2 Kings 19

Sotho 1951 (BIBELE)

← Chapter 18 Jump to: Chapter 20 →

1Kgoši Hiskia ge a di kwa, a gagola diaparo tša gagwe, a apara mankgeretla, a ya Ngwakong wa Morena.

2A roma Eliakima molaki wa mošate, le Sebena mongwadi le bagolo ba baperisita, ba ya go moporofeta Jesaya morwa wa Amotsi, ba ya ba apere mankgeretla.

3Ba bolela le yena ba re: Letšatši la lehono ke la tlalelo le la go rogwa le la go gobošwa. Bana ba kgaufsi le go belegwa, mme go hlokwa matla a go belega.

4Mohlomong Morena Modimo wa gago o kwile mantšu ao ka moka a Rabasake, yo mong wa gagwe kgoši ya Asiria a mo rometšego go goboša Modimo a phelago, gore a mo otle ka baka la maroga, a Modimo wa gago a a kwilego. Bjale hle hlatloša thapelo ya go rapelela mašalela a a sa lego gona.

5Bahlanka ba kgoši Hiskia ba sa tlile go Jesaya.

6Jesaya a ba rera a re: Botšang mong wa lena le re: Morena o re: O se ke wa tšhoga dipolelo tšeo tše bahlanka ba kgoši ya Asiria ba nkgobošitšego ka tšona.

7Tše ke tlogo di dira šidi: O tlo tsenwa ke moya, a kwa modumo, a be a boele gae; mme kwa gae ke tlo mo uša ka lerumo.

8Ya re ge Rabasake a goma, a hwetša kgoši ya Asiria e hlabana le motse wa Libina, ka gobane o be a kwile ge ba re: Kgoši e tlogetše motse wa Lakisi.

9Ya re ge kgoši ya Asiria e ekwa gore Thirihaka kgoši ya Kuše e tšwela dira, ya buša ya romela batseta go Hiskia ya re:

10Botšang Hiskia kgoši ya Juda le re: O se ke wa forwa ke Modimo wa gago yo o mmotilego, ge a re: Jerusalema go ka se ke gwa gafelwa diatleng tša kgoši ya Asiria.

11Hleng o kwile tše dikgoši tša Asiria di di dirilego dinaga ka moka, ge di gafilwe ka moka. A o re wena o ka phologa?

12A ditšhaba tše botate ba di fedišitšego, di phološitšwe ke medimo ya tšona? Ke ra: Gosana, le Harane, le Retsefa, le bana ba Edene ba ba bego ba le kwa Thelasara.

13E kae kgoši ya Hamathi, le kgoši ya Arapadi, le kgoši ya motse wa Sefarafaima, le Hena, le Ifa?

14Hiskia a re go amogela mangwalo go batseta bao, a a bala; a napa a rotogela Ngwakong wa Morena, a a phutholla pele ga Morena.

15Hiskia a rapela a le pele ga Morena a re: Morena Modimo wa Isiraele, wena o dulago gara Bakerubi! Modimo wa mebušo ka moka ya lefase ke wena o nnoši. Legodimo le lefase di dirilwe ke wena.

16Morena, a ko sekege tsebe o kwe; tutubolla mahlo o bone; kwaa mantšu a Sanheribe a a rometšego go goboša Modimo a phelago.

17Ka kgonthe, Morena, magoši a Asiria a šwalalantše ditšhaba le dinaga tša tšona.

18Medimo ya tšona a e lahletše mellong, gobane e be e se medimo, e be e le mediro ya diatla tša batho, dikwata le mafsika; ke ka baka leo ba kgonnego go e fediša.

19Bjale wena Morena Modimo wa rena, re namolele diatleng tša gagwe, gore mebušo yohle ya lefase e tle e tsebe ge Modimo a nnoši e le wena Morena.

20Ke mo Jesaya morwa wa Amotse a išitšego Lentšu go Hiskia, a re: Morena Modimo wa Isiraele o re: Tše o bego o di kgopela go nna ka baka la Sanheribe, ke di kwile.

21Lentšu le Morena a mmolelago ka lona šele: Mosetsana morwedi wa Tsione o a go nyatša, o a go kwera, o šišinya hlogo ge o fulere; o ryalo morwedi wa Jerusalema.

22Ke mang yo o mo gobošitšego wa mo rogaka? O be o bolela mang ge o hlaboša lentšu o khutlola mahlo? Ke tše o di dirilego mikgethwa wa Isiraele.

23Mong a bohle o mo gobošitše ka batseta ba gago, wa re: Ka bontši bja makoloi aka ke nametše dithaba le dirwaolong tša Libanone, ka rema hlare tše telele tša marokwana, letago la mekgorokgoro ya gona; ke yo goma kwa sehloeng sa gona, go yona tšhemo ya dithokgwa.

24Wa re: Ka epa ka nwa meetse a šele, ka gopiša noka tša Egipita tšohle ka dikgato tša dinao tšaka.

25A ga o ešo wa di kwa? Ke nna ke di beilego mehleng ya bogologolo, ka ba ke di phethile; bjale ka go tšweletša gore o be wa go shwalalanya metse ya dibo gore e be mekgobo ya mafsika.

26Baagi ba yona ba repha matsogo, ba ema ba tšhogile ba lewa ke dihlong, ba etša ngwang mašemong, le mahlogedi a manana, ba etša bjang morakong, le mabele a hwago ka phori, a sešo a ntšha dihlaka.

27Ge o dula, ge o tšwa, le mo o yago, ke a di tseba; ke tseba le mo o nthumolago.

28Gomme ka gobane o nthumotše, mme boikgogomošo bja gago ke bo kwile, ke tlo go lokela mogala waka nkong, ka go tlema molomo ka lerala laka, ka go gomiša ka tsela ye o tlilego ka yona.

29Seka se wena Hiskia o tlogo bona ka sona, sese: Lenyaga go tlo lewa tše di imedišitšego; išago go tlo lewa makgwakgwa; ka ngwaga wa boraro le tlo bjala la buna, la šema merara le ja dienywa tša yona.

30Ka gobane ba leloko la Juda, ba mašalela a phonyokgago, ba tlo boela ba tsema medu fase, ba gola ba enywa dienywa.

31Gobane mo Jerusalema go tlo tšwelela mašalela, baphonyokgi ba tlo tšwelela thabeng ya Tsione. Bogale bja Morena wa mašaba bo tlo dira tšeo.

32Ke ka baka leo kgoši ya Asiria a e rera a re: A ka se ke a tsena motseng wo; a ka se betše mosebe wa fihla gona; a ka se ke a o batamela ka kotse; a ka se ke a o rakelela.

33O tlo goma ka tsela ye a tlilego ka yona; mo motseng wono a ka se ke a tsena. Morena o realo.

34Motse wo ke tlo o phemela ka o namolela ka baka laka, le ka baka la Dafida mohlanka waka.

35Gomme bošego bjoo mo mešašeng ya Baasiria gwa tšwelela Morongwa wa Morena, a bolaya banna ya dikgao tše lekgolo le masome a seswai le metšo e mehlano. Ka moswana ge ba tsoga e sa le bošego, ba hwetša e le ditoto fela.

36Sanheribe kgoši ya Asiria a tsoga, a tloga, a boela Ninife.

37Ya re ge a khuname mo ngwakong wa Nisiroko modimo wa gagwe, barwa ba gagwe, Adirameleke le Saretsere ba mmolya ka tšhoša, ba tšhabela nageng ya Ararate. Legatong la gagwe gwa buša Asarahadoni morwa wa gagwe.

← Chapter 18 Jump to: Chapter 20 →