Zechariah 12

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 11 Jump to: Chapter 13 →

1Isráíl kí bábat Ḳhudáwand kí taraf se bár i nubuwwat. Ḳhudáwand jo ásmán ko tántá, aur zamín kí bunyád ḍáltá, aur insán ke andar us kí rúh paidá kartá hai yúṉ farmátá hai.

2Dekho, maiṉ Yarúshalem ko irdgird ke sab logoṉ ke liye laṛkhaṛáhaṭ ká piyála banáúṉgá, aur Yarúshalem ke muhásare ke waqt Yahúdáh ká bhí yihí hál hogá.

3Aur maiṉ us roz Yarúshalem ko sab qaumoṉ ke liye ek bhárí patthar baná dúṉgá, aur jo use uṭháeṉge sab gháyal hoṉge, aur dunyá kí sab qaumeṉ us ke muqábil jama‘ hoṉgí.

4Ḳhudáwand farmátá hai, maiṉ us roz har ghoṛe ko hairatzada, aur us ke sawár ko díwána kar dúṉgá; lekin Yahúdáh ke gharáne par nigáh rakkhúṉgá, aur qaumoṉ ke sab ghoṛoṉ ko andhá kar dúṉgá.

5Tab Yahúdáh ke farmánrawá dil meṉ kaheṉge, ki Yarúshalem ke báshinde apne Ḳhudá Rabb u’l afwáj ke sabab se hamárí tawánáí haiṉ.

6Maiṉ us roz Yahúdáh ke farmánrawáoṉ ko lakṛiyoṉ meṉ jaltí angíṭhí, aur púloṉ meṉ mash‘al kí mánind banáúṉgá; aur wuh dahine báeṉ aur irdgird kí sab qaumoṉ ko khá jáeṉge, aur ahl i Yarúshalem phir apne maqám par Yarúshalem hí meṉ ábád hoṉge.

7Aur Ḳhudáwand Yahúdáh ke ḳhaimoṉ ko pahle riháí baḳhshegá, táki Dáúd ká gharáná aur Yarúshalem ke báshinde Yahúdáh ke ḳhiláf faḳhr na kareṉ.

8Us roz Ḳhudáwand Yarúshalem ke báshindoṉ kí himáyat karegá; aur un meṉ ká sab se kamzor us roz Dáúd kí mánind hogá, aur Dáúd ká gharáná Ḳhudá kí mánind, ya‘ní Ḳhudáwand ke firishte kí mánind, jo un ke áge áge chaltá ho.

9Aur maiṉ us roz Yarúshalem kí sab muḳhálif qaumoṉ kí halákat ká qasd karúṉgá.

10Aur maiṉ Dáúd ke gharáne aur Yarúshalem ke báshindoṉ par fazl aur munáját kí rúh názil karúṉgá; aur wuh us par, jis ko unhoṉ ne chhedá hai, nazar kareṉge; aur us ke liye mátam kareṉge, jaisá koí apne iklaute ke liye kartá hai; aur us ke liye talḳhkám hoṉge, jaise koí apne pahlauṭhe ke liye hotá hai.

11Aur us roz Yarúshalem meṉ baṛá mátam hogá, Hadad Rimmon ke mátam kí mánind jo Majiddon kí wádí meṉ húá.

12Aur tamám mulk mátam karegá, har ek gharáná alag; Dáúd ká gharáná alag, aur un kí bíwiyáṉ alag, Nátan ká gharáná alag, aur un kí bíwiyáṉ alag;

13Láwí ká gharáná alag, aur un kí bíwiyáṉ alag; Sama‘í ká gharáná alag, aur un kí bíwiyáṉ alag;

14báqí sab gharáne alag alag, aur un kí bíwiyáṉ alag alag.

← Chapter 11 Jump to: Chapter 13 →