Zechariah 8

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 7 Jump to: Chapter 9 →

1Phir Ḳhudáwand ká kalám mujh par názil húá,

2Rabb u’l afwáj yúṉ farmátá hai, ki Mujhe Siyyún ke liye baṛí se baṛí g̣airat hai; balki maiṉ g̣airat se saḳht g̣azabnák húá.

3Ḳhudáwand yúṉ farmátá hai, ki Maiṉ Siyyún meṉ wápas áyá húṉ, aur Yarúshalem meṉ sukúnat karúṉgá; aur Yarúshalem ká nám Shahr i sidq hogá, aur Rabb u’l afwáj ká paháṛ Koh i muqaddas kahláegá.

4Rabb u’l afwáj yúṉ farmátá hai, ki Yarúshalem ke kúchoṉ meṉ ‘umrrasída mard o zan buṛhápe ke sabab se háth meṉ ‘asá liye húe phir baiṭhe hoṉge.

5Aur shahr ke kúche khelnewále laṛke laṛkiyoṉ se ma‘múr hoṉge.

6Aur Rabb u’l afwáj yúṉ farmátá hai, ki Agarchi un aiyám meṉ yih amr in logoṉ ke baqiye kí nazar meṉ hairatafzá ho, taubhí kyá merí nazar meṉ hairatafza hogá? Rabb u’l afwáj farmátá hai.

7Rabb u’l afwáj yúṉ farmátá hai, Dekh, maiṉ apne logoṉ ko mashriqí aur mag̣ribí mamálik se chhuṛá lúṉgá:

8aur maiṉ un ko wápas láúṉgá, aur wuh Yarúshalem meṉ sukúnat kareṉge; aur wuh mere log hoṉge, aur maiṉ rástí o sadáqat se un ká Ḳhudá húṉgá.

9Rabb u’l afwáj yúṉ farmátá hai, Ai logo, apne háthoṉ ko mazbút karo; tum jo is waqt yih kalám sunte ho, jo Rabb u’l afwáj ke ghar ya‘ní haíkal kí ta‘mír ke liye bunyád ḍálte waqt nabíoṉ kí ma‘rifat názil húá.

10Kyúṉki un dinoṉ se pahle na insán ke liye mazdúrí thí, aur na haiwán ká kiráya thá; aur dushman ke sabab se ánejánewále mazbút na the; kyúṉki maiṉ ne sab logoṉ meṉ nifáq ḍál diyá.

11Lekin ab maiṉ in logoṉ ke baqiye ke sáth pahle kí tarah pesh na áúṉgá, Rabb u’l afwáj farmátá hai;

12balki zirá‘at salámatí se hogí; ták apná phal degí, aur zamín apná hásil; aur ásmán se os paṛegí; aur maiṉ in logoṉ ke baqiye ko in sab barakatoṉ ká wáris banáúṉgá.

13Ai baní Yahúdáh, aur ai baní Isráíl, jis tarah tum dúsrí qaumoṉ meṉ la‘nat the, usí tarah maiṉ tum ko chhuṛáúṉgá, aur tum barakat hoge: hirásán na ho, balki tumháre háth mazbút hoṉ.

14Kyúṉki Rabb u’l afwáj yúṉ farmátá hai, ki Jis tarah maiṉ ne qasd kiyá thá ki tum par áfat láúṉ, jab tumháre bápdádá ne mujhe g̣azabnák kiyá, aur maiṉ apne iráde se báz na rahá, Rabb u’l afwáj farmátá hai;

15usí tarah maiṉ ne ab iráda kiyá hai ki Yarúshalem aur Yahúdáh ke gharáne se nekí karúṉ; pas tum hirásán na ho.

16Par lázim hai ki tum in bátoṉ par ‘amál karo; Tum sab apne paṛausiyoṉ se sach bolo, aur apne pháṭakoṉ meṉ rástí se ‘adálat karo, táki salámatí ho.

17Aur tum meṉ se koí apne bháí ke ḳhiláf dil meṉ burá mansúba na báṉdhe; aur jhúṭhí qasam ko ‘azíz na rakkhe; kyúṉki maiṉ in sab bátoṉ se nafrat rakhtá húṉ, Ḳhudáwand farmátá hai.

18Phir Rabb u’l afwáj ká kalám mujh par názil húá,

19ki Rabb u’l afwáj yúṉ farmátá hai, ki Chauthe, aur páṉchweṉ, aur sátweṉ, aur dasweṉ mahíne ká roza, baní Yahúdáh ke liye ḳhushí aur ḳhurramí ká din, aur shádmání kí ‘íd hogá; is liye tum sachcháí aur salámatí ko ‘azíz rakkho.

20Rabb u’l afwáj yúṉ farmátá hai, ki Phir qaumeṉ aur baṛe baṛe shahroṉ ke báshinde áeṉge;

21aur ek shahr ke báshinde dúsre shahr meṉ jákar kaheṉge, Chalo, ham jald Ḳhudáwand se darḳhwást kareṉ, aur Rabb u’l afwáj ke tálib hoṉ; maiṉ bhí chaltá húṉ.

22Bahut sí ummateṉ aur zabardast qaumeṉ Rabb u’l afwáj kí tálib hoṉgí, aur Ḳhudáwand se darḳhwást karne ko Yarúshalem meṉ áeṉgí.

23Rabb u’l afwáj yúṉ farmátá hai, ki Un aiyám meṉ muḳhtalif ahl i lug̣at meṉ se das ádmí háth baṛhákar ek Yahúdí ká dáman pakṛeṉge, aur kaheṉge, ki Ham tumháre sáth jáeṉge, kyúṉki ham ne suná hai, ki Ḳhudá tumháre sáth hai.

← Chapter 7 Jump to: Chapter 9 →