Zechariah 11

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 10 Jump to: Chapter 12 →

1Ai Lubnán, tú apne darwázoṉ ko khol de, táki ág tere deodároṉ ko khá jáe.

2Ai saro ke daraḳht, nauha kar; kyúṉki deodár gir gayá; aur shándár g̣árat ho gaye; ai Basaní balút ke daraḳhto, fig̣án karo; kyúṉki dushwárguzár jangal sáf ho gayá.

3Charwáhoṉ ka nauha kí áwáz átí hai, kyúṉki un kí hashmat g̣árat húí; jawán babaroṉ kí garaj sunáí detí hai, kyúṉki Yardan ká jangal barbád ho gayá.

4Ḳhudáwand merá Ḳhudá yúṉ farmátá hai, ki Jo bheṛeṉ zabh ho rahí haiṉ, un ko chará;

5jin ke málik un ko zabh karte aur apne áp ko bequsúr samajhte haiṉ; aur jin ke bechnewále kahte haiṉ, Ḳhudáwand ká shukr ho, ki ham máldár húe; aur un ke charwáhe un par rahm nahíṉ karte.

6Kyúṉki Ḳhudáwand farmátá hai, Maiṉ mulk ke báshindoṉ par phir rahm nahíṉ karúṉgá, balki har shaḳhs ko us ke hamsáye aur us ke bádsháh ke hawále kar dúṉgá; aur wuh mulk ko tabáh kareṉge, aur maiṉ un ko un ke háth se nahíṉ chhuṛáúṉgá.

7Pas maiṉ ne un bheṛoṉ ko, jo zabh ho rahí thíṉ, ya‘ní galle ke miskínoṉ ko charáyá; aur maiṉ ne do láṭhiyáṉ líṉ; ek ká nám Fazl rakkhá, aur dúsrí ká Ittihád; aur galle ko charáyá.

8Aur maiṉ ne ek mahíne meṉ tín charwáhoṉ ko halák kiyá; kyúṉki merí ján un se bezár thí, aur un ke dil meṉ mujh se karáhiyat thí.

9Tab maiṉ ne kahá, ki Ab maiṉ tum ko na charáúṉgá; marnewálá mar jáe; aur halák honewálá halák ho; aur báqí ek dúsre ká gosht kháeṉ.

10Tab maiṉ ne Fazl námí láṭhí ko liyá, aur use káṭ ḍálá, ki apne ‘ahd ko jo maiṉ ne sab logoṉ se báṉdhá thá mansúḳh karúṉ.

11Aur wuh usí din mansúḳh ho gayá; tab galle ke miskínoṉ ne jo merí sunte the ma‘lúm kiyá ki yih Ḳhudáwand ká kalám hai.

12Aur maiṉ ne un se kahá, ki Agar tumhárí nazar meṉ ṭhík ho, to merí mazdúrí mujhe do; nahíṉ to, mat do; aur unhoṉ ne merí mazdúrí ke liye tís rupaye tolkar diye.

13Aur Ḳhudáwand ne mujhe hukm diyá, ki Use kumhár ke sámne pheṉk de, ya‘ní is baṛí qímat ko jo unhoṉ ne mere liye ṭhahráí; aur maiṉ ne yih tís rupaye lekar Ḳhudáwand ke ghar meṉ kumhár ke sámne pheṉk diye.

14Tab maiṉ ne dúsrí láṭhí ya‘ní Ittihád námí ko káṭ ḍálá, táki us birádarí ko jo Yahúdáh aur Isráíl meṉ hai mauqúf karúṉ.

15Aur Ḳhudáwand ne mujhe farmáyá, ki Tú phir nádán charwáhe ká sámán le.

16Kyúṉki dekh, maiṉ mulk meṉ aisá chaupán barpá karúṉgá jo halák honewále kí ḳhabargírí, aur bhaṭke húe kí talásh, aur zaḳhmí ká ‘iláj na karegá, aur tandurust ko na charáegá, par moṭoṉ ká gosht kháegá, aur un ke khuroṉ ko toṛ ḍálegá.

17Us nábakár charwáhe par afsos, jo galle ko chhoṛ játá hai: talwár us ke bázú aur us kí dahiní áṉkh par á paṛegí; us ká bázú bi’lkull súkh jáegá, aur us kí dahiní áṉkh phúṭ jáegí.

← Chapter 10 Jump to: Chapter 12 →