2 Kings 22

Sotho 1951 (BIBELE)

← Chapter 21 Jump to: Chapter 23 →

1Josia ge a thoma go buša o be a na le nywaga e seswai; o feditše nywaga e masome a mararo a motšo o tee a le kgoši motseng wa Jerusalema. Leina la mmagwe e be e le Jedida morwedi wa Adaya wa Bosikata.

2O dirile tše di kgahlilego Morena mo go fela, a tšea ka tsela ya Dafida tatagwe, a se ke a arogela ka mo go le letona le ge e le go la ntsogošo.

3Ka ngwaga wa lesome le metšo e seswai wa pušo ya gagwe, o kile a roma Safane mongwadi morwa wa Atsalia morwa wa Mesulama, a re a ye Ngwakong wa Morena, a re:

4Rotogela go Hilikia moperisita e mogolo, o re a bale ditšhelete tše di tlišitšwego Ngwakong wa Morena. Tše baleti ba mojako ba di kgobetšego go setšhaba.

5A a di neele bahlapetši ba modiro diatleng, ba ba beilwego go laka Ngwako wa Morena; bona ba nee badiri ba mediro ba mo Ngwakong wa Morena, ba ba lokišago mo Ngwako o onalago.

6E lego babetli ba dikwata, le baagi ba maboto, ba reke dikwata le mafsika a go betlwa a go lokiša Ngwako.

7Fela, ditšhelete tše ba neelwago diatleng, di se ke tša balwa; ba dire ka go ba bota.

8Ke mo moperisita e mogolo Hilikia a boditšego Safane mongwadi a re: Nna ke hweditše puku ya melao fa Ngwakong wa Morena. Gomme Hilikia a neela Safane puku yeo, a re a e bale.

9Safane mongwadi a tla go kgoši a e anegela a re: Bahlanka ba gago ba kgobetše ditšhelete tše ba di hweditšego Ngwakong wa Morena, gomme ba di neetše bahlapetši ba mediro diatleng, e lego bona balaki ba Ngwako wa Morena.

10Safane mongwadi a tsebo botša kgoši a re: Hilikia moperisita o nneetše puku. Safane a e balela kgoši.

11Ya re ge kgoši e ekwa ditaba tša puku ya melao, a gagola diaparo tša gagwe.

12Gomme kgoši a laela Hilikia moperisita, le Ahikama morwa wa Safane, le Akiboro morwa wa Mikaya mohlanka wa kgoši, a re:

13Yang le botšiše Morena ka baka laka, le ka baka la setšhaba, le ka baka la Juda ka moka. Le botšiše taba ya puku ye e hweditšwego; gobane bogale bja Morena ke bjo bogolo; bo re tuketše ka gobane botata wešo ba sa ka ba kwa se puku ye e se bolelago, ba sa ka ba dira tšohle tše re ngwaletšwego tšona.

14Hilikia moperisita, le Ahikama, le Akiboro, le Safane, le Asaya, ba ya go Huluda moporofeta wa mosadi, mogatša wa Salume morwa wa Thikwa morwa wa Harahasi moloti wa diaparo. Ge e le Huluda o be a agile motseng wa Jerusalema ka thoko e nngwe. Ba tla ba bolela le yena.

15Yena a re: Morena Modimo wa Isiraele o re: Botšang monna eo a le rometšego go nna, le re:

16Morena Modimo wa Isiraele o re: Le tsebe gore motse wo ke o tlišetša dikotsi tše di tlogo wela batho bohle ba ba agilego go wona, tšona tšeo di ngwadilwego pukung yeo e badilwego ke kgoši ya Juda.

17Ke tla di dira ka gobane ba ntahlile, ba thuntšhetša medimo e šele diorelo, ba rumola nna ka mediro ka moka ya diatla tša bona; bjale bogale bjaka bo tlo tukela motse wo, bja se ke bja tingwa.

18Ge e le kgoši ye ya Juda, e le rometšego go botšiša Morena, le e botšeng le re: Morena Modimo wa Isiraele o re:

19Ge e le wena -- ka gobane pelo ya gago e letafetše, wa ikokobetša pele ga Morena mola o ekwa tše ke boletšego motse wo le baagi ba wona ka tšona, ka re o tlo ba setšhošetši le lešapa, mme wa ntelela -- wena ke go kwile! Morena o realo.

20Bjale tsebage; wena ke tlo go goroša go botatago; o tlo išwa lebitleng la gago e le šebešebe, mme mahlo a gago a ka se ke a bona dikotsi ka moka tše ke tlogo di tliša felo fa. Phetolo yeo ba e iša go kgoši.

← Chapter 21 Jump to: Chapter 23 →