2 Kings 15

Sotho 1951 (BIBELE)

← Chapter 14 Jump to: Chapter 16 →

1Asaria morwa wa Amatsia kgoši ya Juda o thomile go buša ka ngwaga wa masome a mabedi a metšo e šupago wa Jerobeama a le kgoši ya Isiraele.

2O be a na le nywaga e lesome la metšo e selelago ge a thoma go buša, a fetša nywaga e masome a mahlano a metšo e mebedi a le kgoši motseng wa Jerusalema. Leina la mmagwe e be e le Jokolia wa Jerusalema.

3O dirile tše di kgahlilego Morena, a etša tatagwe Amatsia ka gohle.

4Fela, meboto ga ya ka ya fedišwa; setšhaba se be se fela se iša didimo le diorelo mebotong.

5Gomme Morena kgoši yeo o e kwišitše bohloko, ya tšwa lephera go fihla letšatšing la go hwa, ya dula ngwakong wa ka thoko; Jothama morwa wa kgoši a buša mošate le setšhaba sa naga yeo.

6Ge e le ditaba tše dingwe tša Asaria, le tšhole tše a di dirilego, naa ga di a ngwalwa mo pukung ya ditaba tša kgale tša dikgoši tša Juda?

7Asaria o ithobaletše le botatagwe, a bolokwa go botatagwe motseng wa Dafida; Jothama morwa wa gagwe a buša legatong la gagwe.

8Sakaria morwa wa Jerobeama o thomile go buša Isiraele ka ngwaga wa masome a mararo a metšo e seswai wa Asaria kgoši ya Juda; o feditše dikgwedi tše di selelago a le kgoši motseng wa Samaria.

9O dirile tše di befetšego Morena a etša botatagwe. Dibe tša Jerobeama morwa wa Nebata e a rutilego Isiraele go senya, ga a ka a di tlogela.

10O rerilwe ka bohwirihwiri ke Salume morwa wa Jabese; yena eo a mo hlaba, setšhaba se lebeletše, a mmolaya, a ba kgoši legatong la gagwe.

11Ge e le tše dingwe ditaba tša Sakaria ke tšela tše di ngwadilwego pukung ya ditaba tša kgale tša dikgoši tša Isiraele.

12Ke tšona tše di boletšwego ke Morena ge a botša Jehu a re: Barwa ba gago ba tlo hlatlamana ba dula sedulong sa Isiraele go fihla lelokong la bone; gomme go bile bjalo.

13Salume morwa wa Jabese o thomile go buša ka ngwaga wa masome a mararo a metšo e senyane wa Usia kgoši ya Juda, a fetša kgwedi e tee a le kgoši motseng wa Samaria.

14Gwa napa gwa rotoga Menaheme morwa wa Gadi a etšwa Thiritsa, a tla Samaria a hlaba Salume morwa wa Jabese, a mmolaya, yena a ba kgoši legatong la gagwe.

15Ge e le tše dingwe ditaba tša Salume, le tša bohwirihwiri bjo a bo dirilego, ke tšela tše di ngwadilwego pukung ya ditaba tša kgale tša dikgoši tša Isiraele.

16Menaheme o hutše motse wa Thipisa, a bolaya bohle ba ba bego ba le moo, le ba dinakaneng tša wona. Ke tše a di dirilego mola a boa Thiritsa, a ba bolaya ka ge ba ganne go mmulela kgoro, a re go hula motše, a fatola basadi bohle ba baima ba gona.

17Menaheme morwa wa Gadi o thomile go buša ka ngwaga wa masome a mararo a metšo e senyane wa Asaria kgoši ya Juda; o feditše nywaga e lesome a le kgoši motseng wa Samaria.

18O dirile tše di befetšego Morena; le ka tšatši letee ga a ka a tlogela dibe tša Jerobeama morwa wa Nebata, e a rutilego Isiraele go senya.

19Gwa tla Phule kgoši ya Asiria a hlagela naga; Menaheme a loba Phule ka Talente tše sekete tša silifera, gore a eme le yena, mmušo wa gagwe o tiele.

20Menaheme a ntšhiša Isiraele tšhelete yeo ya go loba; bahumi ka moka ba ntšhetša kgoši ya Asiria Sekele tše masome a fetšago seatla ka o tee ka o tee. Ya ba mo kgoši ya Asiria e gomago, ya tlogela naga yeo.

21Ge e le ditaba tše dingwe tša Menaheme, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Isiraele?

22Menaheme o ithobaletše le botatagwe, legatong la gagwe gwa buša Pekaya morwa wa gagwe.

23Pekaya morwa wa Menaheme o thomile go buša ka ngwaga wa masome a mahlano wa Asaria kgoši ya Juda, a fetša nywaga e mebedi a le kgoši motseng wa Samaria.

24O dirile tše di befetšego Morena, a se ke a lahla dibe tša Jerobeama morwa wa Nebata, e a rutilego Isiraele go senya.

25A rerwa ka bohwirihwiri ke Peka morwa wa Remalia kala ya gagwe; yena yo a mo hlaba a le Samaria sebong sa mošate a na le Arikobo le Ariye, a na le banna ba masome a fetšago seatla ba Bagileada; a mmolaya, a ba kgoši legatong la gagwe.

26Ge e le ditaba tše dingwe tša Pekaya, le tšohle tše a di dirilego, ke tšela tše di ngwadilwego pukung ya ditaba tša kgale tša dikgoši tša Isiraele.

27Peka morwa wa Remalia o thomile go buša Isiraele ka ngwaga wa masome a mahlano a metšo e mebedi wa Asaria kgoši ya Juda, a fetša nywaga e masome a mabedi a le kgoši motseng wa Samaria.

28O dirile tše di befetšego Morena, a se ke a lahla dibe tša Jerobeama morwa wa Nebata e a rutilego Isiraele go senya.

29Mehleng yeo ya Peka kgoši ya Isiraele go tlile Thigilathe-Pilesere kgoši ya Asiria, a tšea motse wa Iyone, le wa Abele-Bethe-Maaka, le wa Janoa, le wa Kedese, le wa Hatsora, le Gileada, le Galilea, le naga ya Nafutali, a iša batho ba gona bothopša kua Asiria.

30Gomme Hosea morwa wa Ela a rera Peka morwa wa Remalia ka bohwirihwiri, a mmolaya, a ba kgoši legatong la gagwe; e be e le ka ngwaga wa masome a mabedi wa Jothama morwa wa Usia.

31Ge e le ditaba tše dingwe tša Peka, le tšohle tše a di dirilego, ke tšela tše di ngwadilwego mo pukung ya ditaba tša kgale tša dikgoši tša Isiraele.

32Jothama morwa wa Usia kgoši ya Juda o thomile go buša ka ngwaga wa bobedi wa Peka morwa wa Remalia kgoši ya Isiraele.

33O be a na le nywaga e masome a mabedi a metšo e mehlano ge a thoma go buša, a fetša nywaga e lesome le metšo e selelago a le kgoši motseng wa Jerusalema. Leina la mmagwe e be e le Jerusa morwedi wa Tsadoko.

34O dirile tše di kgahlilego Morena, a etša tatagwe Usia ka tšohle.

35Fela, meboto yona ga ba ka ba e fediša; setšhaba se be se fela se iša didimo le diorelo gona moo. Ke yena a agilego kgoro ya godimo ya Ngwako wa Morena.

36Ge e le ditaba tše dingwe tša Jothama, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Juda?

37Mehleng yeo Morena o thomile go roma Retsini kgoši ya Siria, le Peka morwa wa Remalia, ba šwahlela naga ya Juda.

38Jothama o ithobaletše le botatagwe, a bolokwa lebitleng go botatagwe motseng wa Dafida tatagwe: legatong la gagwe gwa buša Ahasi morawa wa gagwe.

← Chapter 14 Jump to: Chapter 16 →