Zechariah 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Dárá ke dúsre baras ke áṭhweṉ mahíne meṉ Ḳhudáwand ká kalám Zakariyáh nabí bin Barakiyáh bin ‘Iddú par názil húá,

2ki Ḳhudáwand tumháre bápdádá se saḳht náráz rahá.

3Is liye tú un se kah, Rabb u’l afwáj yúṉ farmátá hai, ki Tum merí taraf rujú‘ ho, Rabb u’l afwáj ká farmán hai; to maiṉ tumhárí taraf rujú‘ húṉgá, Rabb u’l afwáj farmátá hai.

4Tum apne bápdádá kí mánind na bano, jin se agle nabíoṉ ne ba áwáz i baland kahá, Rabb u’l afwáj yúṉ farmátá hai, ki Tum apní burí rawish aur bada‘málí se báz áo; par unhoṉ ne na suná, aur mujhe na máná, Ḳhudáwand farmátá hai.

5Tumháre bápdádá kaháṉ haiṉ? kyá ambiyá hamesha zinda rahte haiṉ?

6Lekin merá kalám aur mere áín, jo maiṉ ne apne ḳhidmatguzár nabíoṉ ko farmáe the, kyá wuh tumháre bápdádá par púre nahíṉ húe? chunáṉchi unhoṉ ne rujú‘ lákar kahá, ki Rabb u’l afwáj ne apne iráde ke mutábiq hamárí ‘ádát aur hamáre a‘mál ká badla diyá hai.

7Dárá ke dúsre baras aur gyárahweṉ mahíne ya‘ní máh i Sabát kí chaubíswíṉ táríḳh ko Ḳhudáwand ká kalám Zakariyáh nabí bin Barakiyáh bin ‘Iddú par názil húá,

8ki Maiṉ ne ḳhwáb meṉ dekhá, ki ek shaḳhs suraṉg ghoṛe par sawár mihṉdí ke daraḳhtoṉ ke darmiyán nasheb meṉ khaṛá thá, aur us ke píchhe suraṉg, aur kumait, aur nuqre ghoṛe the.

9Tab maiṉ ne kahá, ki Ai mere áqá, yih kyá haiṉ? Is par firishte ne jo mujh se guftogú kartá thá kahá, Maiṉ tujhe dikháúṉgá ki yih kyá haiṉ.

10Aur jo shaḳhs mihṉdí ke daraḳhtoṉ ke darmiyán khaṛá thá kahne lagá, Yih wuh haiṉ jin ko Ḳhudáwand ne bhejá hai ki sárí dunyá meṉ sair kareṉ.

11Aur unhoṉ ne Ḳhudáwand ke firishte se, jo mihṉdí ke daraḳhtoṉ ke darmiyán khaṛá thá, kahá, Ham ne sárí dunyá kí sair kí hai, aur dekhá ki sárí zamín meṉ amn o amán hai.

12Phir Ḳhudáwand ke firishte ne kahá, Ai Rabb u’l afwáj, tú Yarúshalem aur Yahúdáh ke shahroṉ par, jin se tú sattar baras se náráz hai, kab tak rahm na karegá?

13Aur Ḳhudáwand ne us firishte ko jo mujh se guftogú kartá thá muláim aur tasallíbaḳhsh jawáb diyá.

14Tab us firishte ne jo mujh se guftogú kartá thá mujh se kahá, ki Baland áwáz se kah, Rabb u’l afwáj yúṉ farmátá hai, ki Mujhe Yarúshalem aur Siyyún ke liye baṛí g̣airat hai.

15Aur maiṉ un qaumoṉ se jo árám meṉ haiṉ niháyat náráz húṉ; kyúṉki jab maiṉ thoṛá náráz thá, to unhoṉ ne us áfat ko bahut ziyáda kar diyá.

16Is liye Ḳhudáwand yúṉ farmátá hai, ki Maiṉ rahmat ke sáth Yarúshalem ko wápas áyá húṉ; us meṉ merá maskan ta‘mír kiyá jáegá, Rabb u’l afwáj farmátá hai; aur Yarúshalem par phir sút kheṉchá jáegá.

17Phir baland áwáz se kah, Rabb u’l afwáj yúṉ farmátá hai, ki Mere shahr dobára ḳhushhálí se ma‘múr hoṉge, kyúṉki Ḳhudáwand phir Siyyún ko tasallí baḳhshegá, aur Yarúshalem ko qubúl farmáegá.

18Phir maiṉ ne áṉkh uṭhákar nigáh kí, aur kyá dekhtá húṉ, ki chár síṉg haiṉ.

19Aur maiṉ ne us firishte se jo mujh se guftogú kartá thá púchhá, ki Yih kyá haiṉ? Us ne mujhe jawáb diyá, Yih wuh síṉg haiṉ jinhoṉ ne Yahúdáh aur Isráíl, aur Yarúshalem ko paráganda kiyá hai.

20Phir Ḳhudáwand ne mujhe chár kárígar dikháe.

21Tab maiṉ ne kahá, Yih kyúṉ áe haiṉ? Us ne jawáb diyá, Yih wuh síṉg haiṉ jinhoṉ ne Yahúdáh ko aisá paráganda kiyá ki koí sir na uṭhá saká; lekin yih is liye áe haiṉ ki un ko ḍaráeṉ, aur un qaumoṉ ke síṉgoṉ ko past kareṉ, jinhoṉ ne Yahúdáh ke mulk ko paráganda karne ke liye síṉg uṭháyá hai.

Jump to: Chapter 2 →