Zechariah 10

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 9 Jump to: Chapter 11 →

1Pichhlí barsát kí bárish ke liye Ḳhudáwand se du‘á karo, jo bijlí chamkátá hai; wuh bárish bhejegá, aur maidán meṉ sab ke liye ghás ugáegá.

2Kyúṉki tiráfím ne batálat kí báteṉ kahí haiṉ, aur g̣aibbínoṉ ne batálat dekhí, aur jhúthe ḳhwáb bayán kiye haiṉ; un kí tasallí behaqíqat hai; is liye wuh bheṛoṉ kí mánind bhaṭak gaye; unhoṉ ne dukh páyá, kyúṉki un ká koí charwáhá na thá.

3Merá g̣azab charwáhoṉ par bhaṛká hai, aur maiṉ peshwáoṉ ko sazá dúṉgá: taubhí Rabb u’l afwáj ne apne galle, ya‘ní baní Yahúdáh par nazar kí hai, aur un ko goyá apná ḳhúbsúrat jangí ghoṛá banáegá.

4Un hí meṉ se kone ká patthar, aur khúṉṭí, aur jangí kamán, aur sab hákim nikleṉge.

5Aur wuh pahlawánoṉ kí tarah laṛáí meṉ dushmanoṉ ko galiyoṉ kí kích kí mánind latáṛeṉge; aur wuh laṛeṉge, kyúṉki Ḳhudáwand un ke sáth hai: aur sawár sarásíma ho jáeṉge.

6Aur maiṉ Yahúdáh ke gharáne kí taqwíyat karúṉgá, aur Yúsuf ke gharáne ko riháí baḳhshúṉgá; aur un ko wápas láúṉgá, kyúṉki maiṉ un par rahm kartá húṉ; aur wuh aise hoṉge, goyá maiṉ ne un ko kabhí tark nahíṉ kiyá thá; kyúṉki maiṉ Ḳhudáwand un ká Ḳhudá húṉ, aur un kí sunúṉgá.

7Aur baní Ifráím pahlawánoṉ kí mánind hoṉge, aur un ke dil goyá mai se masrúr hoṉge; balki un kí aulád bhí dekhegí aur shádmání karegí; un ke dil Ḳhudáwand se ḳhush hoṉge.

8Maiṉ síṭí bajákar un ko faráham karúṉgá; kyúṉki maiṉ ne un ká fidiya diyá hai; aur wuh bahut ho jáeṉge, jaise pahle the.

9Agarchi maiṉ ne un ko qaumoṉ meṉ paráganda kiyá, taubhí wuh un dúr ke mulkoṉ meṉ mujhe yád kareṉge; aur apne bálbachchoṉ samet zinda raheṉge, aur wápas áeṉge.

10Maiṉ un ko mulk i Misr se wápas láúṉgá, aur Asúr se jama‘ karúṉgá, aur Jili‘ád aur Lubnán kí sarzamín meṉ pahuṉcháúṉgá, yaháṉ tak ki un ke liye gunjáish na hogí.

11Aur wuh musíbat ke samundar se guzar jáegá; aur us kí lahroṉ ko máregá, aur daryá e Níl tah tak súkh jáegá; aur Asúr ká takabbur ṭúṭ jáegá; aur Misr ká ‘asá játá rahegá.

12Aur maiṉ un ko Ḳhudáwand meṉ taqwíyat baḳhshúṉgá; aur wuh us ká nám lekar idhar udhar chaleṉge, Ḳhudáwand farmátá hai.

← Chapter 9 Jump to: Chapter 11 →