2 Kings 12

Sotho 1951 (BIBELE)

← Chapter 11 Jump to: Chapter 13 →

1Joase ge a thoma go buša o be a na le nywaga e šupago;

2o thomile go buša ka ngwaga wa go šupa wa mmušo wa Jehu, a fetša nywaga e masome a mane a le kgoši motseng wa Jerusalema. Leina la mmagwe e be e le Tsibya wa Bereseba.

3Joase bophelong bja gagwe ka moka o dirile tše di kgahlilego Morena, gobane o be a rutwa ke Joyada moperisita.

4Fela, tša a sa kago a di fediša ke meboto, gobane setšhaba se be se fela se iša didimo le diorelo mebotong.

5Joase o kile a botša baperisita a re: Ditšhelete ka moka tše kgethwa tše di tlišwago Ngwakong wa Morena, e lego ditšhelete tša ba ba balwago, le tše motho a lefišwago ka tšona, le tše motho a kago ithapa a di tliša Ngwakong wa Morena,

6ditšhelete tšeo baperisita ba di tšee go batho ba setšhaba sa gabo, gomme ka tšona ba lokiše Ngwako mo ba hwetšago o phušogile.

7Gomme ka ngwaga wa masome a mabedi a metšo e meraro wa kgoši Joase, baperisita ba be ba sešo ba lokiša Ngwako mo o bego o onetše.

8Ke mo Joase a biditšego Joyada le baperisita ba bangwe, a bolela le bona a re: Le reng le lesitše go lokiša Ngwako? Bjale ditšhelete tša batho ba setšhaba sa geno di se ke tša hlwa di tšewa ke lena; ke tša go lokiša Ngwako mo o onetšego.

9Gomme baperisita ba dumela gore tšhelete e tšwago setšhabeng e se ke ya amogelwa ke bona; le Ngwako o se ke wa lokišwa ke bona.

10Joyada moperisita a tšea polokelo, a thula lešoba sekhurumelong sa yona, a e bea ka lehlakoreng le letona la aletare, mo go tsenwago Ngwakong wa Morena ka gona. Gomme baperisita ba ba letago mojako ba tšea thšelete ka moka ye e ntšhetšwago Ngwako wa Morena, ba e tšhela mo go yona.

11Ya re mohla ba hwetšago tšhelete polokelong e le e ntši, gwa tla mongwadi wa kgoši le moperisita e mogolo, ba phutha ditšhelete tšeo di hweditšwego Ngwakong wa Morena, ba di bale,

12ba di gafele diatleng tša balaki ba modiro le bahlapetši ba Ngwako wa Morena. Bona bao ba di ntšhetša babetli ba dikwata le baagi ba ba bego ba dira mo Ngwakong wa Morena,

13le baagi ba merako, le babetli ba mafsika, gore ba reke dikwata le mafsika a go betlwa, gore go lokišwe Ngwako wa Morena, go rekwe dikago tšohle tša go lokiša Ngwako.

14Ge e le megopo ya silifera, le mefaka, le merufsi ya go fokela, le dinaka, le ge e le sebjana mang sa gauta goba silifera, tšona ga ba ka ba di dira ka tšhelete yeo ya go ntšhetšwa Ngwako wa Morena.

15Ba na ba fo di neela badiri ba mediro, gore ba lokiše Ngwako wa Morena ka tšona.

16Le gona ga ba ka ba nyaka palo ya tšona go bao ba bego ba di neela badiri; ba be ba dira ka go botana.

17Ge e le ditšhelete tša dibego le tša dilefa, tšona ga tša ka tša ntšhetšwa Ngwako wa Morena, gobane e be e le tša baperisita.

18Mehleng yeo gwa rotoga Hasaele kgoši ya Siria, a lwa le motse wa Gathe a o thopa. Gomme Hasaele a lebiša sefahlogo Jerusalema, a re a rotogele gona.

19Joase kgoši ya Juda a tšea dibego ka moka tše kgethwa tša botatagwe, boJosafate, le boJorama, le boAhasia magoši a Juda, le dibego tša gagwe tše kgethwa, le digauta ka moka tše di hweditšwego di le dipolokelong tša Ngwako wa Morena le tša ngwako wa kgoši, a di romela Hasaele kgoši ya Siria; mme Hasaele a lesa go tla Jerusalema.

20Ge e le ditaba tše dingwe tša Joase, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Juda?

21Bahlanka ba gagwe ba mo tsogetše matla, ba mo rerile ka bohwirihwiri, ba mmolaya sebong sa Milo motheogeng wa Sila.

22O bolailwe ke Josakara morwa wa Simeathe, le Josabadi morwa wa Somere, ba e bego e le bahlanka ba gagwe; a hwa ba mmoloka go botatagwe motseng wa Dafida; legatong la gagwe gwa buša Amatsia morwa wa gagwe.

← Chapter 11 Jump to: Chapter 13 →