Zechariah 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Aur wuh firishta jo mujh se báteṉ kartá thá phir áyá; aur us ne goyá mujhe níṉd se jagá diyá,

2aur púchhá, Tú kyá dekhtá hai? Aur maiṉ ne kahá, ki Maiṉ ek sone ká sham‘adán dekhtá húṉ, jis ke sir par ek kaṭorá hai, aur us ke úpar sát chirág̣ haiṉ, aur un sát chirág̣oṉ kí sát sát naliyáṉ.

3Aur us ke pás zaitún ke do daraḳht haiṉ, ek to kaṭore kí dahiní taraf aur dúsrá báíṉ taraf.

4Aur maiṉ ne us firishte se jo mujh se kalám kartá thá púchhá, Ai mere áqá, yih kyá haiṉ?

5Tab us firishte ne jo mujh se kalám kartá thá kahá, Kyá tú nahíṉ jántá yih kyá haiṉ? Maiṉ ne kahá, Nahíṉ, ai mere áqá.

6Tab us ne mujhe jawáb diyá, ki Yih Zarubbábul ke liye Ḳhudáwand ká kalám hai, ki Na to zor se, aur na tawánáí se, balki merí rúh se, Rabb u’l afwáj farmátá hai.

7Ai baṛe paháṛ, tú kyá hai? tú Zarubbábul ke sámne maidán ho jáegá: aur jab wuh choṭí ká patthar nikál láegá, to log pukáreṉge, ki Us par fazl ho, fazl ho.

8Phir Ḳhudáwand ká kalám mujh par názil húá,

9ki Zarubbábul ke háthoṉ ne is ghar kí neo ḍálí, aur usí ke háth ise tamám bhí kareṉge; tab tú jánegá ki Rabb u’l afwáj ne mujhe tumháre pás bhejá hai.

10Kyúṉki kaun hai jis ne chhoṭí chízoṉ ke din kí tahqír kí hai? kyúṉki Ḳhudáwand kí wuh sát áṉkheṉ jo sárí zamín kí sair kartí haiṉ ḳhushí se us sáhúl ko dekhtí haiṉ jo Zarubbábul ke háth meṉ hai.

11Tab maiṉ ne us se púchhá, ki Yih donoṉ zaitún ke daraḳht, jo sham‘adán ke dahine báeṉ haiṉ, kyá haiṉ?

12Aur maiṉ ne dobára us se púchhá, ki Zaitún kí yih do sháḳheṉ kyá haiṉ, jo sone kí do naliyoṉ ke muttasil haiṉ, jin kí ráh se sunahlá tel niklá chalá játá hai?

13Us ne mujhe jawáb diyá, Kyá tú nahíṉ jántá yih kyá haiṉ? Maiṉ ne kahá, Nahíṉ, ai mere áqá.

14Us ne kahá, Yih wuh do mamsúh haiṉ jo Rabbu’l ‘álamín ke huzúr khaṛe rahte haiṉ.

← Chapter 3 Jump to: Chapter 5 →