ntsogetše matla.

8Ahasi a tšea disilifera le digauta tše di bego di le Ngwakong wa Morena, le mo dipolokelong tša mošate, a loba kgoši ya Asiria ka tšona.

9Kgoši ya Asiria a kwa se a se bolelago, a tšwela Damaseko dira, a thopa motse woo, batho ba wona a ba iša bothopša kwa Kiri, a bolaya Retsini.

10Gomme kgoši Ahasi a tšwa a yo hlakanetša Thigilathe-Pilisere kgoši ya Asiria kwa motseng wa Damaseko. Gona moo Damaseko kgoši Ahasi a bona aletare, a romela moperisita Uria seswantšho sa yona, le meelo ya yona.

11Uria moperisita a dira aletare ka go ya ka seswantšho se kgoši Ahasi a mo rometšego sona a le Damaseko; a e dira kgoši Ahasi a sešo a boa Damaseko.

12Kgoši ya re go boa Damaseko, ya bona aletare yeo, ya batamela mo e bego e beilwe,

13ya fiša dihlabelo mo go yona, le didimo tša yona, ya tšholla dibego, ya fokela aletare ka madi a dileboga tša yona.

14Ge e le aletare yela ya mphiri e bego e eme pele ga Morena, Ahasi a e širošetša thoko, ya tloga mo pele ga mojako, ya šuthela aletare ya Ahasi sebaka.

15Gomme kgoši Ahasi a laela moperisita Uria a re: Mo aletareng e kgolo o thšume sehlabelo sa ka moswana, le sa mantšibua, le sehlabelo sa kgoši le sebego sa yona, le sehlabelo sa setšhaba ka moka sa naga, le dibego tša dijo le tša dino; madi ka moka a dihlabelo o a fokele mo go yona, le madi a didimo ka moka. Ge e le aletare yela ya mphiri, ke sa tlo bona se ke tlogo e dira.

16Uria a dira tšohle tše kgoši Ahasi a mo laetšego tšona.

17Gomme kgoši Ahasi a tloša dikgabišo tša mo mahlakoreng a dikoloinyana, a tloša le megopo ya gona. Mogopo o mogolo a o amaga dipholo tšela tša mphiri di bego di o rwele, a o bea mo go agetšwego ka mafsika.

18A tloša le mathudi a Sabatha a a bego a agilwe Ngwakong, a kgola mamati a mojako wa kgoši wa go tsena Ngwakong wa Morena; a dira bjalo ka baka la kgoši ya Asiria.

19Ge e le ditaba tše dingwe tša Ahasi, tše a di dirilego, naa ga di a ngwalwa mo pukung ya ditaba tša kgale tša dikgoši tša Juda?

20Ahasi o ithobaletše le botatagwe, a bolokwa mo go botatagwe motseng wa Dafida; legatong la gagwe gwa buša Hiskia morwa wa gagwe.

← Chapter 15 Jump to: Chapter 17 →