2 Kings 24

Sotho 1951 (BIBELE)

← Chapter 23 Jump to: Chapter 25 →

1Lebakeng la gagwe go tlile Nebukadinetsara kgoši ya Babele; Joyakima a mo loba nywaga e meraro, ya ba gona a mo hlanogelago.

2Morena a roma dira tša Bakaladea, le tša Basiria, le tša Bamoaba, le tša Baamoni, a di roma go yo fediša Juda; gwa phethega tše Morena a di boletšego ka baporofeta bahlanka ba gagwe.

3Ka kgonthe di diregetše Juda ka taelo ya Morena, gore a ba široše pele ga sefahlogo sa gagwe ka baka la dibe tša Manase, le ka baka la tšohle tše di dirilwego ke kgoši yeo,

4le ka baka la madi a se nago molato a a tšholotšwego ke yena, ka mo a bilego a tladitše motse wa Jerusalema ka madi a se nago molato; ke ka baka leo Morena a sa kago a rata go ba lebalela.

5Ge e le ditaba tše dingwe tša Joyakima, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Juda?

6Joyakima o ithobaletše le botatagwe; legatong la gagwe gwa buša Joyakini morwa wa gagwe.

7Kgoši ya Egipita ga ya ka ya hlwa e rotoga e etšwa kua nageng ya yona, ka gobane kgoši ya Babele e be e thopile tšohle tše e bego e le tša kgoši ya Egipita go tloga ka nokeng ya Egipita go fihla ka noka ya Forate.

8Yoyakini o be a na le nywaga e lesome le metšo e seswai ge a thoma go buša, a buša kgwedi tše tharo a le Jerusalema. Leina la mmagwe e be e le Nehusitha morwedi wa Elinathane wa Jerusalema.

9O dirile tše di befelago Morena, a dira tšohle tše di bego di dirwa ke tatagwe.

10Mehleng yeo gwa tšwelela bahlanka ba Nebukadinetsara kgoši ya Babele, ba tla Jerusalema, motse wa rakelelwa.

11Nebukadinetsara kgoši ya Babele a tla go lwa le motse wo ge bahlanka ba gagwe ba šetše ba o rakeletše.

12Joyakini kgoši ya Juda a tšwela go kgoši ya Babele, a ya a na le mmagwe, le bahlanka ba gagwe, le bakgoma ba gagwe, le balaki ba ngwako wa gagwe. Kgoši ya Babele ya mo tlema; e be e le ka ngwaga wa seswai wa pušo ya gagwe.

13Ya tšea le mahumo ka moka a Ngwako wa Morena, le mahumo a mošate, ya rebola dilo ka moka tše di bego di dirilwe ke Salomo kgoši ya Isiraele mo Ntlongkgethwa ya Jerusalema; gwa direga se Morena a se boletšego.

14Ba Jerusalema ka moka ba išwa bothopša, le bakgoma ka moka, le bahlabani ka moka; e be e le dikete tše lesome tša mathopša. A thopa le babetli ba dikwata, le barudi ka moka; a se ke a tlogela motho, ge e se bahumanegi, batho ba naga fela.

15Joyakini o mo išitše bothopša kua Babele, le mmago kgoši, le basadi ba kgoši, le balaki ba ngwako wa kgoši, le bakgoma ba naga, a tloga nabo Jerusalema, a ba iša bothopša kua Babele.

16Le banna ka moka ba bahlabani ba dikete tše di šupago, le babetli le barudi ba sekete setee; le banna ka moka ba ba swarago lerumo, kgoši ya Babele e ba išitše Babele bothopša.

17Gomme kgoši ya Babele ya bea Mathanya maloma Joyakini a ba kgoši legatong la gagwe; a fetola leina la gagwe a mo rea la Tsedekia.

18Tsedekia o be a na le nywaga e masome a mabedi a motšo o tee ge a eba kgoši, a fetša nywaga e lesome le motšo o tee e le kgoši motseng wa Jerusalema. Leina la mmagwe e be e le Hamutala morwedi wa Jeremia wa Libina.

19O dirile se se befelago Morena, a dira tše di bego di dirwa ke Joyakima.

20Ka kgonthe dilo tše di diregetše Jerusalema le Juda ka ge Morena a ba befeletšwe, a ba a ba raka ba tloga pele ga gagwe.

← Chapter 23 Jump to: Chapter 25 →